စစ်တွေ စံပြရွာ ဒုက္ခသည် စခန်းကျောင်းမှ ကျောင်းသား များထံမှ ငွေကောက်ခံလျက်ရှိ
RB News
9.5.2014
စစ်တွေ ။ ။ ရခိုင်ပြည်နယ်၊ စစ်တွေမြို့၊ စံပြရွာ (ဘဆားရား) ဒုက္ခသည် စခန်းရှိ ကျောင်းတွင် ကျောင်းအုပ်ချုပ်ရေးမှူးက ကျောင်းသားများထံမှ ငွေကောက်ခံလျက် ရှိကြောင်း သတင်း ရရှိပါသည်။
စစ်တွေမြို့၊ စံပြရွာ (ဘဆားရား) ဒုက္ခသည် စခန်းရှိ အခြေခံ ပညာ မူလတန်း ကျောင်းတွင် သူငယ်တန်းမှ အဌမတန်းထိ ကျောင်းသားများကို ပညာသင်ကြား ပေးလျက် ရှိသော်လည်း ကျောင်းဆရာ/မ များ ပုံမှန် လာရောက်ခြင်း မရှိသောကြောင့် ပညာသင်ကြားခွင့် ဆုံးရှုံးလျက် ရှိနေသည့် အပြင် ကျောင်းအုပ်ချုပ်ရေးမှူး ဖြစ်သူ ဦးအောင်ဖြူက ကျောင်းသားများကို စာသင်ခန်းများရှိ စားပွဲများ၊ ခုံများ ပြုပြင်ရန်ဟု ဆိုကာ ငွေကောက်ခံလျက် ရှိကြောင်း ဒေသခံ တစ်ဦးက RB News သို့ပြောပါသည်။
ကျောင်းအုပ်ချုပ်ရေးမှူး ဦးအောင်ဖြူက မူလတန်း ကျောင်းသားများထံမှ ငွေကျပ် ၂၀၀၊ ပဉ္စမတန်း ကျောင်းသားများထံမှ ငွေကျပ် ၁၆၀၀၊ ဆဌမတန်း ကျောင်းသားများထံမှ ငွေကျပ် ၁၇၀၀၊ သတ္တမတန်း ကျောင်းသားများထံမှ ငွေကျပ် ၁၈၀၀ နှင့် အဌမတန်း ကျောင်းသားများထံမှ ငွေကျပ် ၂၀၀၀ စီ ကောက်ခံလျက် ရှိသည်ဟု အဆိုပါ ဒေသခံမှ ပြောပါသည်။
“ကျွန်တော်တို့ ရွာမီးရှို့ အကြမ်းဖက်ခံရလို့ စံပြရွာ ဒုက္ခသည် စခန်းကို ရောက်နေရသူတွေပါ။ ကျွန်တော်တို့မှာ ဘာမှ မရှိဘူး။ နိုင်ငံတကာက ထောက်ပံ့တဲ့ ရိက္ခာတွေနဲ့ အသက်ရှင် နေရတာ။ ၀င်ငွေ ရဖို့ နည်းလမ်းလည်း မရှိဘူး။ အခုလို ငွေကောက်တော့ သားသမီး ပညာရေး အတွက်ဆိုပြီး ကျွန်တော်တို့မှာ ရိက္ခာ မလောက်တဲ့ ထဲက ဆန်တွေ၊ ဆီတွေ ရောင်းပြီး ကျောင်းအုပ်ချုပ်ရေးမှူး တောင်းတဲ့ ငွေကို ပေးနေရတယ်” ဟု ကျောင်းသား တစ်ဦး၏ မိဘက RB News သို့ပြောပါသည်။
