နောက်ဆုံးသတင်း/ဆောင်းပါးများ

စစ်သားများကို နေ့စဉ် ကျွေးမွေး နေသူများကို အကြမ်းဖက်သမားများဟု စွပ်စွဲဖမ်းဆီးထား

RB News
8.11.2016

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ဖားဝပ်ချောင်း ကျေးရွာမှ စစ်သားများကို နေ့စဉ် ကျွေးမွေးနေသူနှစ်ဦးကို အကြမ်းဖက်သမားများဟု စွပ်စွဲ ဖမ်းဆီးထားကြောင်း သတင်းရရှိပါသည်။

နိုဝင်ဘာလ (၅) ရက်နေ့ နံနက် ၈း၃၀ နာရီ အချိန်တွင် ဖားဝပ်ချောင်း ကျေးရွာတွင် လုံခြုံရေး တာဝန်ယူထားသည့် စစ်သားများကို နံနက်စာ ကျွေးမွေးရန် သွားသည့် ဒေသခံနှစ်ဦးဖြစ်သည့် တာဟဲရ် (ဘ) ဦးဆာလ်အာမတ် (အသက် ၂၇ နှစ်) နှင့် ဦးဖိုယာစ်အာမတ် (ဘ) ဦးမိုဟာမတ်ရှော်ဘီ (အသက် ၄၃ နှစ်) တို့ကို အကြမ်းဖက်သမားများဟု စွပ်စွဲ၍ ဖမ်းဆီး ထားကြောင်း သိရှိရသည်။

“အဲဒီနှစ်ယောက်က စစ်သားတွေနဲ့ ရင်းနှီးနေသူတွေပါ။ သူတို့က စစ်သားတွေ စားဖို့ အကုန်စီစဉ်ပေးရတယ်။ အသား၊ ငါး၊ ဆိတ်ဆိုရင် အကောင်လိုက် ဖော်ပေးရတယ်။ အဲဒါကို ၅ ရက်နေ့ မနက်မှာ သူတို့ဆီမှာ သေနတ်ရှိတယ်ဆိုပြီး စွပ်စွဲပြီး ဖမ်းလိုက်တယ်။ ပြီးတော့ သူတို့ အိမ်တွေကို သွားစစ်တယ်။ ဘာတစ်ခုမှ မရဘူး။ စစ်တဲ့အချိန်မှာ အိမ်မှာတွေ့တဲ့ မော်လ၀ီ မူဘာရက်ခ် ကိုလည်း ဖမ်းသွားတယ်” ဟု ဒေသခံတစ်ဦးက RB News သို့ပြောသည်။

တာဟဲရ်၏ နေအိမ်ကို ရှာဖွေစဉ် ဖမ်းဆီးသွားသည့် တာဟဲရ်၏ အစ်ကိုဝမ်းကွဲ  ဖြစ်သူ မော်လ၀ီမူဘာရက်ခ် (ဘ) ဦးကော်ဘိရ်အာမတ် ကို စစ်သားများက စိတ်တိုင်းကျ ရိုက်နှက်ပြီးနောက် လမ်းဘေးတွင် ပစ်ထားခဲ့သည်။ မော်လ၀ီမူဘာရက်ခ်သည် ယခုအခါ မြောက်ရွာတွင် ဆေးကုသမှု ခံယူလျက် ရှိသည်။

ဖမ်းဆီးခံရသူ နှစ်ဦးစလုံးသည် မည်သည့် အကြမ်းဖက်မှုနှင့်မှ ဆက်နွယ်နေသူများ မဟုတ်ဘဲ၊ ၎င်းတို့၏ ဆွေမျိုးအားလုံးကို အမြဲတစေ တိုက်ခိုက်နေသူတစ်ဦး ဖြစ်သည့် ဦးကာမာလ်ဟူဆောင်း၏ မဟုတ်မမှန် သတင်းပေးမှုကြောင့်သာ ဖြစ်နိုင်သည်ဟု ဒေသခံများက သုံးသပ်နေကြသည်။ ဦးကာမာလ်ဟူဆောင်းသည် ဖားဝပ်ချောင်း ကျေးရွာ အုပ်ချုပ်ရေးမှူးဟောင်း ဖြစ်ပြီး၊ လူသတ်မှု (၃) ခု ကျူးလွန်ထားသူလည်း ဖြစ်သည်။အာဏာပိုင်များက ၎င်း၏ ရာဇ၀တ်မှုများကို သိရှိသွားသောကြောင့် ဘင်္ဂလားဒေ့ရ်ှနိုင်ငံသို့ ထွက်ပြေးနေသူ ဖြစ်သည်ဟု ဆိုသည်။ ၎င်းသည် တောင်ပြိုလက်ဝဲမြို့ရှိ အာဏာပိုင်များ၏ အလိုတော်ရိ တစ်ဦးထံမှ တဆင့် မဟုတ်မမှန် သတင်းပို့ခဲ့ခြင်း ဖြစ်သည်ဟု ဒေသခံများက ပြောပါသည်။ ထို့အပြင် ဦးမိုဟာမတ်ရှော်ဘီနှင့် သားဖြစ်သူ ဦးအီဒိရီစ် တို့နှင့် ပတ်သက်၍လည်း မဟုတ်မမှန် သတင်းများ ပေးပို့ထားသဖြင့် သားအဖနှစ်ဦး၏ နေအိမ်ကို စစ်သားများက နေ့စဉ်ရှာဖွေလျက် ရှိကြောင်း သိရှိရသည်။

အုပ်ချုပ်ရေးမှူးဟောင်း ဦးကာမာလ်ဟူဆောင်းသည် ဖားဝပ်ချောင်း အုပ်ချုပ်ရေးမှူး ဦးကော်ဘိရ်အာမတ်၊ ဦးဆာလ်အာမတ်နှင့် ဦးမိုဟာမတ်ဖာရုခ် တို့ကို သတ်သည့် အမှုများတွင် တိုက်ရိုက် ပါဝင်သူဟု ဒေသခံများက ပြောပါသည်။

ဒေသခံများက မဟုတ်မမှန် ရရှိသည့် သတင်းများကို အတည်ယူ၍ ဖမ်းဆီးပြီး ရိုက်နှက် ညှဉ်းပန်းနှိပ်စက်နေခြင်းများ မပြုလုပ်ဘဲ အပြစ်မဲ့များကို ပြန်လည် လွှတ်ပေးရန် တောင်းဆိုသည်ဟု ပြောပါသည်။


Comment ရေးရန်

Rohingya Exodus