မောင်တော မြောက်ပိုင်း ပဒကားဒေ၀ါနာလီမှ နယ်ခြားစောင့်ရဲများက ဒေသခံများထံမှ ပစ္စည်းများနှင့် ငွေများလုယက်

7.7.2017

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ပဒကားဒေ၀ါနာလီ ကျေးရွာအုပ်စု (နတ်ချောင်း) အခြေစိုက် နယ်ခြားစောင့်ရဲတပ်ဖွဲ့မှ ကင်းစခန်းမှူးနှင့် တပ်ဖွဲ့ဝင်များက ဒေသခံများထံမှ ပစ္စည်းများနှင့် ငွေများ လုယက်ခဲ့ကြောင်း သတင်းရရှိပါသည်။

မောင်တောမြို့နယ် မြောက်ပိုင်း ပဒကားဒေ၀ါနာလီ ကျေးရွာအုပ်စု (နတ်ချောင်း) အခြေစိုက် နယ်ခြားစောင့်ရဲတပ်ဖွဲ့မှ ကင်းစခန်းမှူးနှင့် တပ်ဖွဲ့ဝင် (၅) ဦးတို့သည် ဇူလိုင်လ (၃) ရက်နေ့ ၈ နာရီခန့် အချိန်တွင် ပဒကားရွာသစ် ကျေးရွာအုပ်စု ဒုံဂူလာရွာသို့ ၀င်ရောက်၍ တစ်အိမ်တက်ဆင်း စစ်ဆေးသည့် ပုံစံဖြင့် အိမ်များသို့ ၀င်ရောက်ပြီး အခန်းများအားလုံးကို စစ်ဆေးခြင်း၊ သေတ္တာများ ဖွင့်၍ တွေ့ရှိသော အသုံးအဆောင်ပစ္စည်းများကို ခိုးယူသွားခြင်း၊ အိမ်ခြံဝင်းအတွင်းရှိ ဟင်းသီးဟင်းရွက်များ ခူးယူသွားခြင်း၊ ကြက်များ ဖမ်းယူသွားခြင်း၊ ငွေများလုယက်ခြင်းများ ပြုလုပ်ခဲ့ကြောင်း ဒေသခံများက RB News သို့ပြောပါသည်။

ပစ္စည်းများနှင့် ငွေများ လုယက်ခံရသူအချို့မှာ --

(၁) ဒုံဂူလာ ဗလီဝတ်ကျောင်းတော်မှ ဆိုလာပြား၊ ဘက်ထရီတစ်လုံးနှင့် မီးသီးများ

(၂) ဦးအေဇာရ်ဟူစိန်း (ဘ) ဦးဇော်ကိရ်အာမတ်၏ ဆိုင်မှာ ဆပ်ပြာများ

(၃) ဦးရော်ရှိတ်အာမတ်၏ နေအိမ်မှာ ဘက်ထရီ တစ်လုံး

(၄) ဦးရှော်ဖိခ်နှင့် ဦးတွာဟား (ဘ) ဦးဘော်ရှီရ်အာမတ်တို့ ညီအစ်ကို နှစ်ဦးထံမှ ငွေကျပ် ၂ သိန်း

(၅) ဦးအာဘုလ်ကာဆိမ်း၊ ဒေါ်ဆေမောန်ခါတူ၊ ဦးအူလာမျာနှင့် ဦးကာဒိရ်ဟူစိန်း တို့ထံမှ ဟင်းသီးဟင်းရွက်များနှင့် ကြက်များ ယူဆောင်သွားကြောင်း - သိရှိရပါသည်။