နောက်ဆုံးသတင်း/ဆောင်းပါးများ

မောင်တော အာဏာပိုင်များက ဒေသခံများကို အစည်းအဝေး ခေါ်ပြီး ခြိမ်းခြောက်




MYARF
RB News
15.2.2015

မောင်တော ။ ။ ရခိုင်ပြည်နယ်၊ မောင်တော မြို့နယ်ရှိ အုပ်ချုပ်ရေး အာဏာပိုင်များ၊ နယ်ခြားစောင့် ရဲတပ်ဖွဲ့နှင့် လ.၀.က တို့က ဒေသခံများကို အစည်းအဝေး ခေါ်ယူ၍ ခြိမ်းခြောက်မှုများ ပြုလုပ်ခဲ့ကြောင်း သတင်း ရရှိပါသည်။

ယနေ့ ဖေဖော်ဝါရီလ ၁၅ ရက်နေ့ နံနက်ပိုင်းတွင် မောင်တောမြို့နယ် မြို့နယ် အုပ်ချုပ်ရေး အာဏာပိုင်များ၊ ခရိုင် လ.၀.က ဒုညွန်ကြားရေးမှူး၊ နယ်ခြားစောင့် ရဲတပ်ဖွဲ့ ကွပ်ကဲရေးမှူး ရဲမှူးချုပ် တင်ကိုကိုနှင့် အလယ်သံကျော်ရှိ နယ်ခြားစောင့် ရဲတပ်ဖွဲ့ တပ်ရင်းမှူး တို့သည် ဇော်မတက် ကျေးရွာရှိ ကျောင်း၌ ကံပူး၊ အလယ်သံကျော်၊ အလယ်သံကျော် ကညင်းတန်း၊ ချိန်ခါလီ၊ သံဒါ၊ ၀ါးချ၊ ဇော်မတတ်၊ ပညောင်ပင်ကြီး၊ သရေကုန်တန်း စသော ကျေးရွာများမှ ကျေးရွာ အုပ်ချုပ်ရေးမှူးများ၊ ရပ်မိရပ်ဖများ၊ ဗလီရှေ့ဆောင် ဆရာများ စသည်တို့ကို အစည်းအဝေး ခေါ်ယူခဲ့သည်။

အစည်းအဝေးတွင် ရှေးဦးစွာ ရဲမှူးချုပ် တင်ကိုကိုက ရိုဟင်ဂျာ လူမျိုး ဆိုသည်မှာ ဤနိုင်ငံတွင် ယခင်ကလည်း မရှိခဲ့၊ ယခုလည်း မရှိကြောင်း၊ ရိုဟင်ဂျာ ဆိုသည့် အသုံးအနှုန်းကို ဆက်လက် မသုံးစွဲရန်၊ အကယ်၍ သုံးစွဲပါက ဒုက္ခရောက်မည်ဟု ကြမ်းတမ်း ပြောဆို၍ ခြိမ်းခြောက် ခဲ့ကြောင်း ဒေသခံ တစ်ဦးက RB News သို့ပြောသည်။ ထို့နောက် နယ်ခြားစောင့် ရဲတပ်ဖွဲ့ တပ်ရင်းမှူးက လုံခြုံရေးနှင့် ပတ်သက်၍ ပြောကြားပြီး၊ မြို့နယ် အုပ်ချုပ်ရေးမှူးက ဥပဒေကို လေးစား လိုက်နာရန်၊ အာဏာပိုင်များ ညွန်ကြားထားသည့် အတိုင်း အေးဆေးစွာ နေထိုင်ရန် ပြောကြားခဲ့သည်။ ၎င်းက ဥပဒေကို လေးစားလိုက်နာလျှင် ဦးရာဇတ်ကဲ့သို့ နိုင်ငံတော် အဆင့်ထိ ပါဝင်ခွင့်ရမည်ဟု ပြောကြားခဲ့ကြောင်း အဆိုပါ ဒေသခံက ပြောပါသည်။

နောက်ဆုံးတွင် လ.၀.က ဒုညွန်ကြားရေးမှူးက ယာယီ သက်သေခံ ကဒ်ပြားများ ရုတ်သိမ်းခြင်းမှာ ဒေသခံများ သွားလာရေး ခက်ခဲသွားစေရန် အတွက်သာ ဖြစ်ပြီး၊ ယခုအခါ ယာယီကဒ်များဖြင့် သွားလာရေး အဆင်ပြေနေသည့် အတွက် နိုင်ငံသားကဒ်များ လျှောက်ထားခြင်း မရှိကြောင်း၊ နိုင်ငံတော်၏ အမိန့်ကို မနာခံကြကြောင်း၊ ထို့ကြောင့် ဒေသခံများထံမှ ယာယီကဒ်များ ရုတ်သိမ်းခြင်း ဖြစ်ကြောင်း၊ သွားလာရေး ခက်ခဲလာလျှင် နိုင်ငံသား အတွက် လျှောက်ရမည် ဖြစ်ကြောင်း၊ ၁၉၈၂ ခုနှစ် နိုင်ငံသား ဖြစ်မှု ဥပဒေအရ ဟိန္ဒူလူမျိုးများကို နိုင်ငံသားပြုကဒ် အစိမ်းကဒ်များ ပေးသကဲ့သို့ ထုတ်ပေးသွားမည် ဖြစ်ကြောင်း၊ ယခု တစ်ကြိမ်တွင် မည်သူမှ ငြင်း၍ ရမည် မဟုတ်ကြောင်း၊ အကယ်၍ ငြင်းလျှင် ဥပဒေအရ ထိရောက်စွာ အရေးယူခြင်း ခံရမည်ဟု ခြိမ်းခြောက် ပြောဆိုခဲ့ကြောင်း သိရသည်။

ထို့နောက် ၎င်း အာဏာပိုင် အဖွဲ့သည် ဂေါ်ဒူသာရ ကျေးရွာသို့ သွားရောက်ပြီး ရွာသားများကို အစည်းအဝေး ခေါ်ယူခဲ့သော်လည်း ရွာသားများ တက်ရောက်ခြင်း မရှိခဲ့ကြောင်း သိရသည်။ ၎င်းတို့သည် ဂေါ်ဒူသာရ ကျေးရွာတွင် နေ့လည်စာ စားသုံးပြီး နေ့လည် ၂း၄၅ နာရီ အချိန်တွင် ဘဂုံးနား (တပ်ဦးချောင်း) သို့ သွားရောက်ပြီး ကျောင်း၌ အစည်းအဝေး ကျင်းပခဲ့သည်။ ထိုအစည်းအဝေး တွင်လည်း ဇော်မတက်တွင် ပြောကြားခဲ့သည့် အတိုင်း ပြောကြားခဲ့ပြီး၊ နေ့လည် ၃း၃၀ နာရီတွင် အစည်းအဝေး ရုပ်သိမ်းခဲ့သည်။ လ.၀.က ဒုညွန်ကြားရေးမှူးက ဖြည့်စွက်၍ ဘင်္ဂလီ အခေါ်ခံရလျှင်လည်း ဘင်္ဂလားဒေ့ရ်ှသို့ ပို့ခံရမည် မဟုတ်ကြောင်း၊ ဤနိုင်ငံတွင်သာ ဆက်လက် နေထိုင်ခွင့် ရမည် ဖြစ်ကြောင်း၊ ဘင်္ဂလားဒေ့ရ်ှတွင်လည်း ရခိုင်များ ရှိကြောင်း၊ ၎င်းတို့ကိုလည်း ရခိုင်ဟုသာ ခေါ်ကြပြီး ရခိုင်ပြည်နယ်သို့ နှင်ထုတ်ခြင်း မရှိဘဲ ဘင်္ဂလားဒေ့ရှ် နိုင်ငံတွင်သာ နေထိုင်စေကြောင်း၊ ယခု ဤနိုင်ငံရှိ ဘင်္ဂလီများလည်း ထိုကဲ့သို့ပင် ဖြစ်ကြောင်း ပြောဆိုခဲ့သည်ဟု ဒေသခံများက ပြောပါသည်။

Comment ရေးရန်

Rohingya Exodus