နောက်ဆုံးသတင်း/ဆောင်းပါးများ

ကျောက်ဖြူ - ယူနန် ရေနံစိမ်း ပိုက်လိုင်း စီမံကိန်း ဒေသခံတွေ အတွက် အကျိုး ရှိရဲ့လား



မသိင်္ဂီထိုက်
1.2.2015

ရခိုင်ပြည်နယ် ကျောက်ဖြူ မြို့နယ်၊ မဒေးကျွန်းကနေ မြန်မာနိုင်ငံကို ကန့်လန့်ဖြတ်ပြီး တရုတ်ပြည် ဘက်ကို တင်ပို့မယ့် ရေနံပိုက်လိုင်း ကိုတော့ သောကြာနေ့က အခမ်းအနားနဲ့ ဖွင့်လှစ် လိုက်ပြီ ဖြစ်ပါတယ်။ တနှစ်ကို ရေနံ တန်ချိန် သန်း ၂၀ ကျော် တင်ပို့မယ့် ဒီရေနံပိုက်လိုင်း စီမံကိန်းကြီးကြောင့် ဒေသခံတွေ အတွက် အလုပ် အကိုင်တွေ ဘယ်လောက် ဖန်တီး ပေးနိုင်ခဲ့လဲ ဆိုတာနဲ့ ဒေသတွင်း စီးပွားရေး ဖွံ့ဖြိုးရေး အတွက် ဘယ်လောက် အထောက် အကူ ဖြစ်စေလဲ ဆိုတာကိုတော့ မသိင်္ဂီထိုက်က စုစည်း တင်ပြ ပေးထား ပါတယ်။

မြန်မာနိုင်ငံ အနောက်ဘက် ကမ်းရိုးတန်း ရခိုင်ပြည်နယ် ကျောက်ဖြူမြို့နယ် မဒေးကျွန်း ကနေ မြန်မာနိုင်ငံ အလယ်ပိုင်း တကြောကို ဖြတ်ပြီး တရုတ်ပြည်ကို တိုက်ရိုက် သွယ်တန်း ထားတဲ့ ရေနံပိုက် လိုင်းကြီးကိုတော့ သောကြာနေ့က တရားဝင် ဖွင့်လှစ်လိုက်ပြီး ဖြစ်ပါတယ်။ မိုင် ၅၀၀ နီးပါး ရှည်တဲ့ ဒီရေနံ ပိုက်လိုင်းကြီးက ရခိုင်ပြည်နယ် မဒေးကျွန်းက စပြီး မန္တလေး၊ လားရှိုး၊ မူဆယ်၊ ရွှေလီကို ဖြတ်သန်းပြီး တရုတ်ပြည် ကူမင်းကို တိုက်ရိုက် တင်ပို့နေပါပြီ။ တနှစ်ကို ရေနံစိမ်း တန်ချိန် ၂၂ သန်းလောက် အထိ တင်ပို့ဖို့လည်း ရည်ရွယ် ထားပါတယ်။

သောကြာနေ့က မဒေးကျွန်းမှာ ရေနံပိုက်လိုင်းအောင်ပွဲ ဖွင့်ပွဲ ကျင်းပတာမှာ မြန်မာ အစိုးရ စွမ်းအင် ၀န်ကြီး ဦးဇေယျာအောင်နဲ့ ပြည်ထောင်စု ၀န်ကြီးတွေ၊ ရခိုင် ပြည်နယ် ၀န်ကြီးချုပ် ဦးမောင်မောင်အုန်း၊ ကျောက်ဖြူမြို့နယ် လွှတ်တော် အမတ်တွေနဲ့ မြန်မာ ဆိုင်ရာ တရုတ် သံအမတ် Yang Houlan၊ တရုတ် အမျိုးသား ရေနံ ကော်ပိုရေးရှင်း အထွေထွေ မန်နေဂျာ Liao Yongyuan တို့ တက်ရောက် ခဲ့ကြတာပါ။ ဖွင့်ပွဲမှာ ရေနံစိမ်း တင်ပို့မှုဟာ တရုတ်ရော မြန်မာပါ ဝေမျှသုံးစွဲဖို့ ဖြစ်ပြီး ဒီစီမံကိန်းကြောင့် မြန်မာနိုင်ငံ တွင်းက ဒေသခံတွေ အတွက် အလုပ်အကိုင်တွေ ဖန်တီး ပေးသလို လူထု စီးပွား ဖွံ့ဖြိုးမှုတွေလည်း ခံစားရမှာ ဖြစ်တယ်လို့ ပြည်ထောင်စု စွမ်းအင်ဝန်ကြီး ဦးဇေယျာအောင်က ပြောခဲ့တာပါ။ ဒီဖွင့်ပွဲကို ကိုယ်တိုင် တက်ရောက်ခဲ့တဲ့ ရခိုင်ပြည်နယ်၊ ကျောက်ဖြူမြို့နယ် ပြည်သူ့ လွှတ်တော် အမတ် ဦးဘရှင် ကတော့ ဒေသခံတွေ အတွက် အနာဂတ် အလုပ်အကိုင် အခွင့် အလမ်းတွေ သေချာအောင် လုပ်ဖို့တော့ လိုတယ်လို့ ပြောဆိုပါတယ်။

“ရွာသားတွေကို ဖွံ့ဖြိုးရေး လုပ်ငန်းတွေ လုပ်ပေးတာပေါ့ဗျာ။ ဒါပေမယ့် သူတို့ မူလက လုပ်ကိုင် နေခဲ့တဲ့ လုပ်ငန်းတွေကို နောင် အသက်မွေးဝမ်းကျောင်း လုပ်ငန်း တခု အနေနဲ့ ပျိုးထောင်ပေးဖို့ အစီအစဉ်လည်း ဘာမှ မသေချာ သေးဘူး။ ဒီရွာမှာ အလုပ် ရတယ် ဆိုတာလည်း labor အဆင့်၊ hard labor အလုပ်ကြမ်း သမား အဆင့်ပဲ ရပါတယ်။ အစိုးရက မပြောင်းလဲဘူး၊ မထိခိုက်ဘူးလို့ ပြောနေပေမယ့် ကျနော် ကတော့ ထိခိုက်တယ်လို့ မြင်တာပဲ။ ဒီလုပ်ငန်း အသစ်လုပ်လိုက်တဲ့ အတွက်ကြောင့် မူလ လုပ်ငန်းတွေ ပျက်စီး သွားတာပဲ၊ ပြောင်းလဲ သွားတာပဲ။ ဒီအပေါ်မှာ ဘယ်လို အစီအစဉ်နဲ့ ကူညီပေးမလဲ ဆိုတဲ့ဟာနဲ့ ဒေသခံတွေ အတွက် - စနစ်တကျ မရှိသေးဘူး ပေါ့ဗျာ။ သူတို့ လုပ်ပေးချင်တယ် ဆိုတဲ့ ဆန္ဒလောက်ပဲ ခေါ်ပြောတာ ရှိတယ်။ ကျနော်တို့ နိုင်ငံ အတွက်လည်း စက်မှု ထူထောင်မှု လုပ်ငန်း လုပ်ရမှာပေါ့ဗျာ။ လုပ်တဲ့အခါ ပွင့်ပွင့် လင်းလင်း သိချင်တယ်၊ ပွင့်ပွင့် လင်းလင်း ပြောချင်တယ်။ ကျနော်တို့ ဒါတွေ လုပ်ထား တယ်ဗျာ၊ ကြည့်ကြ။ အဲဒီလို လာကြည့်ကြလို့ ခေါ်တဲ့ အဖြစ်မျိုးနဲ့တော့ မကျေနပ်ဘူး။ ဘ၀င် မကျလှဘူးပေါ့။”

ဒီရေနံပိုက်လိုင်းနဲ့ ပတ်သက်ပြီး သဘာဝ ပတ်ဝန်းကျင် ထိခိုက်မှုတွေ ကိုလည်း စိုးရိမ်မှုတွေ ကတော့ ရှိနေဆဲပါ။ ဒီပိုက်လိုင်းကို အကောင် အထည် ဖော်တဲ့ တရုတ်နိုင်ငံပိုင် တရုတ် အမျိုးသား စွမ်အင် ကော်ပိုရေးရှင်း CNPC ရဲ့ အထွေထွေ မန်နေဂျာ Liao Yongyuan ကတော့ ဒီပိုက်လိုင်း စီမံကိန်းက ကော်ပိုရေးရှင်း အတွက် အခက်ခဲဆုံး လုပ်ငန်းကြီး တခု ဖြစ်တယ်လို့ ဖွင့်ပွဲနေ့မှာ အခုလို ပြောသွား ပါတယ်။

ဒီစီမံကိန်းကြီး ကတော့ တရုတ် အမျိုးသား ရေနံ ကော်ပိုရေးရှင်းက အကောင်အထည် ဖော်ခဲ့တဲ့ လုပ်ငန်း တွေထဲမှာ အခက်ခဲဆုံး စီမံကိန်း ဖြစ်ပါတယ်။ ဒီစီမံကိန်းရဲ့ ဆောက်လုပ်ရေး လုပ်ငန်းစဉ် တွေကို ပြုစုပြီး ပိုက်လိုင်း တည်ဆောက်ရေး ပြဌာန်း စာအုပ် ထဲမှာတောင် ထည့်သွင်း သင့်ပါတယ်။ ဒီပိုက်လိုက်ကြီးကို ပေ ၂၇၀ လောက် အနက်ကနေ ဖြတ်သန်းပြီး တောင်တန်းပေါင်း များစွာကို ဖြတ်ပြီး ကျနော်တို့ တည်ဆောက် ခဲ့တာပါ-လို့ တရုတ် အမျိုးသား ရေနံ ကော်ပိုရေးရှင်းရဲ့ အထွေထွေ မန်နေဂျာက ပြောဆို ခဲ့တာ ဖြစ်ပါတယ်။

ဒီရေနံ ပိုက်လိုင်း စီမံကိန်းရဲ့ပိုင်ဆိုင်မှု ၅၀.၉ % ကို တရုတ် အမျိုးသား ရေနံ ကုမ္ပဏီက ရယူထားပြီး မြန်မာ အစိုးရ စွမ်းအင် ၀န်ကြီး ဌာနက ၄၉.၁ % ပိုင်ဆိုင် ပါတယ်။ တရုတ် အစိုးရပိုင် တရုတ် အမျိုးသား ရေနံ ကော်ပိုရေးရှင်းကပဲ တည်ဆောက် ခဲ့တဲ့ ကျောက်ဖြူ ကနေ တရုတ် နိုင်ငံဆီကို တင်ပို့တဲ့ သဘာဝ ဓာတ်ငွေ့ ပိုက်လိုင်း ကိုတော့ ၂၀၁၃ ခုနှစ် ဇူလိုင်လက စတင် ပို့လွှတ်နေတာ ဖြစ်ပါတယ်။ ဒီသဘာဝ ဓာတ်ငွေ့ ပိုက်လိုင်း စီမံကိန်းမှာ တရုတ်၊ မြန်မာ၊ တောင်ကိုးရီးယား၊ အိန္ဒိယတို့က ရှယ်ယာ ပိုင်ဆိုင် ကြတာ ဖြစ်ပါတယ်။ ၂၀၁၃ ခုနှစ်ကနေ ၂၀၁၅ ခုနှစ် ဇန်န၀ါရီလအထိ ကျောက်ဖြူကနေ တရုတ်နိုင်ငံကို တိုက်ရိုက် တင်ပို့နေတဲ့ သဘာဝ ဓာတ်ငွေ့ ကုဗမီတာ သန်း ၄,၀၀၀ နီးပါး ရှိခဲ့ပြီး မြန်မာနိုင်ငံ အတွက်တော့ ကုဗမီတာ ၁၄၇ သန်း ပေးထားပြီး ဖြစ်တယ်လို့လည်း တရုတ်အစိုးရ စာရင်း ဇယားတွေမှာ ဖော်ပြ ထားပါတယ်။

Comment ရေးရန်

Rohingya Exodus