ရသေ့တောင် အနောက်ပြင် အုပ်ချုပ်ရေးမှူးနှင့် ကင်းစခန်းမှူးတို့ ပူးပေါင်း၍ ဒေသခံများထံမှ ငွေညှစ်

RB News

15.5.2017

ရသေ့တောင် ။ ။ ရခိုင်ပြည်နယ်၊ ရသေ့တောင်မြို့နယ် အနောက်ပြင် ကျေးရွာအုပ်စု အုပ်ချုပ်ရေးမှူးသည် ကူတောင် နယ်ခြားစောင့်ရဲတပ်ဖွဲ့မှ ကင်းစန်းမှူးနှင့် ပူးပေါင်း၍ ဒေသခံရွာသားများထံမှ ငွေညှစ်လျက် ရှိကြောင်း သတင်းရရှိပါသည်။ 

ရသေ့တောင်မြို့နယ် အနောက်ပြင် ကျေးရွာအုပ်စု အုပ်ချုပ်ရေးမှူး ဦးမောင်မောင်သည် ကူတောင် အခြေစိုက် နယ်ခြားစောင့်ရဲတပ်ဖွဲ့မှ ကင်းစခန်းမှူးနှင့် ပူးပေါင်း၍ ဒေသခံရွာသားများကို အပြစ်မရှိ အပြစ်ရှာ၍ နည်းမျိုးစုံဖြင့် ခြိမ်းခြောက်၍ ငွေညှစ်လျက် ရှိကြောင်း ဒေသခံများက RB News သို့ပြောပါသည်။

အနောက်ပြင်ကျေးရွာ အုပ်ချုပ်ရေးမှူး ဦးမောင်မောင်နှင့် ကင်းစခန်းမှူးတို့သည် မေလ (၇) ရက်နေ့တွင် ဆရာဦးဆုလ်တာန် (ဘ) ဦးနူရ်အစ္စလာမ်က ၎င်း၏ ဖခင်ဖြစ်သူကို စစ်တွေသို့ ဆေးကုသရန် ခေါ်သွားခဲ့မှုနှင့် ပတ်သက်၍ အမျိုးမျိုး ခြိမ်းခြောက်ပြီး ငွေကျပ် ၄ သောင်း ညှစ်ယူခဲ့သည်။ ထို့အပြင် ဥက္ကဌဟောင်း ဦးအီဆုပ်၏ ညီဖြစ်သူ ဦးအဒူရာမာန်အား လယ်ဝယ်ယူထားမှုနဲ့ ပတ်သက်ပြီး ပုဒ်မ အမျိုးမျိုးတပ် ခြိမ်းခြောက်၍ ငွေကျပ် တစ်သိန်းရှစ်သောင်း၊ အချင်းချင်း စကားများခဲ့သည့် အမျိုးသမီးနှစ်ဦးကို ခြိမ်းခြောက်၍ ငွေကျပ် ၄ သိန်း၊ ဦးအာမီးရ်ဟမ်ဇား ထံမှ ငွေကျပ် ၂၅ သိန်းတန် မြေကွက်တစ်ကွက်တို့ကို ညှစ်ယူထားကြောင်း ဒေသခံများ၏ ပြောကြားချက်များအရ သိရှိရသည်။

ယခုကဲ့သို့ မတရားသဖြင့် ငွေညှစ်နေခြင်း၊ ကင်းစခန်းမှူး၏ သြဇာအာဏာကို အလွဲသုံးစား ပြုလုပ်၍ ဓါးပြများသဖွယ် ပြုလုပ်နေခြင်းတို့ကို အထက်အာဏာပိုင်များက အရေးယူဆောင်ရွက် ပေးရန် တောင်းဆိုသည်ဟု ဒေသခံများက ပြောပါသည်။