Geroge Soros နှင့် ရိုဟင်ဂျာ ကိုယ်စားလှယ် အဖွဲ့ ရန်ကုန်မြို့တွင် တွေ့ဆုံ
7.1.2015
ရန်ကုန် ။ ။ အမေရိကန် ပြည်ထောင်စုမှ ဘီလီယံနာ သူဌေးကြီး၊ Open Society Foundation တည်ထောင်သူ Mr. George Soros နှင့် အဖွဲ့သည် ဇန်န၀ါရီလ (၆) ရက်နေ့ ည ၇ နာရီ အချိန်တွင် ရိုဟင်ဂျာ ကိုယ်စားလှယ် များနှင့် ရန်ကုန်မြို့ရှိ Chatrium Hotel တွင် တွေ့ဆုံ ဆွေးနွေး ခဲ့ကြောင်း သတင်း ရရှိပါသည်။
တွေ့ဆုံ ဆွေးနွေးပွဲသို့ Open Society Foundation တည်ထောင်သူ Mr. George Soros နှင့်အတူ ဥက္ကဌ ဖြစ်သူ Mr. Christopher Stone လည်းတက်ရောက် ခဲ့ပြီး၊ ရိုဟင်ဂျာ ကိုယ်စားလှယ်များ အဖြစ် ရခိုင်ပြည်နယ် ဘူးသီးတောင် မြို့နယ်မှ ပြည်သူ့ လွှတ်တော် ကိုယ်စားလှယ် ဦးရွှေမောင်၊ ဒီမိုကရေစီနှင့် လူ့အခွင့်အရေး ပါတီ ဥက္ကဌ၊ ၁၉၉၀ ခုနှစ် ရွေးချယ်ခံ လွှတ်တော် အမတ်ဟောင်း၊ စီအာရ်ပီပီ အဖွဲ့ဝင်ဟောင်း ဦးကျော်မင်း၊ စစ်တွေမြို့မှ ရိုဟင်ဂျာများ လူ့အခွင့်အရေး ကာကွယ်သူ ဦးကျော်လှအောင်နှင့် အမျိုးသမီးများ ငြိမ်းချမ်းရေး ကွန်ယက် (အာရ်ကာန်) မှ ဒါရိုက်တာ ဒေါ်ဝေေ၀နုတို့ တက်ရောက်ခဲ့ကြောင်း သိရသည်။
ရခိုင်ပြည်နယ်တွင် ရခိုင်လူမျိုးနှင့် ရိုဟင်ဂျာ လူမျိုး အသိုင်းအ၀ိုင်း နှစ်ခု ငြိမ်းချမ်းစွာ ပြန်လည် အတူ ယှဉ်တွဲ နေထိုင်နိုင်ရေး အခြေအနေများ၊ အကြမ်းဖက်မှုများနှင့် ပတ်သက်သည့် အတွေ့အကြုံများ၊ တရား ဥပဒေ စိုးမိုးမှု၊ ၁၉၈၂ ခုနှစ် နိုင်ငံသား ဥပဒေ၊ ရိုဟင်ဂျာများ နိုင်ငံသား ဖြစ်ခွင့် ရရေး အတွက် ဖြစ်ပေါ်နေသည့် စိန်ခေါ်မှုများ၊ အိုးအိမ်မဲ့ ဖြစ်နေသည့် နှစ်ဖက် အသိုင်းအ၀ိုင်းမှ ဒုက္ခသည်များ အခြေအနေ၊ ငြိမ်းချမ်းရေးနှင့် ဖွံ့ဖြိုးရေး ကိစ္စရပ်များ၊ ကျောင်းသားများ အတွက် ပညာသင်ဆုမျာနှင့် ပတ်သက်သည် များကို ဆွေးနွေးခဲ့ကြောင်း ပြည်သူ့ လွှတ်တော် ကိုယ်စားလှယ် ဦးရွှေမောင်၏ လူမှုကွန်ယက် စာမျက်နှာတွင် ရေးသား ဖော်ပြထားသည်။
ရခိုင်ပြည်နယ်တွင် ဘင်္ဂလားဒေ့ရှ် နိုင်ငံမှ တရားမ၀င် လာရောက်၍ အခြေချသူများ မရှိကြောင်း၊ ၁၈၂၆ ခုနှစ် ဧပြီလ ၂၆ ရက်နေ့တွင် ဗြိတိန် အစိုးရ၏ ကော်မရှင် ရုံးခွဲမှ ထုတ်ပြန်သည့် အစီရင်ခံစာ အရ အာရ်ကာန် ဒေသတွင် မော့ဂ် (ရခိုင်) ၆၀၀၀၀ နှင့် မွတ်စာလ်မန် (ရိုဟင်ဂျာ) ၃၀၀၀၀ ရှိခဲ့ကြောင်း၊ လူဦးရေ အားဖြင့် နှစ်အချိုးတစ် ရှိခဲ့ကြောင်းကို ယုတ္တိ ဗေဒနှင့် သင်္ချာနည်းကျကျ တွက်ချက်၍ Mr. George Soros ၏ မေးမြန်းချက် များကို ဖြေကြားခဲ့ကြောင်း ဦးရွှေမောင်က ရေးသား ထားသည်။ အစိုးရ၏ ကိန်းဂဏန်းများ အရ ၂၀၁၄ ခုနှစ်တွင် ရခိုင်ပြည်နယ်၌ လူဦးရေ သုံးသန်းတွင် နှစ်သန်းမှာ ရခိုင်လူမျိုး ဖြစ်ပြီး ကျန်သည့် တစ်သန်းမှာ ရိုဟင်ဂျာ ဖြစ်နေသဖြင့် ၁၈၉ နှစ် ကြာမြင့် သွားသော်လည်း ယခု အချိန်ထိ လူဦးရေ အားဖြင့် နှစ်အချိုးတစ် ဖြစ်နေသည်မှာ အံ့အားသင့် စရာဖြစ်ကြောင်း၊ လူဦးရေ တိုးပွားမှု စံနှုန်းအရ တွက်ချက်လျှင် ရိုဟင်ဂျာ လူဦးရေ ၂.၅ သန်းကျော် ရှိနေမည် ဖြစ်သော်လည်း ပြည်တွင်းတွင် လူဦးရေ ၁.၅ သန်း မျှသာ ရှိပြီး ကျန်သည့် ရိုဟင်ဂျာများမှာ ဘင်္ဂလားဒေ့ရှ်၊ ဆော်ဒီအာရေဗျာ၊ မလေးရှား၊ အင်ဒိုနီးရှား၊ ထိုင်း၊ သြစတြေးလျ၊ ဗြိတိန်၊ အမေရိကား၊ ကနေဒါ အစရှိသည့် နိုင်ငံများသို့ ပြောင်းရွှေ့ အခြေချ နေထိုင်လျက် ရှိသည့် အတွက် ရခိုင်ဒေသသို့ တရားမ၀င် ၀င်ရောက်လာသူ မရှိဘဲ၊ တရားမ၀င် ထွက်ခွာနေခြင်းသာ ရှိကြောင်း ဦးရွှေမောင်၏ လူမှုကွန်ယက် စာမျက်နှာတွင် ရေးသား ထားပါသည်။
