နောက်ဆုံးသတင်း/ဆောင်းပါးများ

မောင်တော မြောက်ပိုင်းတွင် ဒုက္ခသည်စခန်းနှင့် ပုံစံတူ စံပြကျေးရွာ ထူထောင်ရန် မြို့နယ် အုပ်ချုပ်ရေးမှူးက စီစဉ်

Rohingya Eye
RB News
9.1.2018

မောင်တော ။ ။ ရခိုင်ပြည်နယ်တွင်းမှ ဒုက္ခသည်စခန်းမှ ပိတ်ရန် ပြောဆိုနေသည်များ တွေ့နေရသော်လည်း မောင်တောမြို့နယ် အုပ်ချုပ်ရေးမှူးက ဒုက္ခသည်စခန်းနှင့် ပုံစံတူ စံပြကျေးရွာ တည်ထောင်ရန် စီစဉ်နေကြောင်း သတင်းရရှိပါသည်။

ဇန်န၀ါရီလ (၆) ရက်နေ့ နံနက် ၁၀ နာရီ အချိန်ခန့်တွင် မောင်တောမြို့နယ် အုပ်ချုပ်ရေးမှူးသည် ၎င်း၏ ရုံးမှ ရုံးအုပ်များ၊ ကျီးကန်းပြင်ကျေးရွာ အုပ်ချုပ်ရေးမှူးတို့နှင့် အတူ ကျီးကန်းပြင်ကျေးရွာအုပ်စု တောင်ရွာရှိ ဒုက္ခသည်စခန်းသို့ သွားရောက် ကြည့်ရှုခဲ့သည်။ အဆိုပါ ဒုက္ခသည်စခန်းတွင် နေထိုင်နေသူများမှာ ၂၀၁၇ သြဂုတ်လနှင့် စက်တင်ဘာလများတွင် မြန်မာစစ်တပ်၏ အကြမ်းဖက်မှုကြောင့် အိုးအိမ်မဲ့သွားသူများ ဖြစ်ကြပြီး၊ နွားရုံတောင် ကျေးရွာအုပ်စုအနီးတွင် တည်ရှိသည်။

မြို့နယ် အုပ်ချုပ်ရေးမှူးနှင့် အဖွဲ့သည် ဒုက္ခသည်စခန်းသို့ ရောက်ရှိပြီး ဒုက္ခသည် မိသားစုများအား၂၅ ကီလိုပါသည့် ဆန်အိတ်၊ ခေါက်ဆွဲထုပ် (၃) ထုပ်၊ ဆီ တစ်လီတာစီနှင့် အခြားအသုံးအဆောင် ပစ္စည်းအချို့ ပေးအပ်ခဲ့သည်။ ထို့နောက် ၎င်းက ငြိမ်းချမ်းစွာ နေထိုင်ရန်၊ လက်နက်ကိုင်အဖွဲ့များ တွေ့လျှင် နီးစပ်ရာ လုံခြုံရေးတပ်ဖွဲ့ဝင်များကို အကြောင်းကြားရန် မှာကြားရာ ဒုက္ခသည်များကလည်း မှာကြားသည့် အတိုင်း လုပ်ဆောင်မည်ဟု ပြန်လည် ပြောကြားခဲ့သည်။

မြို့နယ် အုပ်ချုပ်ရေးမှူးက တင်ပြစရာရှိလျှင်လည်း တင်ပြနိုင်ကြောင်း ပြောဆိုရာ ဒုက္ခသည်များက နွေရာသီတွင် ရေအခက်အခဲဖြစ်မည့် ကိစ္စများနှင့် အခြား တွေ့ကြုံနေရသည့် ပြဿနာများ တင်ပြခဲ့သည်။ ဒုက္ခသည်များက ရခိုင်ပြည်နယ် အတွင်းရှိ ဒုက္ခသည်စခန်းများ ပိတ်၍ ဒုက္ခသည်များကို မူရင်းနေရာတွင် ပြန်လည် နေရာချထားမည်ဟု ပြည်နယ်အစိုးရက ကြေညာထားသည်ကို ကြားသိရကြောင်း ပြောကြားရာ မြို့နယ် အုပ်ချုပ်ရေးမှူးက “အခုနေရာမှာ ဘာဖြစ်နေလဲ” ဟု မေးမြန်းခဲ့သည်။ ဒုက္ခသည်များက ၎င်းတို့ မကြာမီ ကြုံတွေ့ရမည့် ပြဿနာများကို ဆက်လက်တင်ပြပြီး၊ ၎င်းတို့အား မူရင်းနေရာတွင် ပြန်လည် နေရာချထားပေးရန်၊ ၎င်းတို့အား ပံ့ပိုးပေးရန် မလိုအပ်ဘဲ ကိုယ့်နည်းကိုယ့်ဟန်ဖြင့် ဖြစ်သလို ဆောက်လုပ်၍ နေမည်ဟု တင်ပြခဲ့သည်။

မြို့နယ်အုပ်ချုပ်ရေးမှူး မီးလောင်ထားသည့် နေရာများတွင် ပြန်လည် နေထိုင်ရန် ခွင့်မပြုနိုင်ကြောင်း၊ ရွာ၏ အနီးရှိ လယ်ကွင်းများတွင် စံပြကျေးရွာ ဆောက်လုပ်ပေးမည် ဖြစ်ကြောင်း (ဒုက္ခသည် စခန်းများနှင့် ပုံစံတူ)၊ ကုန်ကျစရိတ်များကို ၎င်းက ကျခံမည် ဖြစ်ကြောင်း၊ လမ်းနှင့် အခြားလိုအပ်ချက်များကို ၎င်းက ကျခံမည် ဖြစ်ကြောင်း ပြန်လည် ဖြေကြားခဲ့သည်။

ဒုက္ခသည်များက မြို့နယ် အုပ်ချုပ်ရေးမှူး ပြောကြားချက်များနှင့် ပတ်သက်၍ အချင်းချင်း တိုင်ပင် ဆွေးနွေးပြီးမှ အကြောင်းပြန်မည် ဖြေကြားခဲ့ပြီး၊ ဇန်န၀ါရီလ (၇) ရက်နေ့တွင် ဒုက္ခသည်တစ်ဦးက ဒုက္ခသည်များ အားလုံး ကိုယ်စား မြို့နယ် အုပ်ချုပ်ရေးမှူးထံ ဖုန်းဆက်၍ ဒုက္ခသည်စခန်းနှင့် ပုံစံတူ စံပြကျေးရွာတွင် နေထိုင်နိုင်မည် မဟုတ်ကြောင်း၊ မူရင်းနေရပ်သို့ ပြန်သွားခွင့်မရပါက လက်ရှိ ရှိနေသည့် နေရာတွင်သာ ဆက်နေမည် ဖြစ်ကြောင်း အကြောင်းကြားခဲ့ကြောင်း ဒုက္ခသည်တစ်ဦးက RB News သို့ပြောပါသည်။




Comment ရေးရန်

Rohingya Exodus