နောက်ဆုံးသတင်း/ဆောင်းပါးများ

မင်းနိုင်ဦး
Rohingya Today
22.12.2018

မောင်တော ။ ။ ရခိုင်ပြည်နယ်၊ မောင်တောမြို့နယ် လိပ်ရကျေးရွာအုပ်စုတွင် ရိုဟင်ဂျာ ငါးဖမ်းသမားတစ်ဦးကို နယ်ခြားစောင့်ရဲတပ်ဖွဲ့ ကင်းစခန်းမှ ပစ်သတ်ခဲ့သည်။ 

မောင်တောမြို့နယ် လိပ်ရကျေးရွာအုပ်စုမှ ဦးနူရ်အစ္စလာမ် (ဘ) ဦးအလီဟူစိန်း (အသက် ၅၈ နှစ်) သည် လိပ်ရ နယ်ခြားစောင့်ရဲတပ်ဖွဲ့ ကင်းစခန်းအနီးရှိ ချောင်းဝ၌ အခြား ရိုဟင်ဂျာကလေးငယ် ၃ ဦးနှင့် အတူ ဒီဇင်ဘာလ ၂၂ ရက်နေ့ နံနက် ၁း၃၀ နာရီခန့် အချိန်တွင် ငါးဖမ်းနေစဉ် ကလေးငယ်တစ်ဦး ရေနစ်မြှပ်နေ၍ အချင်းချင်း အော်ဟစ် အကူအညီတောင်းခံသည်ကို နယ်ခြားစောင့်ရဲများက ကြားပြီး၊ ကင်းစခန်းမှ ရဲအုပ်နှင့် တပ်သားအချို့ ထွက်လာကာ သေနတ်ဖြင့် ဆက်တိုက် ပစ်ခတ်သဖြင့် ဦးနူရ်အစ္စလာမ်က “ဗိုလ်လေး ကျွန်တော်တို့ပါ” ဟု အကြိမ်ကြိမ် အော်ဟစ် ပြောဆိုခဲ့သော်လည်း မရပ်တန့်ဘဲ ဆက်တိုက် ပစ်ခတ်မှုကြောင့် ယင်းနေရာတွင် ဦးနူရ်အစ္စလာမ် ကျည်ဆံထိမှန်ပြီး ပွဲချင်းပြီး သေဆုံးသွားခဲ့ကြောင်း ဒေသခံများက Rohingya Today သို့ပြောပါသည်။

ထို့နောက် ကလေးငယ် ၃ ဦးထဲမှ ၂ ဦးကို ဦးနူရ်အစ္စလာမ်၏ ရုပ်အလောင်းနှင့် အတူ ကြိမ်ချောင်း နယ်ခြားစောင့်ရဲတပ်ဖွဲ့ နယ်မြေစခန်းသို့ ယူဆောင်သွားပြီး၊ စစ်ဆေးမေးမြန်းမှုများ ပြုလုပ်ပြီးနောက် အလောင်းကို မောင်တောပြည်သူ့ဆေးရုံသို့ ပို့ဆောင်ကာ လိုအပ်သည့် စစ်ဆေးဆောင်ရွက်မှုများ ပြုလုပ်ပြီး ညနေ ၅ နာရီခန့်အချိန်တွင် မိသားစုထံသို့ အပ်နှံခဲ့သည်။ မိသားစုဝင်များက ဦးနူရ်အစ္စလာမ်၏ ရုပ်အလောင်းကို ည ၈း၃၀ နာရီအချိန်တွင် မြေမြှပ်သဂြိုဟ်ခဲ့ကြောင်း လိပ်ရရွာသားတစ်ဦးက ပြောပါသည်။ 

ဦးနူရ်အစ္စလာမ်သည် လိပ်ရရှိ ကင်းစခန်းကို သတင်းပို့၍ ခွင့်ပြုချက်ယူကာ မကြာခဏ ငါးရှာလေ့ရှိပြီး ပစ်ခတ်ခံရသည့် အချိန်မတိုင်မီ သတင်းပို့ပြီး ခွင့်ပြုချက်ရယူပြီးနောက် ချောင်းထဲသို့ ဆင်း၍ ငါးရှာနေစဉ် တစ်နာရီခန့်အကြာတွင် ပစ်ခတ်ခံရခြင်း ဖြစ်သည်။

လိပ်ရတွင် ငါးဖမ်းသူများသည် ငါးဖမ်းခွင့်ရရှိရေးအတွက် ကင်းစခန်းအား ငွေကြေးများ ပေးရသည့်အပြင် ဖမ်းဆီးရရှိသည့် ငါးများထဲမှ နယ်ခြားစောင့်ရဲများ ကြိုက်သည့် ငါးများကို ပေးရကြောင်း ဒေသခံများက ပြောပါသည်။ 



မင်းနိုင်ဦး
Rohingya Today
21.12.2018

မောင်တော ။ ။ ရခိုင်ပြည်နယ်၊ မောင်တောမြို့နယ် မီးသတ်တပ်ဖွဲ့က မောင်တောမြို့နယ်ရှိ ဆိုင်ခန်းတိုင်းတွင် မီးသတ်ဆေးဗူးများ မဖြစ်မနေတပ်ဆင်ထားရမည်ဟုဆိုကာ မီးသတ်ဂက်စ်ဗူးများကို အဆမတန်ဈေးနှုန်းဖြင့် မ၀ယ်မနေရ ရောင်းချလျက်ရှိသည်။

မောင်တောမြို့နယ် မီးသတ်တပ်ဖွဲ့မှ တပ်ဖွဲ့ဝင်များသည် မောင်တောမြို့ပေါ်ရှိ ဈေးဆိုင်ခန်းတိုင်းသို့ သွားရောက်၍ တစ်ဆိုင်လျှင် မီးသတ်ဆေးဗူးတစ်ဗူးစီ မဖြစ်မနေ တပ်ဆင်ထားရမည်ဟုဆိုကာ မီးသတ်ဆေးဗူး တစ်ဗူးလျှင် ငွေကျပ် လေးသောင်းမှ ငါးသောင်း အထိ ကောက်ခံ၍ မ၀ယ်မနေရ အတင်းအဓမ္မ ရောင်းချနေကြောင်း ဒေသခံများက Rohingya Today သို့ပြောပါသည်။



မောင်တောမြို့ပေါ် အနီးတ၀ိုက်တွင် ဈေးဆိုင်ခန်း ၁၅၀၀ ကျော်ခန့်ရှိပြီး အဆိုပါ ဆိုင်ခန်းများသည် ယခင်က အရောင်းအ၀ယ် အဆင်ပြေခဲ့သော်လည်း ၂၀၁၂ ခုနှစ် ဇွန်လတွင် ဖြစ်ပွားခဲ့သည့် ပဋိပက္ခဖြစ်စဉ်နောက်ပိုင်းတွင် ရောင်းဝယ်ဖောက်ကားမှု လျော့နည်းလာသည့်အပြင် ၂၀၁၆ ခုနှစ် အောက်တိုဘာလနှင့် ၂၀၁၇ ခုနှစ် သြဂုတ်လ ဖြစ်စဉ်များကြောင့် မောင်တောမြို့မှ လူဦးရေ ၈၀% ကျော် တဖက်နိုင်ငံသို့ သွားရောက်ခိုလှုံနေရသဖြင့် ရောင်းဝယ်ဖောက်ကားမှု သိသိသာသာ ကျဆင်းသွားသည်။ 

ယခု မီးသတ်တပ်ဖွဲ့က ဈေးဆိုင်ပိုင်ရှင်များကို မီးသတ်ဆေးဗူးများ မရှိမဖြစ်ဆောင်ထားရမည်၊ မဆောင်ထားလျှင် တရားဥပဒေအရ အရေးယူခြင်းခံရမည်ဟုဆိုကာ ဆိုင်ရှင်များကို စီးပွားရေးအဆင်မပြေသည့်ကြားက မ၀ယ်မနေရ အတင်းဝယ်ခိုင်း၍ တစ်ဆိုင်လျှင် ငွေကျပ် လေးသောင်းမှ ငါးသောင်းအထိ အတင်းအဓမ္မ ကောက်ခံနေခြင်းသည် ဆိုင်ရှင်များအတွက် အလွန်တရာ နစ်နာဆုံးရှုံးစေသည်။

မီးသတ်တပ်ဖွဲ့က ငွေကျပ် လေးသောင်းမှ ငါးသောင်းဖြင့် အတင်းအဓမ္မ ရောင်းချ၍ တပ်ဆင်ခိုင်းနေသည့် 3KG မီးသတ်ဆေးဗူးတစ်ဗူး၏ ပြင်ပပေါက်ဈေးမှာ ငွေကျပ် ၁၆၀၀၀ မှ ၁၇၀၀၀ လောက်သာရှိသည်။ ဈေးဆိုင်ပိုင်ရှင်များက မိမိတို့၏ အစီအစဉ်ဖြင့် ပြင်ပဈေးကွက်မှ ၀ယ်ယူ၍ တပ်ဆင်မည်ဟု ပြောဆိုသော်လည်း မီးသတ်တပ်ဖွဲ့ဝင်များက အပြင်မှ ၀ယ်ယူ၍ တပ်ဆင်ခွင့် မရှိကြောင်း၊ ၎င်းတို့ထံမှ ၀ယ်ယူတပ်ဆင်ရမည်ဟု ပြောဆိုကာ ဈေးကြီးကြီးဖြင့် ၎င်းတို့ထံမှ အတင်းအဓမ္မ ၀ယ်ယူခိုင်းသည်ဟု ဈေးဆိုင်ပိုင်ရှင်များက ပြောပါသည်။



အေးဇော်
Rohingya Today
20.12.2018

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ရေတွင်းပြင်ကျေးရွာမှ မိသားစုတစ်စုကို နယ်မြေရှင်းလင်းရေးအဖွဲ့က ဖမ်းဆီးခေါ်ဆောင်သွားသည်။

ယနေ့ ဒီဇင်ဘာလ (၂၀) ရက်နေ့ မွှန်းလွှဲ ၁ နာရီခန့်အချိန်တွင် နယ်ခြားစောင့်ရဲတပ်ဖွဲ့နှင့် စစ်တပ် အင်အား ၁၅၀ ၀န်းကျင်သည် ရေတွင်းပြင်ကျေးရွာသို့ ရောက်ရှိလာပြီး ရွာကို ၀န်းရံကာ အသက် ၃၀ နှစ်ခန့် အရွယ် ဦးမိုဟာမတ်အလီ၏ နေအိမ်ကို ပစ်မှတ်ထား၍ စစ်ဆေးခဲ့သည်။ စစ်ဆေးသူများက ဦးမိုဟာမတ်အလီကို မတွေ့သဖြင့် ၎င်း၏ ဇနီး၊ သားနှစ်ဦးနှင့် ဇနီး၏ မောင်ဖြစ်သူတို့ လေးဦး ဖမ်းဆီးခေါ်ဆောင်သွားသည်။ 

စစ်ဆေးရေးအဖွဲ့သည် ဦးစွာ ကျေးရွာသားများကို အိမ်ထောင်စုစာရင်းနှင့်တကွ ကျေးရွာအုပ်ချုပ်ရေးမှူးရုံးသို့ လာရောက်ခိုင်းပြီး လူအပို ရှိ/မရှိ စစ်ဆေးခဲ့သည်။ ထို့နောက် ဦးမိုဟာမတ်အလီ၏ နေအိမ်သို့ သွားရောက်၍ နေအိမ်အနှံ့ကို အသေးစိတ်ရှာဖွေခဲ့သည်။ ၎င်း၏ နေအိမ်တွင် ဥပဒေနှင့် မလွတ်ကင်းသည့် တစ်စုံတစ်ရာ ရှာဖွေတွေ့ရှိခဲ့ခြင်း မရှိခဲ့သေ်ာလည်း နေအိမ်တွင် တွေ့ရှိသည့် ရွှေငွေများကို သိမ်းယူသွားခဲ့ကြောင်း ဒေသခံများက Rohingya Today သို့ပြောပါသည်။ ဦးမိုဟာမတ်အလီသည် ယင်းရွာတွင် ငွေကြေး အဆင်ပြေနေသူတစ်ဦး ဖြစ်သည်ဟု ဒေသခံများက ဆိုသည်။ 

မောင်တောမြောက်ပိုင်းတွင် ရိုဟင်ဂျာကျေးရွာပေါင်း ရာဂဏန်းမက ရှိခဲ့သော်လည်း ယခုအခါ ဆယ်ဂဏန်းခန့် ရွာများတွင် ရိုဟင်ဂျာအနည်းငယ်စီ နေထိုင်လျက်ရှိပြီး ကျန်ကျေးရွာများမှ ဒေသခံရိုဟင်ဂျာများကို ၂၀၁၆ ခုနှစ် အောက်တိုဘာလနှင့် ၂၀၁၇ ခုနှစ် သြဂုတ်လ ဖြစ်စဉ်များနောက်ပိုင်း မြန်မာစစ်တပ်က အင်အားအလွန်အကျွံသုံး၍ သတ်ဖြတ်ခြင်း၊ မုဒိမ်းကျင့်ခြင်းများကြောင့် ခုနှစ်သိန်းခွဲခန့် ဘင်္ဂလားဒေ့ရ်ှနိုင်ငံသို့ ထွက်ပြေးခိုလှုံနေကြသည်။ 

နယ်ခြားစောင့်ရဲတပ်ဖွဲ့နှင့် စစ်တပ်တို့ ပူးပေါင်း၍ ပြုလုပ်နေသည့် နယ်မြေရှင်းလင်းရေးသည် လွန်ခဲ့သည့် ၃ ရက်က ကြိမ်ချောင်းရွာအနီး ပြူးမချောင်းတွင် မာရမာကြီး အမျိုးသားနှစ်ဦး တိုက်ခိုက်ခံရသည့် ဖြစ်စဉ်နှင့် ပတ်သက်နေသည်ဟု ယူဆရသည်။ သို့သော်လည်း အဆိုပါ တိုက်ခိုက်မှုဖြစ်စဉ်တွင် ရိုဟင်ဂျာများ ပါဝင် ပတ်သက်စရာ မရှိကြောင်းကို အောက်ပါ အချက်အလက်များနှင့် တိုက်ဆိုင်ကြည့်ရန် လိုပေမည်။

(၁) မာရမာကြီးနှစ်ဦး တိုက်ခိုက်ခံရမှုသည် ကြိမ်ချောင်းရွာအနီး ပြူးမချောင်းတွင်ဖြစ်သည်။ ယင်းကျေးရွာ အနီးအနားတွင် ရခိုင်ကျေးရွာများသာ ရှိကြပြီး ရိုဟင်ဂျာကျေးရွာများ မရှိကြပေ။ ယနေ့ နယ်မြေရှင်းလင်းရေးအဖွဲ့ လာရောက် စစ်ဆေးသွားသည့် ရေတွင်းပြင်ကျေးရွာသည် မာရမာကြီးနှစ်ဦး တိုက်ခိုက်ခံရသည့် နေရာနှင့် ၈ မိုင်ခန့် ကွာဝေးသည်။ 

(၂) ရခိုင့်တပ်မတော် (AA) နှင့် မြန်မာတပ်မတော်တို့ တိုက်ပွဲဖြစ်ပွားနေချိန်မှစ၍ မြန်မာတပ်မတော်လုံခြုံရေးအဖွဲ့သည် ပြူးမချောင်းအနီးအနားရှိ ရခိုင်ကျေးရွာများနားတွင် လုံခြုံရေးနေရာယူထားပြီး မာရမာကြီးနှစ်ဦး တိုက်ခိုက်ခံရသည့် ပြူးမချောင်း၏ အနီးစပ်ဆုံးရွာ မြောချောင်းတွင်လည်း စစ်တပ်က စခန်းချထားသည်။ ထို့အပြင် ပြူးမချောင်း၏ အ၀င်ဝတွင်လည်း နယ်ခြားစောင့်ရဲတပ်ဖွဲ့ ကင်းစခန်းရှိသည်။ 

(၃) မောင်တောဒေသသည် WY တံဆိပ်ပါ မူးယစ်ဆေးဝါး ရောင်းဝယ်ရေး အဓိကဒေသတစ်ခုဖြစ်နေပြီး အများအားဖြင့် ဒေသခံရခိုင်များက အာဏာပိုင်များနှင့် ပူးပေါင်း၍ တဖက်နိုင်ငံသို့ တင်ပို့သည်။ ပြူးမချောင်းသည် ကြိမ်ချောင်းအပါအ၀င် အနီးအနားကျေးရွာများမှ ရခိုင်များအတွက် WY တံဆိပ်ပါ မူးယစ်ဆေးဝါးကို တဖက်နိုင်ငံသို့ မှောင်ခိုသယ်ယူပို့ဆောင်ရာ လမ်းကြောင်းဖြစ်သည်။ 

(၄) မောင်တောဒေသတွင် ၂၀၁၂ ခုနှစ် ဇွန်လမှစ၍ ညမထွက်ရ အမိန့်ထုတ်ပြန်ထားသည်။ ရိုဟင်ဂျာများသည် နေ၀င်သည့် အချိန်မှစ၍ နေထွက်သည့်အချိန်ထိ ၎င်းတို့၏ နေအိမ်မှ အပြင်သို့ ထွက်ခွာခွင့် မရှိပေ။

ယခုအခါ မာရမာကြီးနှစ်ဦး တိုက်ခိုက်ခံရသည်ကို အကြောင်းပြု၍ ဒေသဆိုင်ရာအာဏာပိုင်များက လက်ကျန် ကျန်ရှိနေသည့် ရိုဟင်ဂျာကျေးရွာ အနည်းငယ်ကို ပစ်မှတ်ထား၍ အင်အားအလွန်အကျွံသုံး၍ နယ်မြေရှင်းလင်းမည်ဆိုပါက လက်ကျန်ရိုဟင်ဂျာများလည်း တဖက်နိုင်ငံသို့ ထွက်ပြေးရမည့်အရေးနှင့် ကြုံတွေ့ရနိုင်သည်။


ကျော်စိုး
Rohingya Today
18.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်၊ သိမ်တောင်ပြင်ကျေးရွာတွင် NGO အဖွဲ့အစည်း၏ ထောက်ပံ့ပစ္စည်းများ ထုတ်ယူသည့် ရွာသားများထံမှ ကျေးရွာအုပ်ချုပ်ရေးအဖွဲ့က ငွေကြေးကောက်ခံခဲ့သည်။ 

သိမ်တောင်ပြင်ကျေးရွာအုပ်စုတွင် ICRC အဖွဲ့မှ ဒီဇင်ဘာလ (၁၈) ရက်နေ့တွင် ရွာသားများအား ရိက္ခာနှင့် အခြားထောက်ပံ့ပစ္စည်းများ ဖြန့်ဝေစဉ် ကျေးရွာအုပ်ချုပ်ရေးအဖွဲ့က ရွာသားများထံမှ အိမ်ထောင်စုတစ်စုလျှင် ငွေကျပ် ငါးထောင်စီ ကောက်ခံခဲ့ကြောင်း ဒေသခံများက Rohingya Today သို့ပြောပါသည်။ 

သိမ်တောင်ပြင်ကျေးရွာအုပ်စုတွင် အစ္စလာမ်ဘာသာဝင် ရိုဟင်ဂျာနှင့် ဗုဒ္ဓဘာသာဝင် ဒိုင်းနက် လူမျိုးစုနှစ်စု နေထိုင်ကြသော်လည်း အိမ်ထောင်စု ၄၅၀ စု ရှိသည့် ရိုဟင်ဂျာများကိုသာ ငွေမပေးလျှင် နောက်နောင် ထောက်ပံ့ပစ္စည်းများ ရရှိမှာ မဟုတ်ကြောင်း ခြိမ်းခြောက်ပြောဆို၍ ငွေကျပ် ငါးထောင်စီ ညှစ်ယူခဲ့ခြင်း ဖြစ်ကြောင်း ရွာသားတစ်ဦးက ပြောသည်။ 


ကျော်စိုး
Rohingya Today
13.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်ရှိ ရခိုင်လူမျိုး ကျေးရွာအုပ်ချုပ်ရေးမှူးများသည် ရွာသားများအတွက် ရရှိသည့် ထောက်ပံ့ပစ္စည်းများကို ရိုဟင်ဂျာများအား ထုတ်မပေးဘဲ ရောင်းစားခြင်း၊ ထောက်ခံစာများ ထုတ်ပေးရာတွင် ငွေကြေးအလွန်အကျွံကောက်ခံခြင်းနှင့် ၎င်းတို့နှင့် မတည့်သူများကို လုံးဝ ထုတ်မပေးခြင်းများ ပြုလုပ်လျက်ရှိသည်။

ဘူးသီးတောင်မြို့နယ်၌ လက်ရှိ ကျေးရွာအုပ်စုပေါင်း ၈၀ စုရှိသည့်အနက် မွတ်စလင်နှင့် အခြားဘာသာဝင် ရောနှော နေထိုင်သည့် အုပ်စု ၄၆ စု၊ ဗုဒ္ဓဘာသာဝင် မပါသည့် အုပ်စု ၁၆ စု ဖြစ်ပြီး ကျန်သည့် အုပ်စုများမှာ ဗုဒ္ဓဘာသာဝင် သီးသန့်အုပ်စုများ ဖြစ်ကြသည်။

ဘူးသီးတောင်မြို့နယ် အထွေထွေအုပ်ချုပ်ရေးဦးစီးဌာနသည် ဗုဒ္ဓဘာသာဝင် မပါသည့် အုပ်စုများတွင် ရိုဟင်ဂျာကျေးရွာအုပ်ချုပ်ရေးမှူးများ၊ ဗုဒ္ဓဘာသာဝင် သီးသန့်အုပ်စုများတွင် ဗုဒ္ဓဘာသာဝင် ကျေးရွာအုပ်ချုပ်ရေးမှူးများ အသီးသီး ခန့်အပ်ထားပြီး ရောနှောနေထိုင်သည့် အုပ်စုများတွင် ကျေးရွာအုပ်ချုပ်ရေးမှူးများ ခန့်အပ်ရာတွင် ရိုဟင်ဂျာ ၉၀% ကျော်နေထိုင်သည့် လူများစုဘက်မှ မခန့်အပ်ဘဲ ၅% မှ ၁၀% ခန့်သာ ရှိကြသည့် ဗုဒ္ဓဘာသာဝင်များဘက်မှ ခန့်အပ်ထားသည်။

ဥပမာအားဖြင့် ကျောက်ဖြူသားသေကံကျေးရွာအုပ်စုတွင် ရခိုင်အိမ်ခြေ ၅ အိမ်သာရှိပြီး၊ ရိုဟင်ဂျာအိမ်ခြေ ၅၅၀ ကျော်ရှိသော်လည်း ရခိုင်လူမျိုး အုပ်ချုပ်ရေးမှူးသာ ခန့်အပ်ထားသည်။

ရောနှောနေထိုင်သည့် ကျေးရွာများတွင် ကျေးရွာတာဝန်ခံအဖြစ် ရိုဟင်ဂျာများဘက်မှ တစ်ဦးစီကို ရွေးကောက်တင်မြှောက်ပြီး တရားဝင် တာဝန်ပေးအပ်ထားသော်လည်း ဗုဒ္ဓဘာသာဝင် ကျေးရွာအုပ်ချုပ်ရေးမှူးများက လုပ်ပိုင်ခွင့်မပေးဘဲ ဆယ်အိမ်မှူးများအဖြစ်သာ ဆက်ဆံကြသည်။

ဗုဒ္ဓဘာသာဝင် ကျေးရွာအုပ်ချုပ်ရေးမှူးများသည် ရိုဟင်ဂျာများထံမှ ရွာထွက်​လက်​မှတ်​တစ်​စောင်လျှင်​ ၁၀၀၀ ကျပ်​မှ ၅၀၀၀ ကျပ်​ထိ နှင့် ​​ဆောက်​လုပ်​ခွင့်​​ထောက်​ခံစာ၊ အလုပ်​​လျှောက်​​ထောက်​ခံစာ၊ ​မွေးစာရင်း​၊ အ​ပြောင်းအ​​ရွှေ့ပြုလုပ်ရန် ထောက်ခံစာ စသည့်​ ထောက်​ခံစာတစ်​စောင်လျှင် ၁၀၀၀၀ ကျပ်​မှ ၁၀၀၀၀၀ ကျပ်​အထိ ညှစ်ယူနေသည့်အပြင်​ ၎င်းတို့နှင့် မတည့်သူများကို လုံးဝ ထုတ်​​ပေးလေ့ မရှိကြောင်း ဒေသခံများက Rohingya Today သို့ပြောသည်။

ဒီဇင်ဘာလ (၁၂) ရက်နေ့က ​ကျောက်​ဖြူသား​သေကံကျေးရွာအုပ်​ချုပ်​​ရေးမှူး ဦးမောင်​​ကေထွန်းသည် ရိုဟင်ဂျာ နို့တိုက်မိခင်များ၌ ​​ထောက်​ပံ့​ငွေများ ထုတ်​ယူရန်​​ မွေးစာရင်း လိုအပ်​​နေခြင်းကို အ​ခွင့်​​ကောင်းယူ၍ တစ်ဦးလျှင် ​ငွေကျပ်​တစ်​​သောင်းစီ ကောက်ခံ၍ မွေးစာရင်းများ ထုတ်ပေးခဲ့ကြောင်း ရွာသားတစ်ဦးက ပြောပါသည်။

မြို့နယ်အထွေထွေအုပ်ချုပ်ရေးဦးစီးဌာနမှ ကျေးရွာအုပ်ချုပ်ရေးမှူး လစာအဖြစ် တစ်လ ၁၃၀၀၀၀ ကျပ်စီ ထုတ်ပေးသော်လည်း ရိုဟင်ဂျာအုပ်ချုပ်ရေးမှူးများအား နိုင်ငံသားမဟုတ်ဟု ဆိုကာ မပေးဘဲ ဗုဒ္ဓဘာသာဝင် အုပ်ချုပ်ရေးမှူးများကိုသာ လစာ ထုတ်ပေးသည်။

တာဝန်ခံအဖြစ် ခန့်အပ်ထားသည့် ရိုဟင်​ဂျာများသည် ရိုဟင်ဂျာ အိမ်​​ခြေ အနည်းဆုံး ၄ဝဝ မှ ၁၈၀၀ ထိကို ကိုယ်​စားပြုပြီး တာဝန်ထမ်းဆောင်နေသော်လည်း ၎င်းတို့ကို လစာပေးခြင်း မရှိသည့်အပြင် ယခင်က ပေးခဲ့သည့် တံဆိပ်တုံးများကိုပါ မြို့နယ်အထွေထွေအုပ်ချုပ်ရေးဦးစီးဌာနမှ ပြန်လည် သိမ်းယူလိုက်ကြောင်း ဒေသခံများက ပြောပါသည်။

နိုဝင်​ဘာ လကုန်ပိုင်းတွင် လယ်ယာစိုက်ပျိုးရေးဝန်ကြီးဌာနမှ ဘူးသီးတောင်မြို့နယ်ရှိ ဆောင်းသီးနှံစိုက်​ပျိုး​ထား​သော​ တောင်​သူလယ်​သမားများကို ​ကူညီထောက်ပံ့ရန် တစ်ဦးလျှင် ​မြေသြဇာ ၂၀ ကီလိုစီ ထုတ်ပေးခဲ့သော်လည်း ရိုဟင်ဂျာ လယ်သမားမျာအား ထုတ်မပေးဘဲ ​ဗုဒ္ဓဘာသာဝင် အုပ်​ချုပ်​​ရေးမှူးများနှင့်​ မြို့နယ်အထွေထွေအုပ်ချုပ်ရေးဦးစီးဌာနမှ ကျေးရွာတာဝန်ကျစာရေးတို့ ပူး​ပေါင်း၍ လျှို့ဝှက်ရောင်းစားခဲ့သည်။



အောင်မင်း
Rohingya Today
10.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်၊ သိမ်တောင်ပြင်ကျေးရွာအုပ်စုတွင် ကျေးရွာတာဝန်ခံနှင့် အာဏာပိုင်များ၏ လက်ကိုင်တုတ်တစ်ဦးတို့ ပူးပေါင်း၍ တဖက်နိုင်ငံရောက် ဒုက္ခသည်တစ်ဦး၏ အိမ်နှင့် ခြံမြေကို အခြားတစ်ဦးအား ရောင်းချလိုက်သည်။

ဘူးသီးတောင်မြို့နယ်၊ သိမ်တောင်ပြင်ကျေးရွာအုပ်စု၊ သိမ်တောင်ပြင် လန်ဂွစ်ရွာ မြောက်ဘက်ရှိ ဘင်္ဂလားဒေ့ရ်ှနိုင်ငံရောက် ဒုက္ခသည် ဒေါ်ဘော်ဒူမာခါတွန် (ဘ) ဦးဆုလ်တာန်အဟ်မဒ် (အသက် ၄၅ နှစ်) ၏ အိမ်အလွတ်နှင့် ခြံမြေကို ကျေးရွာတာဝန်ခံ ဦးရရှီးဒ် (ဘ) ဦးဟာဆာန် နှင့် အာဏာပိုင်များနှင့် ရင်းနှီးသည်ကို အခွင့်ကောင်းယူ၍ ရွာသားများထံမှ ငွေညှစ်လျက်ရှိသည့် ဦးလာလ်မျာ (ဘ) ဦးအဒူလီ (အသက် ၅၆ နှစ်) တို့ပူးပေါင်း၍ မြို့နယ်အထွေထွေအုပ်ချုပ်ရေးဦးစီးဌာ၏ ရန်ပုံငွေအတွက်ဟုဆိုကာ ယင်းရွာမှ အလီဂျူဟာရ် (ဘ) ဦးလာလု (အသက် ၂၇ နှစ်) အား ငွေကျပ် ၅ သိန်းဖြင့် ရောင်းချလိုက်ကြောင်း ဒေသခံများက Rohingya Today သို့ပြောပါသည်။ 

အိမ်နှင့် ခြံမြေတို့ကို လွန်ခဲ့သည့် သြဂုတ်လ (၂၈) ရက်နေ့ကတည်းက ရောင်းချခဲ့သော်လည်း ၀ယ်ယူသူက စိုးရိမ်၍ အကြိမ်ကြိမ် အာမခံချက်တောင်းခံခဲ့သဖြင့် ၎င်းတို့နှစ်ဦးက နိုဝင်ဘာလ (၂၈) ရက်နေ့တွင် အရောင်းအ၀ယ် စာချုပ်ချုပ်ဆိုပေးခဲ့သည်ဟု ရွာသားတစ်ဦးက ပြောသည်။ 

ရောင်းချ၍ ရရှိခဲ့သည့် ငွေများကို ဦးလာလ်မျာက ၃ သိန်းနှင့် ဦးရရှီးဒ်က ၂ သိန်း ဝေစုခွဲယူခဲ့သည်။

“သူတို့က ဒီတစ်အိမ်မကဘူး၊ အဲလို ဒုက္ခသည်ပေါင်းများစွာရဲ့ အိမ်များစွာကို ရောင်းစားခဲ့တယ်၊ ရရှီးဒ်က တာဝန်ခံဖြစ်ပေမယ့် ရွာသားတွေကို ခြိမ်းခြောက်ပြီး ငွေညှစ်နိုင်တဲ့ နည်းပညာအမျိုးမျိုးချပြပေးသူက လာလ်မျာ ဖြစ်လို့ ရတဲ့ငွေတွေကို ဝေစုခွဲတဲ့အခါမှာ လာလ်မျာ ကို ပိုပေးရတယ်။ လာလ်မျာက ရရှီးဒ်ရဲ့ ဦးလေး အရင်းလည်း ဖြစ်တယ်” ဟု အဆိုပါ ရွာသားကပြောပါသည်။ 


ကျော်စိုး
Rohingya Today
8.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်၊ ကျောက်ဖြူသားသေကံကျေးရွာ အုပ်ချုပ်ရေးမှူးသည် ထောက်ပံ့ကြေးများ ထုတ်ပေးခဲ့စဉ် အပြည့်အ၀ မပေးဘဲ ဖြတ်ယူမှုများ ပြုလုပ်ခဲ့သောကြောင့် အကျိုးခံစားခွင့်ရှိသူများက သက်ဆိုင်ရာသို့ တိုင်ကြားခဲ့သည်။

ဘူးသီးတောင် မြို့နယ်အထွေထွေအုပ်ချုပ်ရေးဦးစီးဌာနတွင် ၀န်ထမ်းများအားလုံးသည် ရခိုင်လူမျိုးများ ဖြစ်ကြပြီး ရိုဟင်ဂျာများကို အကြောင်းကိစ္စ အ၀၀တွင် နေ့စဉ်နှင့်အမျှ အနိုင်ကျင့်ခြင်း၊ ညှဉ်းပန်းနှိပ်စက်ခြင်း၊ ခြိမ်းခြောက်၍ ငွေညှစ်ခြင်းများ ပြုလုပ်လျက်ရှိသည်။ ကိုယ်ဝန်ဆောင်၊ နို့တိုက်မိခင် စသည်တို့အတွက် ချပေးလေ့ရှိသည့် ထောက်ပံ့ငွေများမှ ရိုဟင်ဂျာများအား ပေးရသည့် ထောက်ပံ့ငွေများကို ရုံးစာရေး၊ ကျေးရွာစာရေး၊ ကျေးရွာအုပ်ချုပ်ရေးမှူးတို့ ပူးပေါင်း၍ ခေါင်းပုံဖြတ်စားနေသည်နှင့် ပတ်သက်၍ ရိုဟင်ဂျာများက သက်ဆိုင်ရာသို့ တိုင်တန်းသော်လည်း အရေးယူခြင်း မပြုသည့်အပြင် ခေါ်ယူဆုံးမခြင်းပင် မရှိဟု ဒေသခံများက Rohingya Today သို့ပြောပါသည်။

ကျောက်ဖြူသားသေကံကျေးရွာ အုပ်ချုပ်ရေးမှူး ဦးမောင်ကေထွန်းသည် နိုဝင်ဘာလ (၁၇) ရက်နေ့က ကိုယ်ဝန်ဆောင်နှင့် နို့တိုက်မိခင် ၁၂၀ ဦးကျော်၏ ထောက်ပံ့ကြေးများကို အပြည့်အ၀ ထုတ်မပေးဘဲ တစ်ဦးလျှင် ငွေကျပ် ၄၀၀၀၀ မှ ၆၅၀၀၀ အထိသာ ထုတ်ပေးခဲ့သည်။ မဂျန္နတာရာ (ဘ) ဦးမိုဟမ္မဒ်အယုဘ် ကို စာရင်းရောက်ရှိခြင်း မရှိဟုဆိုကာ ငွေကျပ် ၁၀၀၀၀ သာ ထုတ်ပေး၍ ကျန်ငွေများကို ခေါင်းပုံဖြတ်စားခဲ့သည်။

အုပ်ချုပ်ရေးမှူး ဦးမောင်ကေထွန်းက ခေါင်းပုံဖြတ်စားနေခြင်းနှင့် ပတ်သက်၍ မဂျန္နတာရာ၊ မဟုဆိန်းနားရားဘေဂွမ် (ဘ) ဦးအဘူဘက္ကရ်ဆိဒ္ဒိက် (အသက် ၂၂ နှစ်)၊ မနူရ်ခိုက်ဒါ (ဘ) ဦးဆယိဒ်ဟုဆိန်း (အသက် ၂၃ နှစ်)၊ မအာယေရှား (ဘ) ဦးရှဖိအူလ္လာ (အသက် ၂၁ နှစ်) မဆားဂျိဒါး (ဘ) ဦးမိုဟမ္မဒ်ဆိဒ္ဒိက် (အသက် ၂၆ နှစ်)၊ မနူရ်ဘေဂွမ် (ဘ) ဦးမိုဟမ္မဒ်အာမီးန် (အသက် ၂၆ နှစ်)၊ မဆေးနိုးဝါရား (ဘ) ဦးအာဘူလ်ဘရှားရှိ (အသက် ၁၉ နှစ်) တို့ အပါအ၀င် အကျိုးခံစားခွင့်ရှိသူ ၅၀ ဦးခန့်က နိုဝင်ဘာလ (၂၁) ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာနသို့ တိုင်တန်းခဲ့သော်လည်း တိုင်တန်းခံရသူက ဒု-မြို့နယ်အုပ်ချုပ်ရေးမှူး၏ တူတော်စပ်သောကြောင့် အရေးယူဆောင်ရွက်ပေးခြင်း မရှိဟု ရွာသားတစ်ဦးက ပြောပါသည်။

မြို့နယ်အထွေထွေအုပ်ချုပ်ရေးဦးစီးဌာနက အရေးယူဆောင်ရွက်ခြင်း မပြုလုပ်သောကြောင့် တိုင်တန်းသူများက လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနနှင့် နိုင်ငံတော်အတိုင်ပင်ခံပုဂ္ဂိုလ်ရုံးသို့ တိုင်စာပို့ခဲ့ရာ အထက်လူကြီးများက တိုင်ကြားမှုနှင့် ပတ်သက်၍ စစ်ဆေးပြီးတင်ပြရန် ညွန်ကြားခဲ့ကြောင်း သိရသည်။

တိုင်တန်းသူများကို တွေ့ဆုံစစ်ဆေးမေးမြန်းရန် အတွက် မြို့နယ်အထွေထွေအုပ်ချုပ်ရေးဦးစီးဌာနသို့ ဒီဇင်ဘာလ (၇) ရက်နေ့ နံနက် ၁၀ နာရီ လာရောက်ရန် ချိန်းဆိုခဲ့ရာ ကိုယ်ဝန်ဆောင်နှင့် နို့တိုက်မိခင် ၄၀ ဦး ကျော်တို့ကို တွေ့ဆုံခြင်း မပြုလုပ်ခဲ့ပေ။ တစ်နေကုန် ထိုင်စောင့်ခိုင်းပြီးနောက် မနက်ဖြန်လာပါဟု ပြောဆိုသဖြင့် အချိန်လွန်သွားကြောင့် နေရပ်သို့ ပြန်မရဘဲ တည်းခိုးခန်း၌ ညအိပ်ခဲ့ရသည်။

ဒီဇင်ဘာလ (၈) ရက်နေ့တွင် အမျိုးသမီးအချို့ကို စစ်ဆေးမေးမြန်းခဲ့ကြောင်း သိရသည်။


အောင်မင်း
Rohingya Today
7.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်၊ သိမ်တောင်ပြင်ကျေးရွာအုပ်စုသို့ ရွာသားများကို ဆေးကုသပေးရန်ဟု ဆိုကာ အဖွဲ့တစ်ဖွဲ့ရောက်ရှိလာပြီး၊ လူ နှစ်ဦး သုံးဦးကို ဆေးကုသမှုပေးနေသည့် အနေအထားဖြင့် ကြည့်ရှုကာ ဓါတ်ပုံနှင့် ဗီဒီယိုမှတ်တမ်းများ ရိုက်ကူးပြီး ပြန်လည် ထွက်ခွာသွားခဲ့သည်။ 

ရန်ကုန်မြို့မှ ဆေးပါရဂူ ဆရာဝန်များအဖွဲ့တစ်ဖွဲ့သည် သိမ်တောင်ပြင် မွတ်စလင်ရွာသို့ မကြာခင်လာရောက်၍ ရွာသားများကို ဆေးကုသမှုပေးရန် ရှိကြောင်း၊ စာသင်ကျောင်းတစ်ကျောင်းတွင် ဆေးကုသမှုခံယူရန် လာရောက်ရမည်ဖြစ်ကြောင်း ကျေးရွာအုပ်ချုပ်ရေးမှူးရုံးမှ ရွာဆော်က ဒီဇင်ဘာလ (၃) ရက်နေ့ နံနက် ၈ နာရီအချိန်တွင် ကြေညာခဲ့သဖြင့် ဒေသခံရွာသားများက ဆရာဝန်များထံတွင် ဆေးကုသမှု ခံယူနိုင်မည် ဆိုသည့် မျှော်လင့်ချက်ဖြင့် ရွာသူရွာသား သုံးရာကျော်  စုဝေးခဲ့ကြသည်။ 

နံနက် ၁၁ နာရီအချိန်တွင် လူ ၅ ဦးခန့်ရှိသည့် အဖွဲ့တစ်ဖွဲ့ ရောက်ရှိလာပြီး တစ်ဦးက လူနာ ရွာသား နှစ်ဦး သုံးဦးကို ကြည့်ရှုစစ်ဆေးနေသည့် ဆရာဝန်အဖြစ် သရုပ်ဆောင်၍ ကျန်အပေါင်းအပါများက ဓါတ်ပုံ၊ ဗီဒီယိုမှတ်တမ်းများ ရိုက်ကူးပြီးနောက် ဆေးကုသမှု လုံးဝ မပေးဘဲ စောင့်ဆိုင်းနေသည့် ရွာသူရွာသားများကို ဆပ်ပြာတစ်တောင့်စီ ပေး၍ မွန်းတည့် ၁၂ နာရီအချိန်တွင် ပြန်လည် ထွက်ခွာသွားခဲ့ကြောင်း သိမ်တောင်ပြင် ရွာသားတစ်ဦးက Rohingya Today သို့ပြောသည်။ 

ဆယ်စုနှစ် (၃) ခုခန့် လွတ်လပ်စွာ သွားလာခွင့် ပိတ်ပင်ခံထားရပြီး ကာလကြာရှည်စွာ ကျန်းမာရေး စောင့်ရှောက်မှု ငတ်နေကြသည့် ရိုဟင်ဂျာများကို မဟုတ်မမှန် မျှော်လင့်ချက်ပေး၍ ၎င်းတို့၏ ဖြူစင်ရိုးသား အယုံလွယ်၊ မှီခိုအားထားတတ်မှုကို အသုံးချ အခွင့်ကောင်းယူပြီး လိမ်လည်ပြသနိုင်ရန် ဓါတ်ပုံနှင့် ဗီဒီယိုမှတ်တမ်းများ ယူသွင်းခြင်းသည် အလွန်ပင် စက်ဆုပ်ရွံရှာဖွယ်ကောင်းသော လူသားမဆန်သည့် လုပ်ရပ်ဖြစ်သည်ဟု ၎င်းက ဆက်လက်ပြောပါသည်။ 


ကျော်စိုး
Rohingya Today
6.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် မြို့နယ်အထွေထွေအုပ်ချုပ်ရေးဦးစီးဌာနမှ ကျေးရွာတာဝန်ကျ စာရေးများက ရိုဟင်ဂျာများ ပိုင်ဆိုင်သည့် လယ်ယာမြေများအတွက် မြေခွန်ပြေစာများ ရောင်းချရာတွင် ငွေအဆမတန် တောင်းခံခြင်းနှင့် အချို့ကျေးရွာအုပ်စုများတွင် ပြေစာများ လုံးဝ မရောင်းချဘဲ သိမ်းထားမှုများ ပြုလုပ်လျက်ရှိသဖြင့် ရိုဟင်ဂျာများသည် လယ်ယာမြေပိုင်ဆိုင်မှု အထောက်အထားမဲ့ ဖြစ်သွားရသည်။ 

ဘူးသီးတောင်မြို့နယ်တွင် နေထိုင်သည့် လူဦးရေ ၈၀% ကျော်သည် ရိုဟင်ဂျာလူမျိုးများ ဖြစ်ကြသော်လည်း မြို့နယ်အထွေထွေအုပ်ချုပ်ရေးဦးစီးဌာနက ကျေးရွာအဆင့် စာရေးများ ခန့်အပ်ရာတွင် ၉၀% ကျော်ကို ရခိုင်လူမျိုးများသာ ခန့်အပ်ထားသည်။ ရခိုင်လူမျိုး စာရေးများသည် ရိုဟင်ဂျာများအား မြေခွန်ပြေစာများ ရောင်းချရာတွင် တစ်ဧကလျှင် ၂၀၀၀ ကျပ်မှ ၅၀၀၀ ကျပ်အထိ တိုးမြှင့်ရောင်းချနေကြောင်း ဒေသခံများက Rohingya Today သို့ပြောပါသည်။ 

လယ်ယာမြေအသစ်ဝယ်ခြင်း၊ အမွေခွဲဝေခြင်း စသည့် နာမည်ပြောင်း၍ အသစ်ထွက်လာသော ပြေစာများကို သိမ်းထားပြီး တစ်စောင်ကို ငွေကျပ် ငါးသောင်းမှ တစ်သိန်း အထိ ညှစ်ယူ၍ ရောင်းချနေသည်ဟု ဒေသခံများက ဆိုသည်။ 

မြေစာရင်းဦးစီးဌာမှ ပြေစာတစ်စောင်လျှင် ၂၀ ကျပ်မှ ၈၀ ကျပ်ဖြင့်သာ ရောင်းချရန် သတ်မှတ်ထားသော်လည်း စာရေးများက တိုးမြှင့်၍ ရောင်းချနေသည်ကို မေးမြန်းပါက “မင်းတို့ ကုလားတွေ၊ ငါတို့ ပြောသလို နေရမယ်၊ မနေချင်ရင် နိုင်ငံထဲကနေ ထွက်သွား”  ဟု စော်ကား ဆဲဆိုခြင်းများ ပြုလုပ်လေ့ရှိသည်။

ဘူးသီးတောင်မြို့နယ်ရှိ ပြိုင်းတောင်၊ သိမ်တောင်ပြင်၊ ကျောက်ရန်၊ သပိတ်တောင်၊ ဂူတာပြင်၊ စိမ်းညှင်းပြား စသည့် ကျေးရွာအုပ်စု ၁၅ စုကျော်တွင် ငွေကြေးတိုးမြှင့်၍ ပြေစာများ ရောင်းချခဲ့သော်လည်း သေကံခွဆုံ၊ ကျောက်ဖြူသားသေကံ၊ ပြင်လှသိန်းတန်၊ ဆေးအိုးကျ၊ ၀ရကျွန်း၊ ကကျက်ဘက်၊ မြောင်းနား၊ အလယ်ချောင်း၊ ဖရုံချောင်း၊ ဖိုးခေါင်ချောင်း၊ ဘုရားပြင်အောင်ပ၊ အထက်ကျွဲကြိုမော်၊ ဒု-အိုးသည်မ စသည့် ရိုဟင်ဂျာကျေးရွာအုပ်စု ၅၀ စုကျော်တွင် ယခုအချိန်ထိ ပြေစာများ ရောင်းချခြင်း မရှိသေးကြောင်း သိရသည်။ 

မြေစာရင်းဦးစီးဌာနမှ ပြေစာများ ထုတ်ပေးလိုက်သည်မှာ ယခုဆိုလျှင် တစ်လကျော်သွားပြီ ဖြစ်သော်လည်း မြို့နယ်အထွေထွေအုပ်ချုပ်ရေးဦးစီးဌာနမှ ကျေးရွာအဆင့် တာဝန်ကျစာရေးများက ရိုဟင်ဂျာများအား မရောင်းချဘဲ သိမ်းထားခြင်းမှာ ရိုဟင်ဂျာများ၏ လယ်ယာမြေများ အထောက်အထားမဲ့ ဖြစ်အောင် ၎င်းတို့ အချင်းချင်း ဆွေးနွေးတိုင်ပင်၍ ယခုကဲ့သို့ တမင်လုပ်ဆောင်နေခြင်းဟု ဒေသခံများက သုံးသပ်နေကြသည်။

၂၀၁၇ ခုနှစ်တွင်လည်း များစွာသော ရိုဟင်ဂျာများကို မြေခွန်ပြေစာများ ထုတ်မပေးခဲ့ခြင်းကြောင်း အထောက်အထားမဲ့ ဖြစ်သွားခဲ့ရသည်။  


အောင်မင်း
Rohingya Today
5.12.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်၊ ကျောက်ဖြူသားသေကံ ကျေးရွာအုပ်စုမှ တဖက်နိုင်ငံရောက် ဒုက္ခသည်များ၏ အိမ်အလွတ်များကို ဖြိုဖျက်၍ လယ်ယာလုပ်ငန်းသုံး အဆောက်အဦများနှင့် အိမ်သုံးထင်းများ အဖြစ် အသုံးပြုလျက်ရှိသည်။ 

ကျောက်ဖြူသားသေကံကျေးရွအုပ်စု ဒါနိုမျာရွာမှ ဟာဖီးဇ် ဦးမိုဟမ္မဒ်တွာဟဲရ် (ဘ) ဦးအာမီးရ်ဟူစိန်း (အသက် ၄၀ နှစ်) ၏ နေအိမ်သို့ ကျေးရွာအုပ်ချုပ်ရေးမှူး ဦးမောင်ကေထွန်း (ခ) ယောဒူ က သား (၃) ဦးနှင့် အတူသွားရောက်၍ ကိုယ်တိုင်ဖြိုဖျက်ပြီး လှေဖြင့် သယ်ဆောင်သွားကာ ၎င်း၏ ခြံဝင်းအတွင်း နွားရုံ ဆောက်လုပ်ခဲ့သည်။ 

ထို့အပြင် သေကံရွာမှ ဦးရုစ်တုမ်အလီ (ဘ) ဦးအဗ်ဒူလ်မူနာဖ် (အသက် ၃၅ နှစ်)၊ ဦးအာဘူလ်ကာလာမ် (ဘ) ဦးနာဂူး (အသက် ၄၀ နှစ်) နှင့် ဦးအဘူဆယိဒ် (ဘ) ဦးလော်တူမျာ (အသက် ၅၅ နှစ်) တို့၏ နေအိမ်များကိုလည်း ဦးမောင်ကေထွန်းက ဖြိုဖျက်၍ ၎င်း၏ နေအိမ်သို့ ယူဆောင်သွားပြီး စပါးဂိုဒေါင်ကြီး တစ်လုံး ဆောက်လုပ်ပြီး၊ ကျန်ရှိသည့် သစ်သားများနှင့် ၀ါးများကို အိမ်သုံးထင်းအဖြစ် အသုံးပြုနေကြောင်း ဒေသခံများက Rohingya Today သို့ပြောပါသည်။

တဖက်နိုင်ငံရောက် ဒုက္ခသည်များ၏ အိမ်အလွတ်များကို ဖြိုဖျက်၍ သယ်ဆောင်သွားသည့် ဦးမောင်ကေထွန်းကို အိမ်များ ဖြိုဖျက်နေစဉ် ရွာသားများက တွေ့ရှိပြီး ဟန့်တားရန် ကြိုးစားခဲ့သော်လည်း ၎င်းက “မင်းတို့ ကုလားတွေ အေးဆေးနေ၊ မနေရင် အသတ်ခံရမယ်” ဟု ဆဲဆိုခြိမ်းခြောက်ခဲ့ကြောင်း သေကံရွာသားတစ်ဦးက ပြောသည်။ 

ကျေးရွာအုပ်ချုပ်ရေးမှူး ဦးမောင်ကေထွန်းသည် ဘူးသီးတောင်မြို့နယ် ဦးကျော်သာစည်ကျေးရွာအုပ်စုနေ မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ် ဒုတိယအုပ်ချုပ်ရေးမှူး ဦးသန်းရွှေနှင့် တူတော်စပ်သဖြင့် လုပ်ပိုင်ခွင့် အာဏာကို အလွဲသုံးစား လုပ်ပြီးတိုင်း “ကြိုက်တဲ့နေရာမှာ သွားတိုင်၊ ဂရုမစိုက်ဘူး” ဟု မကြာခဏပြောဆိုလေ့ရှိကြောင်း ဒါနိုမျာ ရွာသားတစ်ဦးက ပြောပါသည်။ 


Rohingya Exodus