စစ်သားများ၏ ပစ်ခတ်မှုကို ကြောက်ရွံ၍ ထွက်ပြေးသူ တစ်ဦးသေဆုံး၊ နှစ်ဦး ပျောက်ဆုံးနေ
Ahkter Husin
RB News
22.10.2016
မောင်တော ။ ။ ရခိုင်ပြည်နယ်၊ မောင်တောမြို့နယ် အမှတ် (၅) နယ်မြေအပိုင် အောက်ပြူးမ ကျေးရွာနှင့် အထက်ပြူးမ ကျေးရွာများသို့ မြန်မာစစ်တပ် ၀င်ရောက်၍ အကြောင်းမဲ့ ပစ်ခတ်မှုကြောင့် အထိတ်အလန့် ဖြစ်ပြီး ထွက်ပြေးကြသော ရွာသားများထဲမှ တစ်ဦး သေဆုံးခဲ့ပြီး၊ နှစ်ဦး ပျောက်ဆုံးနေကြောင်း သတင်း ရရှိပါသည်။
အောက်တိုဘာလ (၂၀)ရက်နေ့တွင် မြန်မာစစ်တပ်မှ နယ်မြေရှင်းလင်းရေး ခေါင်းစဉ်တပ်ပြီး အောက်ပြူးမ ကျေးရွာနှင့် အထက်ပြူးမ ကျေးရွာများသို့ ၀င်ရောက်၍ အကြောင်းမဲ့ သေနတ်ဖြင့် ပစ်ခတ်မှုကြောင့် ရွာသားများ အထိတ်တလန့် ဖြစ်ပြီး ထွက်ပြေးခဲ့ကြသည်။
“သူတို့ အောက်ပြူးမကို ည (၈) နာရီမှာ ၀င်လာပြီးတာနဲ့ မိုးပေါ်ထောင် သေနတ်ပစ်တယ်။ အချက်တစ်ရာကျော်တယ်။ ရွာသူရွာသားတွေက သေနတ်သံကြားလို့ ကြောက်ပြီး နီးစပ်ရာရွာတွေကို ထွက်ပြေးကြတယ်၊ အဲဒီမှာ ပြူးမချောင်းကို ကူးပြီး ရေတွင်းပြင် ကျေးရွာမှာ သွားခိုလှုံဖို့ ကြိုးစားခဲ့သူတွေလည်း ရှိတယ်” ဒေသခံ တစ်ဦးက RB News သို့ပြောသည်။
ထိုသို့ ချောင်းဖြတ်ကူးသူများထဲတွင် မိုဟာမတ်ရော်ဖိတ် (ဘ) ဦးဇော်ကော်ရီ (အသက် ၂၂ နှစ်) လည်း ပါဝင်ခဲ့သည်။ ၎င်းသည် သေနတ်သံကြောင့် အကြောက်လွန်ပြီး ချောင်းကို မဖြတ်ကူးနိုင်ဘဲ သေဆုံး သွားခဲ့ဖြစ်ပြီး အခြားရွာသား နှစ်ဦးလည်း ပျောက်ဆုံးလျက် ရှိကြောင်း သိရှိရသည်။
“မိုဟာမတ်ရော်ဖိတ် သေသွားပြီ ဆိုတဲ့ သတင်းကို မိဘတွေက ရတော့ အလောင်းရှာဖို့ အုပ်ချုပ်ရေးမှူး ဆီကနေ ခွင့်ပြုချက်ယူပြီး ချောင်းတစ်လျှောက်ရှာဖို့ ကြိုးစားခဲ့တယ်။ အုပ်ချုပ်ရေးမှူးက ခွင့်ပြုပေမယ့်လည်း ချောင်းတစ်လျှောက် လုံခြုံရေး တင်းကျပ်ထားလို့ ရွာသားတွေက မရှာရဲကြဘူး၊ ဒီနေ့ ဒီရေတက်ချိန် မနက် ၉ နာရီမှာ အထက်ပြူးမ ကူးတို့နားမှာ အလောင်းတစ်လောင်း ပေါ်နေတယ်လို့ ကြားလို့ အထက်ပြူးမနဲ့ အောက်ပြူးမ ရွာသားတွေက သွားဆယ်ကြတယ်။ အဲဒီအလောင်းက မိုဟာမတ်ရော်ဖိတ်ရဲ့ အလောင်း ဖြစ်နေတာပါ။” ဟု အဆိုပါ ဒေသခံက ပြောပါသည်။
အလောင်း၏ အခြေအနေမှာ အလွန်ဆိုးရွားနေသဖြင့် ယနေ့ နေ့လည် ၁၂း၀၅ နာရီတွင် စုပေါင်းဝတ်ပြု၍ မြေမြှပ်သဂြိုဟ်ခဲ့သည်။ ပျောက်ဆုံးနေသူနှစ်ဦးလည်း သေဆုံးသွားခြင်း ဖြစ်နိုင်သည့် အတွက် အလောင်းများကို ဒေသခံရွာသားများက ရှာဖွေနေကြသည်။
အလားတူ အထက်ပြူးမ ကျေးရွာတွင်လည်း မြန်မာစစ်တပ်က သေနတ်များကို မိုးပေါ်ထောင်ပစ်ခဲ့သည်။ အောက်တိုဘာလ (၂၁) ရက်နေ့ နံနက် ၁၀ နာရီအချိန်တွင် တောင်ရင်းကို ပိတ်ဆို့၍ စစ်ဆေးခဲ့သည်။ တောင်ရင်းမှ ပညာတတ် မျက်နှာဖုံး တစ်ဦးဖြစ်သူ အသက် (၇၅) နှစ် အရွယ် ဦးဘော်ဒီအာလောမ်ကို စစ်သားများ လူမဆန်စွာ ရိုက်နှက်ခဲ့သည်။
အမှတ် (၄) နယ်မြေ အပိုင် ရေတွင်းပြင် ကျေးရွာသို့လည်း အောက်တိုဘာလ (၂၁) ရက်နေ့တွင် မြန်မာစစ်တပ်က ၀င်ရောက် စစ်ဆေးခဲ့ပြီး၊ နေအိမ်များမှ ခြံစည်းရိုးများကို ဖျက်ရန် အမိန့်ပေးခဲ့ကြောင်း သိရှိရသည်။
ဓါတ်ပုံမှာ သေဆုံးသွားသူ အသက် (၂၂) နှစ်အရွယ် မိုဟာမတ်ရော်ဖိတ်၏ ဓါတ်ပုံဖြစ်ပြီး၊ အလောင်း၏ ဓါတ်ပုံကို လက်ခံရရှိသော်လည်း အများကြည့်ရှုရန် မသင့်တော်သဖြင့် သတင်းနှင့်အတူ မတင်ပေးခြင်း ဖြစ်ကြောင်း အသိပေးအပ်ပါသည်။
