ဒု-ရဲမှူးကြီး အောင်မင်းထွေးက ဒေသခံ များကို လုပ်ကြံ အမိန့်စာထုတ် ခြိမ်းခြောက် ဖိအားပေး လျက်ရှိ

မောင်တော ။ ။ ရခိုင်ပြည်နယ်၊ မောင်တော မြို့နယ် တောင်ပိုင်း၊ အလယ်သံကျော် အခြေစိုက် နယ်ခြားစောင့် ရဲတပ်ဖွဲ့၊ နယ်မြေရုံးမှ ဒုရဲမှူးကြီး အောင်မင်းထွေး (G-1) သည် အလယ်သံကျော်၊ ချိန်ကာလီ၊ ကံပူး၊ အလယ်သံကျော် ကညင်တန်း စသည့် ကျေးရွာများမှ ဒေသခံ ရိုဟင်ဂျာများကို လုပ်ကြံ၍ အမိန့်စာ ထုတ်ပြန်ပြီး အစိမ်းနုရောင်ကဒ် အတင်းအဓမ္မ လျှောက်ခိုင်းလျက် ရှိကြောင်း သတင်း ရရှိပါသည်။

ဒု-ရဲမှူးကြီး အောင်မင်းထွေး (G-1) ဆိုသူ၏ ရုံးစိုက်ရာ နေရာသည် ကျီးကန်းပြင်ရှိ အမှတ် (၁) နယ်ခြားစောင့် ရဲတပ်ဖွဲ့ ဌာနချုပ် ဖြစ်သော်လည်း ယခုအခါ ၎င်းအား အလယ်သံကျော် နယ်မြေ စခန်းသို့ သြဂုတ်လ (၁) ရက်နေ့မှ (၁၅) ရက်နေ့ အတွက် အထူးတာဝန်ဖြင့် ယာယီ ပြောင်းရွှေ့ ထားခြင်း ဖြစ်သည်ဟု သိရသည်။ ၎င်းပြောင်းရွှေ့ လာသည့် အချိန်မှစ၍ အလယ်သံကျော် နယ်မြေစခန်း၏ အနီးအနားမှ ကျေးရွာသား (၂၀) ဦးကျော်ခန့်ကို ဆွေးနွေးရန် ရှိသည်ဟု ဆိုကာ ၎င်းနှင့် လာရောက် တွေ့ဆုံရန် အမိန့်စာများ ထုတ်ခဲ့သည်။ ၎င်းထုတ်ပြန်သော စာတွင် အကြောင်းအရာ တိတိကျကျ မပါသဖြင့် ဒေသခံများက ကြောက်ရွံ့၍ အစပိုင်းတွင် သွားရောက် မတွေ့ဆုံဘဲ ရှောင်နေခဲ့ကြသည်။ သို့သော် ၎င်းနှင့် လာရောက် မတွေ့ဆုံးသူများကို ဘင်္ဂလားဒေ့ရှ် နိုင်ငံသို့ တရားမ၀င် သွားရောက်ပြီး ပြန်ဝင်လာသူများ အဖြစ် ဖမ်းဆီး အရေးယူမည်ဟု ခြိမ်းခြောက်ခဲ့သည်။ ထိုကဲ့သို့ ခြိမ်းခြောက်ခဲ့မှုကြောင့် သြဂုတ်လ (၉) ရက်နေ့တွင် ကံပူး ကျေးရွာမှ ရ.ယ.က ဥက္ကဌ ဟောင်း ဦးနော်ဇိရ်အာမတ်၊ ဦးမော်တီရာမန်နှင့် ဦးအဒူရှကူရ် အပါအ၀င် အနီးအနား ကျေးရွားများမှ ဒေသခံ (၁၀) ဦးခန့်သည် နယ်မြေ စခန်းသို့ သွားရောက်ပြီး ဒု-ရဲမှူးကြီးနှင့် တွေ့ဆုံခဲ့သည်။ 

ထိုသို့ လာရောက် တွေ့ဆုံသူများကို ၎င်းက အစိမ်းနုရောင်ကဒ် လျှောက်ရန် ပြောဆိုခဲ့ရာ လာရောက်တွေ့ဆုံသူ ဒေသခံများက ဒု-ရဲမှူးကြီး၏ စကားကို လက်မခံလိုသည့် ပုံစံပြသဖြင့်၊ ဒု-ရဲမှူးကြီးက သြဂုတ်လ (၁၄) ရက်နေ့ နောက်ဆုံး ထား၍ အစိမ်းနုရောင်ကဒ် မလျှောက်သူများကို ပြည်ပြေးစာရင်း ကြေညာ၍ ဖမ်းဝရမ်း ထုတ်မည်ဟု ခြိမ်းခြောက်ခဲ့သည်။ ထိုသို့ ခြိမ်းခြောက်မှုကြောင့် လာရောက်တွေ့ဆုံသူများက ရွာသားများကို စည်းရုံး၍ လျှောက်ခိုင်းမည်ဟု ခံဝန်ကတိပြု လက်မှတ်ထိုးခဲ့ရသည်ဟု ဒေသခံများက RB News သို့ပြောပါသည်။ 

အလားတူ သြဂုတ်လ (၁၀) ရက်နေ့ ည ၆ နာရီ အချိန်တွင် အလယ်သံကျော် ကျေးရွာမှ ဦးဆော်ဒူလ္လာ (တစည ပါတီ၊ မြို့နယ် ဗဟိုကော်မီတီဝင်) အပါအ၀င် ဒေသခံ (၆) ဦးသည် ဒု-ရဲမှူးကြီး၏ အကြိမ်ကြိမ် ဆင့်ခေါ်စာ ပို့မှုကြောင့် နယ်မြေ စခန်းသို့ သွားရောက် တွေ့ဆုံခဲ့ရာ၊ ဒု-ရဲမှူးကြီးက “မင်းတို့ကောင်တွေ ငါအကြိမ်ကြိမ် ခေါ်တာ ဘာလို့ မလာတာလဲ” ဆိုကာ လာရောက်တွေ့ဆုံသူများကို အပြစ်ပေးသည့် အနေဖြင့် ည ၁၁ နာရီထိ ချုပ်နှောင် ထားခဲ့သည်။ ထို့နောက် ၎င်းတို့ကို အစိမ်းနုရောင်ကဒ် အတွက် ရွာသားများကို စည်းရုံးပေးရမည်ဟု ဆို၍ အမျိုးမျိုး ခြိမ်းခြောက် ပြောဆိုခဲ့သောကြောင့် နောက်ဆုံးတွင် စည်းရုံးပေးမည်ဟု ခံဝန်ကတိပြု လက်မှတ် ရေးထိုးပေးမှသာ ပြန်လည် လွှတ်ပေးခဲ့သည်။ 

ထို့အပြင် ယနေ့ သြဂုတ်လ (၁၁) ရက်နေ့တွင်လည်း သရေကုန်တန်း ကျေးရွာ၊ သံဒါ ကျေးရွာ၊ ၀ါးချ ကျေးရွာ များမှ တစ်ရွာလျှင် ငါးဦးစီ အဆိုပါ ဒု-ရဲမှူးကြီးနှင့် လာရောက် တွေ့ဆုံရန် ဆင့်ခေါ်စာ ပို့ထားကြောင်း သိရသည်။ 

နိုင်ငံသား စီစစ်ခံရမည့်သူ၏ ကဒ်ပြား ခေါ် အစိမ်းနုရောင်ကဒ် သည် နိုင်ငံသား စီစစ်ခံရမည်သူများကိုသာ နှစ်နှစ် ယာယီ နေထိုင်ခွင့် သဘောဖြင့် ထုတ်ပေးနေသောကဒ် ဖြစ်၍ ဒေသခံ ရိုဟင်ဂျာများ အနေဖြင့် ထိုကဒ်ကို မကိုင်ဆောင် လိုကြောင်း ဒေသခံများက ပြောပါသည်။

ရိုဟင်ဂျာများသည် ၁၉၅၁ ခုနှစ်တွင် နိုင်ငံသား ဥပဒေအရ တစ်နိုင်ငံလုံးတွင် ရှိသည့် တိုင်းရင်းသား၊ နိုင်ငံသားများကို ထုတ်ပေးခဲ့သည့် အမျိုးသား မှတ်ပုံတင်ကဒ်ပြား ရရှိခဲ့သူများ ဖြစ်သောကြောင့် နိုင်ငံခြားသား များကိုသာ ထုတ်ပေးရသည့် အစိမ်းနုရောင်ကဒ်ကို လက်မခံကြခြင်း ဖြစ်သည်။ ထို့အပြင် အစိုးရက ထုတ်ပေးရန် ပြင်ဆင်နေသည့် အစိမ်းနုရောင်ကဒ်သည် မြန်မာနိုင်ငံ၏ နိုင်ငံသား ဥပဒေများ၊ နည်းဥပဒေများ အရလည်း ကွဲလွဲနေကြောင်း၊ ဥပဒေ ကျွမ်းကျင်သူများက ဝေဖန် သုံးသပ်နေကြသည်။ 

ယခုလို ရွေးကောက်ပွဲ အကြိုကာလ၌ အာဏာပိုင်များက ဒေသခံများ အပေါ် အကြောင်းမဲ့ အိမ်ထောင်စု စာရင်းမှ ပယ်ဖျက်လိုက်မည်ဟု မတရားသဖြင့် ခြိမ်းခြောက် ဆက်ဆံနေခြင်းသည် အစိုးရ၏ ယုတ်မာမှုကို ပြသသလို ဖြစ်နေသည်။ ဒေသခံ ရိုဟင်ဂျာများသည် ၎င်းတို့၏ နိုင်ငံသား ကိစ္စရပ်ကို ပြည်ထောင်စု အစိုးရမှ ပွင့်လင်းမြင်သာမှု ရှိရှိဖြင့် တရားမျှတစွ ဆောင်ရွက် ပေးရန် လိုလားလျက်ရှိပြီး ယခုလို ဒု-ရဲမှူးကြီး၏ ဒေသခံများ အပေါ် လိမ်လည် ဖိအားပေး အကျပ်ကိုင် လုပ်ဆောင် နေမှုကိုလည်း ပြည်ထောင်စု အစိုးရမှ အချိန်မှီ ဟန့်တား အရေးယူပေးပါရန် ဒေသခံများက အထူးတောင့်တလျက် ရှိသည်ဟု ဆိုသည်။