ဘူးသီးတောင်မှ လိုင်စင်များကို ရခိုင်ပါတီဝင် များက လက်ဝါးကြီးအုပ်ထား
RB News
21.7.2014
ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် အတွင်း အာဏာပိုင်များထံမှ ခွင့်ပြုချက် ရယူရသည့် လုပ်ငန်း လိုင်စင်များကို ရခိုင် ပါတီဝင် များက လက်ဝါးကြီးအုပ် ထားသည့် အတွက် ဒေသခံ ရိုဟင်ဂျာများမှာ လုပ်ငန်း လုပ်ကိုင်ရန် ခက်ခဲလျက် ရှိကြောင်း သတင်း ရရှိပါသည်။
ဘူးသီးတောင် မြို့နယ်မှ ယခင် RNDP ပါတီ (ယခု ANP ပါတီ) ခေါင်းဆောင်များ ဖြစ်သည့် ဦးမောင်ရွှေသိန်း၊ ဦးမောင်ကာလူ၊ ဦးမောင်သန်းရွှေ၊ ဦးလှသိန်းမောင်၊ ဦးကျော်သိန်း၊ ဦးရွှေသာနှင့် ဦးမောင်အေးလှိုင်တို့သည် မြို့နယ် အုပ်ချုပ်ရေးမှူး ဦးသန်းရွှေနှင့် ပူးပေါင်း၍ ဘူးသီးတောင်မြို့နယ်၏ အဓိက လုပ်ငန်းများ ဖြစ်သော စည်ပင်သာယာ လေလံ တင်ဒါများ၊ ဆန်လုပ်ငန်း၊ ၀ါးလုပ်ငန်း၊ သစ်လုပ်ငန်း များကို ဌာနဆိုင်ရာ အကြီးအကဲများနှင့် ချဉ်းကပ်၍ လူမျိုးရေး၊ ဘာသာရေးနှင့် ဆက်နွယ်သည်များကို သွေးထိုး လှုံ့ဆော်ပြီး လုပ်ငန်း လိုင်စင်များကို ရခိုင်လူမျိုး များကိုသာ ချပေးအောင် ပြုလုပ်ထားသည်ဟု ဒေသခံ တစ်ဦးက RB News သို့ပြောပါသည်။
“အရင်က ၀ါးလုပ်ငန်း လိုင်စင်တွေကို နှစ်စဉ် လူမျိုး မခွဲခြားဘဲ ပြည်နယ် သစ်တော ဦးစီးဌာနက ချပေးခဲ့ ပေမယ့်လည်း ၂၀၁၄ - ၂၀၁၅ ဘဏ္ဍာရေးနှစ် အတွက် ၀ါးလိုင်စင်တွေ လျာထားချက် အားလုံးကို ရခိုင် ANP/RNDP ပါတီဝင်တွေက သက်ဆိုင်ရာ ဌာန အရာရှိတွေနဲ့ နားလည်မှုယူပြီး ရိုဟင်ဂျာလူမျိုးတွေ လုံးဝ လုပ်ပိုင်ခွင့် မရအောင် ချုပ်ကိုင် ထားတယ်။ သစ်လုပ်ငန်း ဆိုရင်လည်း ရိုဟင်ဂျာတွေကို လုံးဝ လုပ်ပိုင်ခွင့် မပေးတော့ဘဲ ရခိုင်တွေကသာ အခွန်မဆောင်ဘဲ တရားမ၀င် လုပ်ကိုင်နေတယ်။ သစ်မာတွေကို တောပြုန်းတီးတဲ့ အထိ ခုတ်ပြီး တဖက်နိုင်ငံကို တရားမ၀င် ရောင်းချ နေကြတယ်။ ရိုဟင်ဂျာတွေ နည်းနည်းပါးပါး လုပ်တယ်ဆိုရင် ဖမ်းပြီး နှစ်ရှည် ထောင်ဒဏ်ချတယ်” ဟု ဒေသခံ တစ်ဦးက RB News သို့ပြောပါသည်။
“ဆန်ကုန်သည်တွေ ဆိုရင်လည်း ရခိုင်လူမျိုး ဆန်ဒိုင်တွေဆီက ဆန်သွားယူရင် ၉၆၉ နဲ့တွေ့မယ်၊ ဘုန်းကြီးနဲ့ ရိုက်ခိုင်းမယ်၊ တကယ်လို့ ဆန်သယ်လာလို့ ရရင်လည်း အကုန်လုပစ်မယ်၊ ဆိုပြီး ခဏခဏ ခြိမ်းခြောက်ခံရတဲ့ အတွက် စီးပွားပျက် နေပါပြီ။ တစ်ခါ ရခိုင်လူမျိုး ဆန်ဒိုင်တွေကိုလည်း အမျိုးမျိုး ခြိမ်းခြောက်တယ်။ နာဇီဝါဒပေါ့ဗျာ၊ တပိုင်တနိုင် လုပ်နေတဲ့ သူတွေကိုလည်း မတရား အနိုင်ကျင့် ဖိနှိပ်နေကြတယ်။” ဟု ၎င်းက ဆက်လက်၍ ပြောပါသည်။
အဆိုပါ ဒေသခံက “အခုလို ကျွန်တော်တို့ ရိုဟင်ဂျာ လူမျိုးတွေကို လုပ်ငန်းတွေ လုပ်ကိုင်ခွင့် မရအောင် ရခိုင် ANP ပါတီက လက်ဝါးကြီးအုပ်ပြီး နာဇီပုံစံမျိုး လုပ်နေတာတွေကို ပြည်ထောင်စု အစိုးရ ကိုယ်တိုင် ကော်မရှင်ဖွဲ့ပြီး စုံစမ်း စစ်ဆေးပေးစေ ချင်ပါတယ်။ ပြည်နယ် အစိုးရကို တာဝန်ပေးရင်လည်း ဒီကိစ္စက ပြေလည် လာမှာ မဟုတ်တဲ့ အတွက် ပြည်ထောင်စု အစိုးရ ကိုယ်တိုင် လုပ်ဆောင် ပေးပါလို့ မေတ္တာရပ်ခံ ပါတယ်” ဟု ပြောပါသည်။
