စစ်တွေ၊ ဒါးပိုင်တွင် မီးလောင်မှုကြောင့် လူဦးရေ ၅၀၀ ခန့် အိုးမဲ့အိမ်မဲ့ ဖြစ်သွား

ယနေ့ နံနက် ၁၁ နာရီ ၄၅ မိနစ်တွင် မီးစတင်လောင်ကျွမ်း ခဲ့ပြီး၊ မီးငြိမ်းသတ်ရန် လာသည့် မီးသတ်ကားများ မီးမငြိမ်းသတ်မှီ နေ့လည် ၂ နာရီ ၃၀ မိနစ်ခန့်တွင် မီးငြိမ်း ခဲ့ကြောင်း သိရှိရပါသည်။ မီးလောင်ကျွမ်းမှုမှာ ပေါ့ဆမီးကြောင့် ဖြစ်ကြောင်း ဒေသခံများက ပြောပါသည်။ မီးလောင်ကျွမ်း ရသည်မှာ အမျိုးသမီး တစ်ဦး ချက်ပြုတ်ခြင်းမှ စတင်သည်ဟု ပြောကြားသော်လည်း အချို့က ဆိုလာပြားမှ ၀ါယာရှော့ ဖြစ်၍ စတင်ခြင်းဟု ပြောဆိုခြင်းများလည်း ရှိသည့် အတွက် မည်သည့် အတွက်ကြောင့် မီးစတင် လောင်ကျွမ်းသည်ကို အတည်ပြု၍ မရနိုင်ဟု ဆိုသည်။

၈ လ အရွယ်ရှိ မိန်းကလေး ကလေးငယ် တစ်ဦး ပျောက်ဆုံးလျက်ရှိပြီး၊ သေဆုံးသွားသည်ဟု ယူဆလျက် ရှိသည်။ အဆိုပါ ကလေးငယ်၏ မိခင်လည်း ခြေထောက် မီးလောင်၍ ဒဏ်ရာ ရရှိထားကြောင်း သိရှိ ရပါသည်။ ထို့အပြင် အခြား ဒေသခံ ရိုဟင်ဂျာ ၁၀ ဦးလည်း မီးလောင်မှုကြောင့် ဒဏ်ရာ ရရှိခဲ့ကြောင်း ဒေသခံများမှ RB News သို့ပြောပါသည်။

ဒါးပိုင်ရွာ အတွင်းတွင် ဆေးခန်းရှိသော်လည်း ဆေးကုသ ပေးမည့်သူ မရှိသဖြင့် ဒဏ်ရာ ရရှိသူများမှာ အခက်အခဲ ကြုံတွေ့လျက် ရှိသည်။ ယခင်က ဆေးကုသ ပေးသူများမှာ လွန်ခဲ့သည့် ဖေဖော်ဝါရီလ နောက်ဆုံးပတ်တွင် လုပ်ငန်း ရပ်ဆိုင်းခံရသည့် နယ်စည်း မခြား ဆရာဝန်များ အဖွဲ့ (MSF) ဖြစ်သည်။ ယခု မီးလောင်မှုကြောင့် ဒဏ်ရာ ရရှိသူများကို ဆေးပညာ ဗဟုသုတ ရှိသူများမှ တတ်နိုင် သရွေ့ ကုသပေးလျက် ရှိသော်လည်း၊ မလိုအပ်သည့် ရောဂါများ ကူးစက်လာမည်ကို စိုးရိမ်ရကြောင်း ဒေသခံများက ပြောပါသည်။ ကြက်ခြေနီ အသင်းမှ လာရောက် ကူညီမည်ဟု မျှော်လင့်လျက် ရှိသော်လည်း ယခု အချိန်ထိ လာရောက်၍ ကူညီပေးခြင်း မရှိဟု ဆိုသည်။

ဒါးပိုင်ရွာ အတွင်းရှိသူ များမှာ ဒုက္ခသည် ဘ၀သို့ ရောက်ရှိ ခဲ့သော်လည်း ၎င်းတို့တွင် နေအိမ်များ ရှိနေခြင်းကြောင့် ဒုက္ခသည်များဟု မသတ်မှတ် သဖြင့် ကမ္ဘာ့ စားနပ် ရိက္ခာ အဖွဲ့ (WFP) မှ အကူအညီများ မရရှိသည့် အတွက် နေ့စဉ် စားဝတ် နေရေး ဖြေရှင်းရန် ခက်ခဲ နေသူများလည်း ဖြစ်သည်။ အိုးမဲ့အိမ်မဲ့ ဖြစ်ပွားသွားသူ များမှာ ပိုင်ဆိုင်မှုများ အားလုံး ဆုံးရှုံး သွားသဖြင့် ၎င်းတို့အား ဆွေမျိုး မိတ်သင်္ဂဟ များကသာ ကူညီမည်ကို မျှော်လင့်နေရပြီး၊ အစိုးရမှ ဒုက္ခသည် စခန်းသို့ ပို့ဆောင်ပေးမှသာ ၎င်းတို့ အသက်ရှင်ရေး အတွက် မျှော်လင့်ချက် ရှိမည်ဟု ဒေသခံများက ဆိုသည်။

မီးလောင်နေသည်ကို ကြည့်ရှုနေသည့် ရဲများမှာ မီးသတ်ရန် လာသည့် ကားများကို နှောင်းနှေး ကြန့်ကြာအောင် ပြုလုပ်ထားပြီး၊ မီးလောင်နေသည်ကို ကြည့်ရှု၍ ရယ်မော လှောင်ပြောင် နေခဲ့ကြောင်း မျက်မြင် သက်သေများက RB News သို့ ပြောပါသည်။

မှတ်ချက်။ ။ ရခိုင်ပြည်နယ်တွင် ရိုဟင်ဂျာများကို ဆေးဝါး ကုသပေးနေသည့် MSF အဖွဲ့ မရှိတော့သဖြင့် အများစုမှာ ဒဏ်ရာ ရရှိလျှင် ကိုယ့်အားကိုး၍ ဖြေရှင်းရမည် ဖြစ်သည်။ ထို့ကြောင့် ဒဏ်ရာ ရရှိပါက ဒဏ်ရာနှင့် အနီးတ၀ိုက်ကို သန့်ရှင်း စင်ကြယ်သော ဆပ်ပြာ၊ သန့်ရှင်းသော ရေဖြင့် အရင် ဆေးကြောပါ။ ထို့နောက် ဆေးလိမ်း၍ သန့်ရှင်းသော အ၀တ် (သို့) ပက်တီးပတ်၍ မဖြစ်ပွားသင့်သည့် ရောဂါ ကူးစက် ပြန့်ပွားခြင်းမှ ကာကွယ်ပါ။