နောက်ဆုံးသတင်း/ဆောင်းပါးများ

ဘူးသီးတောင် ကျေးလက်ဒေသမှ နယ်ခြားစောင့်ရဲများနှင့် စစ်သားများက စက်လှေ ဆိုင်ကယ်၊ ကားများဖြင့် သွားလာသူများထံမှ ဆက်ကြေး ကောက်သလို ငွေကောက်ခံလျက်ရှိ

RB News
10.2.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်ရှိ ကျေးလက်ဒေသများမှ နယ်ခြားစောင့်ရဲများသည် စက်လှေ၊ ဆိုင်ကယ်များဖြင့် သွားလာသူများထံမှ ဆက်ကြေး ကောက်ခံသကဲ့သို့ ငွေကောက်ခံလျက် ရှိကြောင်း သတင်းရရှိပါသည်။ 

ဘူးသီးတောင်မြို့နယ် တောင်ပိုင်း ဂူတာပြင်ကျေးရွာရှိ ကျောင်းတွင် စခန်းချထားသည့် တပ်ရင်း ၃၅၂ မှ စစ်သားများသည် ဘူးသီးတောင် - စိမ့်ညှင်းပြား - ညောင်ချောင်းသို့ သွားလာသည့် ဆိုင်ကယ်များနှင့် ကားများကို စစ်ဆေး၍ ကားတစ်စီး၊ ဆိုင်ကယ်တစ်စီးလျှင် ငွေကျပ် တစ်သောင်းစီ ကောက်ခံလျက် ရှိကြောင်း ဒေသခံများက RB News သို့ပြောပါသည်။
သွားလာနေသူများသည် စားဝတ်နေရေးအတွက် မဖြစ်မနေ လိုအပ်၍ သွားလာနေသူများသာ ဖြစ်ပြီး၊ ၀င်ငွေလုံးဝ မရှိဘဲ အသက်ရှင်နေထိုင်ရန်သာ ရုန်းကန်နေကြသူများ ဖြစ်သောကြောင့် ငွေကျပ် တစ်သောင်း မယူဘဲ ၅ ထောင်သာ ယူရန် စစ်သားများကို တောင်းတောင်းပန်ပန်ဖြင့် ပြောသော်လည်း မတတ်နိုင်ရင် မသွားနဲ့ဟု ဆိုကာ ရိုက်နှက်ခြင်း၊ ဆဲဆိုခြင်းများ ပြုလုပ်သည်ဟု ဒေသခံများက ဆိုသည်။ ဂူတာပြင်ကျေးရွာမှ ရွာသားများ စားသောက်နိုင်ရန်အတွက် တစ်နေ့လျှင် အနည်းဆုံး ဆိုင်ကယ် နှစ်စီး ရွာပြင် ထွက်ရသောကြောင့် အနည်းဆုံး နှစ်သောင်း နေ့စဉ် ပေးနေရကြောင်း သိရှိရသည်။ 

အလားတူ လွန်ခဲ့သည့် ဇန်န၀ါရီလမှစ၍ ဖောင်တော်ပြင်ကျေးရွာရှိ နယ်ခြားစောင့်ရဲတပ်ဖွဲ့မှ နယ်ခြားစောင့်ရဲများသည် စက်လှေဖြင့် ဘူးသီးတောင်မြို့ပေါ်သို့ သွားလာသူများထံမှ စက်လှေငယ် တစ်စီးလျှင် ၅ ထောင်ကျပ်နှင့် စက်လှေကြီး တစ်စီးလျှင် ငွေကျပ် တစ်သောင်းနှင့် အထက် ဆက်ကြေး ကောက်ခံသကဲ့သို့ ကောက်ခံလျက်ရှိကြောင်း ဖောင်တော်ပြင်မှ ဒေသခံတစ်ဦးက ပြောပါသည်။ 

ဘူးသီးတောင်မြို့နယ်၊ မောင်တောမြို့နယ်နှင့် ရသေ့တောင်မြို့နယ်များရှိ ကျေးလက်ဒေသများမှ ရိုဟင်ဂျာများကို ကျေးရွာများတွင် ပိတ်လှောင်ထားပြီး၊ အလုပ်လုပ်ကိုင်ခွင့် မပေးခြင်း၊ သွားလာလှုပ်ရှားခွင့် မပေးသောကြောင့် တဖက်နိုင်ငံသို့ သွားရောက်၍ ခိုလှုံနေခြင်းများ နေ့စဉ်နှင့်အမျှ များပြားလာနေသည်။ 




Comment ရေးရန်

Rohingya Exodus