နောက်ဆုံးသတင်း/ဆောင်းပါးများ

ဘူးသီးတောင် သေကံခွဆုံ ကျေးရွာအုပ်ချုပ်ရေးအဖွဲ့က WFP မှ စာရင်းပြုစုခိုင်းသည်ဟု ဆိုကာ စာရင်းပြုစု၍ ငွေကြေးကောက်ခံ

MYARF
RB News
26.7.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် တောင်ပိုင်း သေကံခွဆုံကျေးရွာအုပ်စု မုစ်တောဘိစ်ရွာ တာဝန်ခံနှင့် အဖွဲ့က WFP မှ စာရင်းပြုစုခိုင်းသည်ဟု ဆိုကာ စာရင်းပြုစု၍ ငွေကြေးကောက်ခံခဲ့သည်။ 

သေကံခွဆုံကျေးရွာအုပ်စု မုစ်တောဘိစ်ရွာ တာဝန်ခံ ဦးယာဟားယား (ဘ) ဦးအီလီယာစ်သည် WFP မှ အထောက်အပံ့ရသူများအား ထပ်မံစာရင်းပြုစုခိုင်းသည်ဟု ဆိုကာ ရွာသားများကို ဇူလိုင်လ (၂၂) ရက်နေ့တွင် ရွာသားများကို ရာအိမ်မှူး ဦးဟူဆောင်း (ဘ) ဦးနုရ်မာမတ်နှင့် ဦးနူရုလ်ဟောက် (ဘ) ဦးဟာဘီရာမာန် တို့မှတဆင့် ၎င်း၏ နေအိမ်သို့ ဆင့်ခေါ်၍ စာရင်းပြုစုကာ တစ်အိမ်ထောင်လျှင် ငွေကျပ် နှစ်ထောင်စီ ကောက်ခံခဲ့ကြောင်း ဒေသခံများက RB News သို့ပြောပါသည်။ 

မုစ်တော်ဘိစ်ရွာတွင် အိမ်ထောင်စု ၂၅၀ ခန့်ရှိပြီး ၂၀၁၇ ခုနှစ် သြဂုတ်လ နောက်ပိုင်းမှစ၍ ဘူးသီးတောင်မြို့နယ် တောင်ပိုင်းရှိ ကျေးရွာများတွင် WFP မှ ဆန်၊ ဆီ၊ ဆား၊ ပဲ စသည်များ လစဉ် ထောက်ပံ့ပေးလျက်ရှိသည်။ လစဉ် ထောက်ပံ့ရာတွင် လွယ်ကူစေရန်အတွက် WFP မှ အိမ်ထောင်စု လူဦးရေစာရင်း ကောက်ယူပြီး အိမ်ထောင်စုအလိုက် ကဒ်ပြားများ ထုတ်ပေးထားသည်။ WFP ၀န်ထမ်းများ အကြောင်းကြားသည့်နေ့တွင် ရွာသားများက အဆိုပါကဒ်များကို ကိုင်၍ WFP ၏ ဆန်ဂိုဒေါင်များသို့ သွား၍ ထောက်ပံ့သည်များကို ထုတ်ယူရသည်။ 

သေကံခွဆုံကျေးရွာအုပ်စုမှ ဒေသခံများသည် စေတီတောင်ကျေးရွာရှိ WFP မှ အထောက်အပံ့များကို ထုတ်ယူသည်။ မုစ်တော်ဘိစ်ရွာတာဝန်ခံ ဦးယာဟားယားက ဘင်္ဂလားဒေ့ရ်ှနိုင်ငံတွင် ခိုလှုံနေသူများကိုပါ လက်ရှိရွာတွင် နေထိုင်နေသည်ဟု စာရင်းသွင်း၍ ကဒ်များရယူထားပြီး အထောက်အပံ့ထုတ်ယူသည်ဟု ဒေသခံများက ပြောဆိုနေကြသည်။ 

ဇူလိုင်လ (၂၃) ရက်နေ့တွင် အထောက်အပံ့များ ပေးမည်ကို ကြိုသိထားသောကြောင့် တစ်ရက်အလိုတွင် ရာအိမ်မှူးနှင့် ၎င်း၏ တပည့်တို့မှ တဆင့် ရွာသားများကို ဆင့်ခေါ်၍ စာရင်းပြုစုခိုင်းထားသည်ဟု ဆိုကာ တစ်အိမ်ထောင်လျှင် ငွေကျပ် နှစ်ထောင်စီ ကောက်ခံခဲ့ခြင်း ဖြစ်သည်။ စာရင်းမသွင်းပါက အထောက်အပံ့များ ရမည်မဟုတ်ကြောင်း ပြောဆို၍ ခြိမ်းခြောက်သောကြောင့် ရွာသားများက ငွေသွင်း၍ စာရင်းပေးသွင်းခဲ့သည်။ 

မုစ်တော်ဘိစ်ရွာရှိ အိမ်ထောင်စု ၂၅၀ ခန့်မှ ငွေကျပ် ၅ သိန်းခန့် လိမ်လည် ကောက်ခံထားသည့်အပြင် ဘင်္ဂလားဒေ့ရ်ှတွင် ခိုလှုံနေသူများ၏ အမည်များကို စာရင်းသွင်း၍ လိမ်လည်ထုတ်ယူနေသည်ကို WFP မှသိရှိသွားပြီး ယနေ့ ဇူလိုင်လ (၂၆) ရက်နေ့တွင် ၀န်ထမ်းများ လာရောက်၍ အိမ်ထောင်စုအလိုက် စစ်ဆေးခဲ့ရာ ၃၄ ကဒ် ပိုနေသည်ကို တွေ့ရှိခဲ့သည်။ 

“ကျေးရွာတာဝန်ခံက ရွာသားတွေကို အမျိုးမျိုး ခြိမ်းခြောက်ပြီး အမြဲဆဲဆိုငွေညှစ်တယ်၊ ငွေညှစ်လို့မရတဲ့သူတွေကို ညောင်ချောင်းနယ်မြေက နယ်ခြားစောင့်ရဲတွေနဲ့ ပေါင်းပြီး ဈေးနေ့တွေမှာ ညောင်ချောင်းဈေးသွားရင် အဲဒီကနေ ဖမ်းပြီး ငွေညှစ်တယ်၊ ကျေးရွာအုပ်စု အုပ်ချုပ်ရေးမှူး မောင်သန်းညွန့်က ဝေစုရနေတော့ တာဝန်ခံလုပ်သမျှကို ဘာမှ မပြောဘူး၊ ငြိမ်ပြီး ကြည့်နေတယ်” ဟု ဒေသခံတစ်ဦးက ပြောပါသည်။ 



Comment ရေးရန်

Rohingya Exodus