ညောင်ချောင်း ပုဂ္ဂလိက ဈေးမှ ညစောင့်များ နယ်ခြားစောင့် ရဲများက အကြောင်းမဲ့ ရိုက်နှက်
MYARF
RB News
5.3.2015
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် ညောင်ချောင်း ကျေးရွာမှ နယ်ခြားစောင့် ရဲများသည် ညောင်ချောင်း ပုဂ္ဂလိက ဈေးမှ ညစောင့် (၄) ဦးကို အကြောင်းမဲ့ ရိုက်နှက် ခဲ့ရာ ဒဏ်ရာ ရရှိခဲ့ကြောင်း သတင်း ရရှိပါသည်။
မတ်လ (၃) ရက်နေ့ ည ၇ နာရီကျော် အချိန်တွင် ဘူးသီးတောင် မြို့နယ် ညောင်ချောင်း ကျေးရွာ အခြေစိုက် နယ်ခြားစောင့် ရဲတပ်ဖွဲ့ စခန်းမှ နယ်ခြားစောင့်ရဲ (၃) ဦးသည် ညောင်ဈေးရှိ ဦးအနိုဝါရ် မိသားစုမှ ပိုင်ဆိုင်သည့် ပုဂ္ဂိလက ဈေးသို့ ရောက်ရှိလာပြီး၊ ညစောင့်များ ရှိလားဟု မေးရာ ညစောင့် တစ်ဦး ဖြစ်သည့် ဦးဖော်ဇောလ်ကော်ရီးမ်က ရှိသည်ဟုဆိုကာ ထွက်လာခဲ့ရာ နယ်ခြားစောင့် ရဲများက ကျန်သည့် ညစောင့် များကိုပါ ခေါ်ခိုင်း၍ ၎င်းက ခေါ်လာခဲ့သည်။ ထို့နောက် နယ်ခြားစောင့် ရဲများက ဘာကြောင့် တစ်နေရာတွင် စုမနေလဲ ဟုမေးရာ ညစောင့်များက လေးထောင့်တွင် လေးဦး နေရ၍ စုမနေရခြင်း ဖြစ်ကြောင်း ဖြေကြားသော်လည်း နယ်ခြားစောင့် ရဲများက အိပ်နေခြင်း ဖြစ်ကြောင်း စွပ်စွဲကာ ၎င်းတို့ လေးဦးကို လူမဆန်စွာ ရိုက်နှက်ခဲ့သည်။ နယ်ခြားစောင့် ရဲများ၏ ရိုက်နှက်မှုကြောင့် ညစောင့် ၃ ဦးမှာ နှုတ်ခမ်း၊ နှာခေါင်းနှင့် မျက်ခုံးများ ကွဲပြဲသွားခဲ့ကြောင်း ဒေသခံ တစ်ဦးက RB News သို့ပြောသည်။
ညစောင့် ၄ ဦးကို နယ်ခြားစောင့် ရဲများက ရိုက်နှက်ချိန်တွင် ဈေးအတွင်းတွင် ဈေးသည်များ ရှိနေဆဲဖြစ်ပြီး ရောင်းဝယ် ဖောက်ကား နေကြကြောင်း သိရသည်။ ညစောင့်များက ဈေးခေါင်း ဖြစ်သူ ဦးအနိုဝါရ်ကို ဖြစ်စဉ်များကို တိုင်တန်းခဲ့သည်။ ဈေးခေါင်းက မတ်လ (၄) ရက်နေ့ နံနက် ၁၀ နာရီ အချိန်တွင် ညစောင့် ၄ ဦးနှင့် အတူ ညောင်ချောင်းရှိ နယ်ခြားစောင့် ရဲတပ်ဖွဲ့ စခန်းသို့ သွားရောက်ပြီး တိုင်ကြားခဲ့ရာ ရဲမှူး၊ နယ်မြေမှူး တို့မရှိ၍ ဒုရဲအုပ် စောအေးက ဖြစ်စဉ်ကို မှတ်တမ်း တင်ထားခဲ့ပြီး အထက် အရာရှိများ လာလျှင် တင်ပြပေးမည်ဟု ပြောကြား၍ တိုင်ကြားသူများကို ပြန်စေခဲ့သည်။
၎င်းဈေးသည် ဈေးခေါင်း ဦးအနိုဝါရ်နှင့် မိသားစု ပိုင်ဆိုင်သည့် ပုဂ္ဂလိက ဈေးဖြစ်ပြီး နယ်ခြားစောင့် ရဲတပ်ဖွဲ့နှင့် လုံးဝ သက်ဆိုင်ခြင်း မရှိကြောင်း၊ ညစောင့် ရှိသည် ဖြစ်စေ၊ မရှိသည် ဖြစ်စေ၊ အိပ်သည် ဖြစ်စေ၊ မအိပ်သည် ဖြစ်စေ၊ နယ်ခြားစောင့်ရဲများ စစ်ဆေးရန် တာဝန်မရှိကြောင်း၊ ပုဂ္ဂလိက ဈေးဖြစ်၍ ဈေးခေါင်း ဦးအနိုဝါရ်မှ ဈေးကို ထိန်းသိမ်းရန် တာဝန်ရှိကြောင်း၊ ဦးအနိုဝါရ်ကလည်း အာဏာပိုင်များက တောင်းဆိုသည့် အကူအညီများကို ပုံမှန် ပေးလေ့ ရှိကြောင်း အဆိုပါ ဒေသခံက ပြောပါသည်။
