နောက်ဆုံးသတင်း/ဆောင်းပါးများ

ဘူးသီးတောင် မောင်ကြီးတောင် ကျေးရွာတွင် စစ်တပ်နှင့် နယ်ခြားစောင့်ရဲတပ်ဖွဲ့ တို့က လက်နက် ရှာဖွေသည်ဟု ဆိုကာ ဒေသခံရွာသားများကို ညှဉ်းပန်းနှိပ်စက်လျက်ရှိ

RB News
4.12.2017

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်၊ မောင်ကြီးတောင် ကျေးရွာသို့ စစ်တပ်နှင့် နယ်ခြားစောင့်ရဲတပ်ဖွဲ့ တို့ရောက်ရှိလာပြီး လက်နက် ရှာဖွေသည်ဟု ဆိုကာ ဒေသခံရွာသားများကို ရိုက်နှက် ညှဉ်းပန်းနှိပ်စက်လျက် ရှိကြောင်း သတင်းရရှိပါသည်။

ယနေ့ ဇန်န၀ါရီလ (၄) ရက်နေ့ နံနက် ၂ နာရီ အချိန်တွင် ဘူးသီးတောင်မြို့နယ် မောင်ကြီးတောင် ကျေးရွာအုပ်စု၊ မောင်ကြီးတောင် ကျေးရွာသို့ ဘူးသီးတောင်မြို့နယ် အခြေစိုက် ခမရ (၅၆၄) မှ စစ်သားများနှင့် ဖောင်တော်ပြင် ကျေးရွာ အခြေစိုက် နယ်ခြားစောင့်ရဲတပ်ဖွဲ့မှ နယ်ခြားစောင့်ရဲများက ၀ိုင်းရံထားခဲ့ပြီး၊ နံနက် မိုးလင်းသည့် အချိန်တွင် တစ်အိမ်မှ တစ်ဦးစီ စာသင်ကျောင်းသို့ လာရောက်ရန် အသံချဲ့စက်ဖြင့် အော်၍ ကြေညာခဲ့သည်။ ဒေသခံရွာသား အချို့က စာသင်ကျောင်းသို့ သွားရောက်ခဲ့သော်လည်း အချို့မှာ ရိုက်နှက် ညှဉ်းပန်း နှိပ်စက်ခံရမည်ကို စိုးရိမ်၍ မသွားကြကြောင်း၊ အချို့မှာ ရွာမှ ထွက်ပြေး တိမ်းရှောင်လျက် ရှိကြောင်း ဒေသခံတစ်ဦးက RB News သို့ပြောသည်။

နံနက် (၄) နာရီ အချိန်တွင် ဦးမာမတ်အာယုဖ်၏ သားသမီးများ ဖြစ်ကြသည့် နော်မာန်၊ အာရ်မာန်နှင့် ကော်ဆေရာ တို့ မောင်နှမ (၃) ဦးကို လုံခြုံရေး တပ်ဖွဲ့ဝင်များက ဖမ်းဆီး ခေါ်ဆောင်သွားပြီး၊ ယခုအချိန်ထိ မည်သည့် နေရာသို့ ခေါ်ဆောင်သွားသည်ကို မသိရှိရသေးဟု အဆိုပါ ဒေသခံက ပြောပါသည်။

စာသင်ကျောင်းသို့ သွားရောက်သူများကို နယ်ခြားစောင့်ရဲများနှင့် စစ်သားများက ရိုက်နှက် ညှဉ်းပန်းနှိပ်စက်လျက် ရှိပြီး၊ လူငယ် ပညာတတ်တစ်ဦး ဖြစ်သည့် ဦးမာမတ်ဒုလ္လာ (ဘ) ဦးမာမတ်အာမီးန်နှင့် ရ.ယ.က ဥက္ကဌ ဟောင်း ဦးအလီအာမတ် တို့ကို လူမဆန်စွာ ရိုက်နှက် နှိပ်စက်မှုကြောင့် အခြေအနေ အလွန် ဆိုးရွားလျက် ရှိကြောင်း သိရှိရသည်။

လွန်ခဲ့သည့် ၂၀၁၆ ခုနှစ် ဒီဇင်ဘာလ (၃၁) ရက်နေ့တွင် ရဲတပ်ဖွဲ့ဝင်များက ရိုဟင်ဂျာရွာသားများကို ရိုက်နှက် ညှဉ်းပန်းနှိပ်စက်နေသည့် ဗီဒီယိုတစ်ခု လှုမှုကွန်ယက်ပေါ်တွင် ထွက်ပေါ်လာပြီးနောက် သမ္မတရုံးမှ ပြောရေးဆိုခွင့်ရှိသူ ဦးဇော်ဌေးက လက်နက်ကိုင် တပ်ဖွဲ့များကို ဥပဒေနှင့် အညီ စစ်ဆေးရန်၊ လူ့အခွင့်အရေး မချိုးဖောက်ရန် မှာကြားထားသည်ဟု ပြောဆိုခဲ့သော်လည်း ဗီဒီယိုထဲတွင် မြင်ရသည့် အခြေအနေ အတိုင်း ဆက်လက်၍ ဖြစ်ပွားလျက် ရှိသည်။

မောင်ကြီးတောင် ကျေးရွာသို့ စစ်တပ်နှင့် နယ်ခြားစောင့်ရဲတပ်ဖွဲ့တို့ ရောက်ရှိလာပြီး၊ လက်နက် ရှာဖွေသည်ဟု အကြောင်းပြ၍ ဒေသခံများကို ရိုက်နှက် ညှဉ်းပန်းနှိပ်စက်လျက်ရှိပြီး၊ လက်လုပ်သေနတ်များ မိသည်ဟု ဆိုကာ လုပ်ကြံ ဓါတ်ပုံများဖြင့် စစ်တပ်ဘက်လိုက် မြန်မာမီဒီယာများကို အသုံးချ၍ ၀ါဒဖြန့်နေသည်များကိုလည်း တွေ့ရှိရသည်။

နောက်ဆက်တွဲ သတင်းများအရ နိုင်ငံတော် အတိုင်ပင်ခံရုံး သတင်းထုတ်ပြန်ရေး ကော်မတီက လက်လုပ်သေနတ် (၁၄) လက်ကို ဦးမာမတ်ဒုလ္လာ၏ ကွမ်းခြံမှ ရရှိခဲ့ကြောင်း၊ ဦးမာမတ်ဒုလ္လာနှင့် အတူ လေးဦးကို ဖမ်းဆီး ထားကြောင်း သတင်းထုတ်ပြန်ထားသည်။

ဦးမာမတ်ဒုလ္လာသည် လူငယ်ပညာတတ်တစ်ဦး ဖြစ်ပြီး၊ ၎င်း၏ ဖခင်ကို ရဲနှင့် စစ်သားများက စာသင်ကျောင်းတွင် ရိုက်နှက်နှိပ်စက်နေစဉ် ၎င်းက ဖခင်ကို မရိုက်နှက်ရန်၊ ဖခင်ကို ရိုက်နှက်မည့် အစား ၎င်းကိုသာ ရိုက်နှက်ရန်ဟု ပြောဆိုပြီး ရိုက်နှက်ခံခဲ့ခြင်း ဖြစ်ပြီး၊ ၎င်းနှင့် အတူ ဖမ်းဆီးခံရသူများမှာ မည်သည့် စစ်သင်တန်းမှ တက်ရောက်ခဲ့သူများ မဟုတ်ကြောင်း၊ လက်လုပ်သေနတ်များ မိသည်ဆိုသည်မှာလည်း လုပ်ကြံမှုသာ ဖြစ်ကြောင်း၊ ဦးမာမတ်ဒုလ္လာသည် ခေတ်ပညာတတ်တစ်ဦးပီပီ အေးချမ်းစွာ နေထိုင်သူဖြစ်သည်ဟု ဒေသခံများက ပြောပါသည်။



Comment ရေးရန်

Rohingya Exodus