အမေရိကန် နိုင်ငံခြားရေး ၀န်ကြီး၏ ရာမ်ဒွါန် ၀ါဖြေပွဲသို့ ဒေါက်တာ ၀ါကာအူဒင် တက်ရောက်

RB News

27.7.2013

ဝါရှင်တန် ။ ။ ဇူလိုင်လ (၂၄) ရက်နေ့က အမေရိကန် နိုင်ငံခြားရေး ၀န်ကြီး မစ္စတာ ဂျွန်ကယ်ရီမှ မွတ်စလင် ခေါင်းဆောင်များ၊ အမေရိကန် ကွန်ဂရက် လွှတ်တော် အမတ်များ၊ သံတမန်များကို ၀ါဖြေပွဲဖြင့် တည်ခင်း ဧည့်ခံခဲ့သည်။ အဆိုပါ ၀ါဖြေပွဲသို့ ဖိတ်ကြား ခံရသူ များတွင် အာရ်ကာန် ရိုဟင်ဂျာ အစည်းအရုံး ညွှန်ကြားရေးမှူးချုပ် ဒေါက်တာ ၀ါကာအူဒင်လည်း တစ်ဦး အပါအ၀င် ဖြစ်သည်။ 

အမေရိကန် နိုင်ငံခြားရေး ၀န်ကြီး မစ္စတာ ဂျွန်ကယ်ရီက “အစ္စလာမို အလိုင်ကွမ်း၊ ရာမ်ဒွါန် ကရီးမ်” ဟု နှုတ်ဆက်၍ မိန့်ခွန်း ပြောကြား ခဲ့သည်။

ဧည့်ခံပွဲ ပြီးနောက်တွင် မစ္စတာ ဂျွန်ကယ်ရီမှ ဧည့်သည် အချို့ဖြင့် စကားပြောဆိုရာတွင် ဒေါက်တာ ၀ါကာအူဒင်မှ ရိုဟင်ဂျာ အရေး ကိစ္စနှင့် ပတ်သက်၍ ဆွေးနွေးရန် အခွင့်အရေး ရခဲ့သည်။ “မစ္စတာ ဂျွန်ကယ်ရီက တန်းပြီး အာရ်ကာန် ရိုဟင်ဂျာ အစည်းအရုံး ARU အကြောင်းနဲ့ မြန်မာ ရိုဟင်ဂျာ အသင်း (မြောက်အမေရိက) BRANA အကြောင်း မေးတော့ ကျွန်တော် တော်တော်လေး အံ့သြ မိတယ်” ဟု ဒေါက်တာ ၀ါကာအူဒင်မှ RB News သို့ပြောပါသည်။ 

“BRANA ကိုတော့ လွန်ခဲ့တဲ့နှစ် တွေထဲက မစ္စတာ ဂျွန်ကယ်ရီ နိုင်ငံခြား ဆက်ဆံရေး ကော်မတီ ဥက္ကဌ လုပ်ကတည်းက သိနေ ခဲ့တယ်။ အခုတော့ ARU ကိုပါ သိနေပါပြီ၊ ကျွန်တော်တို့ နိုင်ငံတကာ အဆင့် လုပ်နေတာ တွေကို မစ္စတာ ကယ်ရီက သိနေ ပါတယ်” ဟု ဒေါက်တာ အူဒင်မှ ပြောသည်။ 

မစ္စတာကယ်ရီက မြန်မာ နိုင်ငံ ပြုပြင် ပြောင်းလဲရေး၏ အရေးကြီးပုံနှင့် တိုင်းရင်းသား ပေါင်းစုံ ချစ်ကြည် ရင်းနှီး ငြိမ်းချမ်းစွာ နေထိုင် နိုင်ရေး တို့အတွက် ပြုလုပ် ရမည့် အရေးတို့ကို ပြောကြား ပြီးနောက်၊ အမေ ရိကန် အစိုးရ အနေဖြင့် ရိုဟင်ဂျာ အရေးကို အလေးထား ကူညီ သွားမည်ဟု ပြောကြား ခဲ့ကြောင်း သိရှိ ရပါသည်။ ဒေါက်တာ အူဒင်မှ အမေရိကန် အစိုးရ၏ ရိုဟင်ဂျာ အရေး အတွက် ထောက်ခံ အားပေးမှု များကို ကျေးဇူးတင်ကြောင်း ပြန်လည် ပြောကြား ခဲ့သည်။

ထို့နောက် ကွန်ဂရက် လွှတ်တော် အမတ်များ ဖြစ်သော မစ္စတာ အန်ဒရေ ကာဆန်၊ မစ္စတာ ကိတ်အီ လီ ဆန် အပါအ၀င် အခြားသော လွှတ်တော် အမတ်များ၊ သံတမန်များ၊ OIC ဆိုင်ရာ အမေရိကန် အထူး ကိုယ်စားလှယ် မစ္စတာ ရရှဲသ် ဟူစိန်း၊ ကုလသမဂ္ဂ ဆိုင်ရာ OIC သံအမတ်ကြီး မစ္စတာ အူဖူခ် ဂိုခ်ဆန်၊ Al Jazeera America မှ မစ္စတာ အလီဗေလ်ရှီ တို့နှင့် ရိုဟင်ဂျာ အရေး ကိစ္စ များကို ဒေါက်တာ အူဒင် မှ ဆွေးနွေး ခဲ့ကြောင်း သတင်း ရရှိပါသည်။