ဖုရားပြင်အောင်ပ ကျေးရွာ အုပ်ချုပ်ရေးမှူး ဦးမောင်ချမ်းသာက ဒေသခံ တစ်ဦးထံမှ ငွေညှစ်

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် တောင်ပိုင်း၊ ဖုရားပြင်အောင်ပ ကျေးရွာအုပ်စု အကွက် (၁) မှ ဦးမာမတ်နူရ် (ဘ) ဦးမာဒီးက ၎င်းပိုင် ခြံထဲတွင် စိုက်ထားသော ဟင်းခင်းကို ဆိတ်၊ နွား၊ ကြက်၊ ဘဲများက ဖျက်ဆီး နေသဖြင့် ဟင်းခင်းကို ပိုက်ဟောင်းဖြင့် ကာရံထားသည်။ ဒီဇင်ဘာလ (၁၅) ရက်နေ့တွင် ဦးအီဆုပ် (ဘ) ဦးအေရှားဒူလ္လာ၏ ကြက်တစ်ကောင်သည် ဟင်းခင်း၌ ကာရံထားသော ပိုက်၌ မိပြီး သေဆုံးခဲ့သည်။ သို့ဖြစ်၍ ကြက်ပိုင်ရှင် ဦးအီဆုပ်က ရာအိမ်မှူး ဦးဘာဆာမျာကို တိုင်တန်းခဲ့သဖြင့် ရာအိမ်မှူးက နှစ်ဦးနှစ်ဖက် ပြေလည်အောင် ဖြေရှင်းပေးခဲ့သည်ကို နှစ်ဦးနှစ်ဖက်က ကျေနပ်စွာ လက်ခံခဲ့ကြ၍ ပြဿနာ ပြေလည် သွားခဲ့သည်။ 

သို့သော်လည်း အဆိုပါ ပြဿနာကို ကျေးရွာ အုပ်ချုပ်ရေးမှူး ဦးမောင်ချမ်းသာက ဦးမာမတ်နူရ်ကို ဒီဇင်ဘာလ (၁၆) ရက်နေ့တွင် ဆင့်ခေါ်၍ အမျိုးမျိုး ခြိမ်းခြောက်ကာ ငွေကျပ် တစ်သိန်း နှစ်သောင်း ညှစ်ယူခဲ့ကြောင်း ဒေသခံ တစ်ဦးက RB News သို့ပြောပါသည်။ ရရှိသည့် ငွေကျပ် တစ်သိန်းနှစ်သောင်းမှ ကြက်ပိုင်ရှင် ဦးအီဆုဖ်ကို ငွေကျပ် နှစ်သောင်းပေး၍ ကျန်သည့် ငွေကျပ် တစ်သိန်းကို အုပ်ချုပ်ရေးမှူး ဦးမောင်ချမ်းသာက ယူခဲ့ကြောင်း သိရသည်။ 

ဆက်လက်၍ အုပ်ချုပ်ရေးမှူး ဦးမောင်ချမ်းသာက မကြာခင် ၂၀၁၆ တွင် ရွေးကောက်ပွဲ အနိုင်ရ NLD ပါတီက အာဏာလွဲယူမည် ဖြစ်ကြောင်း၊ NLD အာဏာ လွဲယူသည်နှင့် အစိုးရသစ် ဖွဲ့စည်းသွားမည် ဖြစ်ကြောင်း၊ အစိုးရသစ် ဖွဲ့စည်းရာတွင် ကျေးရွာ အုပ်ချုပ်ရေးမှူး များပါ အသစ်ခန့် သွားမှာ ဖြစ်ကြောင်း၊ သို့ဖြစ်၍ ရှိသမျှ အချိန်တွင် ရရာ နည်းလမ်းဖြင့် ငွေရှာယူရမည် ဖြစ်ကြောင်း ယုတ်မာစွာ ပြောဆိုခဲ့ကြောင်း ဒေသခံများက ပြောပါသည်။