မောင်တော၌ အပြစ်မဲ့ ရိုဟင်ဂျာပြည်သူများကို ဥပဒေမဲ့ သတ်ဖြတ်နေခြင်း အတွက် တိုကျိုမြို့ မြန်မာသံရုံးရှေ့ ကန့်ကွက် ဆန္ဒပြ

20.10.2016

တိုကျို ။ ။ ရခိုင်ပြည်နယ်၊ မောင်တောမြို့နယ်တွင် ရိုဟင်ဂျာ ပြည်သူများကို ဥပဒေမဲ့ သတ်ဖြတ်နေခြင်း အတွက် ဂျပန်နိုင်ငံ၊ တိုကျိုမြို့ မြန်မာသံရုံးရှေ့တွင် ယနေ့ အောက်တိုဘာလ (၂၀) ရက်နေ့ နေ့လည် ၂ နာရီအချိန်တွင် ကန့်ကွက် ဆန္ဒပြပွဲ တစ်ရပ်ကျင်းပခဲ့သည်။ 

ဆန္ဒပြပွဲကို ဂျပန်နိုင်ငံ အခြေစိုက် မြန်မာနိုင်ငံသား ရိုဟင်ဂျာများ အသင်း - ဂျပန် (BRAJ) မှ ဦးစီး၍ ကျင်းပခဲ့ခြင်း ဖြစ်ပြီး၊ ဂျပန်နိုင်ငံရောက် ရိုဟင်ဂျာများ၊ ရိုဟင်ဂျာအရေး အားပေးသည့် အသိုင်းအ၀ိုင်းများ ပေါင်း၍ ၈၀ ကျော် ပါဝင်ခဲ့သည်။ ဂျပန်နိုင်ငံမှ မီဒီယာကြီး ၄ ခု လာရောက်၍ သတင်းယူခဲ့သည်။ 

ဦးစွာ BRAJ ဥက္ကဌ ဦးဟာရွန်ရော်ရှိတ်က ယခုလ ၉  ရက်နေ့တွင် မောင်တောမြို့၌ ဖြစ်ပွားခဲ့သည့် တိုက်ခိုက်မှုနှင့် ပတ်သက်၍ ပြောကြားပြီး၊ အဆိုပါ တိုက်ခိုက်မှုကို အကြောင်းပြ၍ မောင်တောမြို့နယ် မြောက်ပိုင်းမှ အပြစ်မဲ့ ဒေသခံ ရိုဟင်ဂျာ ပြည်သူများကို သတ်ဖြတ်ခြင်း၊ နေအိမ်များ မီးရှို့ခြင်း ဖမ်းဆီးခြင်းများကို ကန့်ကွက် ရှုတ်ချကြောင်း၊ လက်နက်ကိုင် အာဏာပိုင်များက ဥပဒေမဲ့ ပြုလုပ်နေခြင်းများကို အမြန်ဆုံး ရပ်တန့်ပေးရန် တောင်းဆိုခဲ့သည်။ 

BRAJ ဒု-ဥက္ကဌ ဦးအောင်တင်က မြန်မာအစိုးရ အနေဖြင့် ဥပဒေမဲ့ လုပ်ရပ်များကို ပြုလုပ်နေသောကြောင့် ဂျပန်အစိုးရအနေဖြင့် စီးပွားရေး ပိတ်ဆို့ရန်၊ အခြားသော အကူအညီများ ပိတ်ဆို့ရန်၊ မြန်မာစစ်တပ်နှင့် ရဲတပ်ဖွဲ့တို့၏ ဥပဒေမဲ့ အပြစ်မဲ့ ပြည်သူများကို အကြမ်းဖက် သတ်ဖြတ်မှုအတွက် နိုင်ငံတကာ စုံစမ်းရေးအဖွဲ့မှ ဖြစ်စဉ် အစအဆုံးကို စုံစမ်း၍ အရေးယူပေးရန် တောင်းဆိုခဲ့သည်။ 

ဆန္ဒပြပွဲသို့ ပါဝင်ခဲ့သည့် လူငယ်တစ်ဦး ဖြစ်သူ မရှီဂုဖ်ယာစ်မီးန် က နိုင်ငံတွင်းရှိ မြန်မာနိုင်ငံသား ရိုဟင်ဂျာများ၏ အခွင့်အရေးသည် ငှက်တစ်ကောင်လောက်တောင် မရှိကြောင်း၊ ငှက်တစ်ကောင်သည် လွတ်လွတ်လပ်လပ် ငှက်သိုက်ပြုလုပ်ပြီး ကလေးမွေးနိုင်ကြောင်း၊ အဲဒီကလေးအတွက် လွတ်လပ်စွာ အစားအစာ ရှာနိုင်ကြောင်း၊ ရိုဟင်ဂျာများမှာ သွားလာရေး၊ စီးပွားရေး၊ ပညာရေးနှင့် လက်ထပ်ခွင့် အစစအရာရာ ပိတ်ပင်ခံထားရကြောင်း ၎င်း၏ အမြင်ကို နှိုင်းယှဉ်ပြခဲ့သည်။

ထို့နောက် မောင်အာတာရ်ကာမာလ် က သမ္မတထံ ပေးမည့် မြန်မာဘာသာဖြင့် စာကို ဖတ်ကြားခဲ့ပြီး၊ BRAJ မှ ဦးမိုဟာမတ်ဆော်လိမ်က အင်္ဂလိပ်ဘာသာဖြင့် စာကို ဖတ်ကြား၍ ဆန္ဒပြပွဲကို ညနေ (၄) နာရီ အချိန်တွင် ရုပ်သိမ်းခဲ့သည်။