ကျားခေါင်းတောင် ရဲကင်းမှ ဒုရဲအုပ် အောင်အောင်က ရွာသားများကို နည်းမျိုးစုံဖြင့် ညှဉ်းပန်း နှိပ်စက်နေ
Sindi Khan
RB News
22.4.2014
မောင်တော ။ ။ ရခိုင်ပြည်နယ်၊ မောင်တောမြို့နယ်၊ ကျားခေါင်းတောင် ကျေးရွာအုပ်စု အခြေစိုက် ရဲကင်း စခန်းမှ ဒုရဲအုပ် အောင်အောင်သည် ဒေသခံ ရိုဟင်ဂျာများကို နေ့စဉ်နှင့် အမျှ နည်းမျိုးဖြင့် ညှဉ်းပန်း နှိပ်စက်လျက် ရှိကြောင်း သတင်း ရရှိပါသည်။
ဧပြီလ (၁၈) ရက်နေ့ နံနက် ၁၁း၃၀ နာရီ အချိန်တွင် မောင်တောမြို့နယ် မြောက်ပိုင်း ကျားခေါင်းတောင် ကျေးရွာမှ ဦးမော်တော်လောဖ် (ဘ) ဦးအဒူဇော်လိလ်သည် အမဲသား ရောင်းရန် အတွက် နွားတစ်ကောင် လှီးဖြတ်ခဲ့ရာ ရဲကင်းစခန်းမှ ဒုရဲအုပ်အောင်အောင် ရောက်ရှိလာပြီး အမဲသား တစ်ပိဿာ ယူခဲ့သည်။ အမဲသား ရောင်းသူ ဦးမော်တော်လော်ဖ်က အမဲသား တစ်ပိဿာ၏ တန်ဖိုးကို တောင်းရာ ဒုရဲအုပ်အောင်အောင်က သေနတ်ကို ပြ၍ ပစ်သတ်မည်ဟူသည့် အမူအရာဖြင့် ခြိမ်းခြောက်၍ ငွေမပေးဘဲ ယူသွားခဲ့ကြောင်း ဒေသခံ တစ်ဦးက RB News သို့ပြောပါသည်။
ဧပြီလ (၁၉) ရက်နေ့ ည ၇း၃၀ နာရီတွင် ကျားခေါင်းတောင် ကျေးရွာမှ ရွာသား အချို့သည် ဆိုင်ခန်းများရှေ့တွင် အပျင်းပြေ ထိုင်စကား ပြောနေစဉ် ဒုရဲအုပ်အောင်အောင် ရောက်လာသဖြင့် အကြောင်းမဲ့ ဖမ်းဆီး၍ ငွေညှစ်မည်ကို စိုးရိမ်၍ ထွက်သွား ခဲ့ကြသည်။ ထိုသို့ ထွက်သွားပြီးနောက် ဒုရဲအုပ် အောင်အောင်က နောက်မှ လေးခွဖြင့် ပစ်သဖြင့် ရွာသား နှစ်ဦး ဒဏ်ရာ ရရှိခဲ့သည်။ ကိုကော်ရီမုလ္လာ (ဘ) ဦးဆယာဒုလ္လာ (အသက် ၂၄ နှစ်) ၏ နောက်ကျောကို ထိမှန်၍ ပေါက်ပြဲသွား ခဲ့ပြီး၊ ကိုဂျော်နော်ဒ်အုလ္လာ (ဘ) ဦးအာမိရ်ဟူဆောင်း (အသက် ၂၇ နှစ်) ၏ ခြေထောက်ကို ထိမှန်၍ ပေါက်ပြဲသွား ခဲ့ကြောင်း ဒေသခံ တစ်ဦးက RB News သို့ပြောပါသည်။
ဒုရဲအုပ်အောင်အောင်သည် ဧပြီလ ၁၆ ရက်နေ့က မောင်တောမြို့နယ် မြောက်ပိုင်း ပွင့်ဖြူချောင်း ကျေးရွာသို့ သွားရောက်၍ ကျေးရွာ အုပ်ချုပ်ရေးမှူး ဦးနူရ်ဟာရှိမ်ကို ကျေးရွာ၏ အခြေအနေများ မေးမြန်းခဲ့သည်။ ဒုရဲအုပ်အောင်အောင်သည် ပွင့်ဖြူချောင်း ကျေးရွာတွင် ဖြစ်ပွားသည့် ပြဿနာများကို ပူးပေါင်း၍ ဖြေရှင်းရန် အမိန့်ပေးရာ၊ အုပ်ချုပ်ရေးမှူးက ၎င်း၏ ကျေးရွာတွင် သေးငယ် ပြဿနာများသာ ရှိသည့်အတွက် ပူးပေါင်း ဖြေရှင်းရမည့် ပြဿနာမျိုး မဟုတ်ကြောင်း ပြောဆိုခဲ့သည်။ ထို့နောက် ဒုရဲအုပ်အောင်အောင်က ကျေးရွာ အုပ်ချုပ်ရေးမှူးကို သေနတ်ကိုင်ခိုင်း စေခြင်း၊ ဓါးများကိုင်ခိုင်း စေခြင်းများ ပြုလုပ်ပြီး စိတ်အနှောက်အယှက် ပေးခဲ့သည်။ အုပ်ချုပ်ရေးမှူးက မိမိအနေဖြင့် သေနတ်ကိုင်ရမည့်သူ မဟုတ်ကြောင်း ပြောဆိုသောအခါ လက်ထိပ်ကို ပြ၍ ခြိမ်းခြောက် ခဲ့ကြောင်း ဒေသခံ တစ်ဦးက RB News သို့ပြောပါသည်။
ဒုရဲအုပ်အောင်အောင်သည် ကျားခေါင်းတောင် ကျေးရွာတွင် အခြေစိုက်ပြီး အနီးပတ်ဝန်းကျင်ရှိ ရွာများမှ ဒေသခံ ရိုဟင်ဂျာ များကို နည်းလမ်းမျိုးစုံဖြင့် ညှဉ်းပန်း နှိပ်စက် ငွေညှစ်မှုများကို ထိုကျေးရွာသို့ ပြောင်းရွှေ့လာသည့် နေ့မှစ၍ အဆက်မပြတ် ပြုလုပ်လျက် ရှိကြောင်း ဒေသခံများက ပြောပါသည်။
