နောက်ဆုံးသတင်း/ဆောင်းပါးများ

ဘူးသီးတောင် ဘုရားပြင်အောင်ပ အုပ်ချုပ်ရေးမှူးက ဒေသခံတစ်ဦးကို ရိုက်နှက်၍ နယ်မြေရုံးသို့ ပို့ဆောင်၍ ချုပ်နှောင်ထား

RB News
19.7.2018

ဘူးသီးတောင် ။ ။ ရခိုင်ပြည်နယ်၊ ဘူးသီတောင်မြို့နယ် တောင်ပိုင်း ဘုရားပြင်အောင်ပ ကျေးရွာအုပ်စု အုပ်ချုပ်ရေးမှူး ဦးမောင်ကြီးက ရိုဟင်ဂျာတစ်ဦးကို ရိုက်နှက်၍ နယ်ခြားစောင့်ရဲတပ်ဖွဲ့ နယ်မြေရုံးသို့ ပို့ဆောင် လိုက်သည်။ 

ဘုရားပြင်အောင်ပကျေးရွာအုပ်စု အုပ်ချုပ်ရေးမှူး ဦးမောင်ကြီးသည် ရာအိမ်မှူး ဦးမူဟိဘူလ္လာ (ဘ) ဦးဆွေယာဒ်ကာဆိမ်းနှင့် ပူးပေါင်း၍ ဇူလိုင်လ (၁၈) ရက်နေ့ ညနေ ၅ နာရီခန့်အချိန်တွင် ဖိုးခေါင်ချောင်းကျေးရွာအုပ်စုမှ ရွှေ့ပြောင်းနေထိုင်သူတစ်ဦး ဖြစ်သည့် ဦးကာဒိရ်ဟူဆောင်း (ခ) ဘူတီယား (ဘ) ဦးအဒူရာမာန် (အသက် ၅၂ နှစ်) ကို အမှတ် (၁) ရပ်ကွက်၏ ရာအိမ်မှူးဖြစ်သူ ဦးမူဟိဘူလ္လာ၏ နေအိမ်သို့ ရွာဆော်မှတဆင့် ဆင့်ခါ်၍ လူမဆန်စွာ ရိုက်နှက်၍ ကြိုးဖြင့် ချည်နှောင်၍ ညောင်ချောင်းရှိ နယ်ခြားစောင့်ရဲတပ်ဖွဲ့ နယ်မြေရုံးသို့ ပို့ဆောင်လိုက်ကြောင်း ဒေသခံများက RB News သို့ပြောသည်။ 

ဦးကာဒိရ်ဟူဆောင်းသည် ယခင်လယ်သမားတစ်ဦးဖြစ်ပြီး ယခုအခါ ဈေးတွင် အထည်ဆိုင်ရောင်း၍ အသက်မွေးဝမ်းကျောင်း ပြုနေသူ ဖြစ်သည်။ လွန်ခဲ့သည့်တစ်လခန့်က အိုးသည်ရွာတွင် တံတားတစ်ခု ဆောက်လုပ်ပေးရန် ကျေးရွာအုပ်စု အုပ်ချုပ်ရေးမှူးက ပြောဆိုခဲ့ရာ ငွေကျပ် ၁၀ သိန်းကျော် မတတ်နိုင်၍ ဆောက်လုပ်မပေးသဖြင့် ကျေးရွာအုပ်စုအုပ်ချုပ်ရေးမှူးက မြို့နယ် အထွေထွေ အုပ်ချုပ်ရေး ဦးစီးဌာနမှ ရခိုင်လူမျိုး စာရေးတစ်ဦးနှင့် ပူးပေါင်း၍ ဆင့်ခေါ်စာ တစ်စောင်ပို့၍ ငွေကျပ် ၅ သိန်း ညှစ်ယူရန် ကြိုးစားခဲ့သည်။ သို့သော်လည်း ဦးကာဒိရ်ဟူဆောင်းက ငွေကျပ် ၅ သိန်းပေးရန် ငြင်းဆန်ခဲ့သဖြင့် ယခုကဲ့သို့ ရိုက်နှက်၍ နယ်မြေရုံးသို့ ပို့ဆောင်ခြင်း ဖြစ်သည်ဟု ဒေသခံများက ပြောဆိုနေကြသည်။ 

ကျေးရွာအုပ်စု အုပ်ချုပ်ရေးမှူးသည် ရခိုင်လူမျိုးတစ်ဦးဖြစ်ပြီး သြဇာအာဏာကို အလွဲသုံးစား ပြုလုပ်၍ လုပ်ဆောင်နေခြင်း ဖြစ်သည်။ ဦးကာဒိရ်ဟူဆောင်းကို ယခုအချိန်ထိ ချုပ်နှောင်ထားပြီး အမှုတစ်ခုခုဆင်၍ ထောင်ချမည်ကို ဒေသခံများက စိုးရိမ်နေကြသည်။ 

ဒေသဆိုင်ရာအာဏာပိုင်များ၏ မူဝါဒသည် ရိုဟင်ဂျာများကို ညှဉ်းပန်းနှိပ်စက်၍ ထွက်ပြေးသွားရန် ကြိုးစားနေခြင်းဖြစ်သည်မှာ သိသာထင်ရှားနေသည်ဟု ဒေသခံများက ဝေဖန်ပြောဆိုသည်။ 

ကိုယ်ဝန်ဆောင် အမျိုးသမီးများကို ငွေကြေး ထောက်ပံ့ရာတွင်လည်း ဘုရားပြင်အောင်ပတွင် ကိုယ်ဝန်ဆောင် ၁၆၀ ကျော်ရှိသည့်အနက် ၁၅ ဦးကိုသာ ငွေကျပ် ၄ သောင်းမှ ၅ သောင်းထိ ထောက်ပံ့၍ ကျန်ငွေများကို မြို့နယ်အုပ်ချုပ်ရေးနှင့် ပူးပေါင်း၍ ခေါင်းပုံဖြတ်စားလိုက်သည်ဟု ဒေသခံများက ပြောပါသည်။ 

မိုးစပါးစိုက်ပျိုးရာတွင် အလုပ်သမားများကို ငွေမပေးဘဲ အတင်းအဓမ္မ ခိုင်းစေမှုများ ရှိနေကြောင်း သိရသည်။ 




Comment ရေးရန်

Rohingya Exodus