ခြံဝင်း အတွင်း ထိုင်စကားပြောနေသည့် ဒေသခံ (၅) ဦးကို အကြောင်းမဲ့ ဖမ်းဆီး၍ ငွေ ၁၀ သိန်းညှစ်
Rohingya Eye & MYARF
RB News
1.3.2015
မောင်တော ။ ။ ရခိုင်ပြည်နယ်၊ မောင်တောမြို့နယ် အလယ်သံကျော် ကညင်တန်း ကျေးရွာ အုပ်စု၊ ဒုတန်းရွာတွင် ခြံဝင်း အတွင်း ထိုင်စကားပြောနေသည့် ဒေသခံ (၅) ဦးကို နယ်ခြားစောင့် ရဲများက ဖမ်းဆီး၍ ငွေကျပ် ၁၀ သိန်း ညှစ်ခဲ့ကြောင်း သတင်း ရရှိပါသည်။
ဖေဖော်ဝါရီလ (၂၆) ရက်နေ့ ည ၉း၃၀ နာရီ အချိန်တွင် မောင်တောမြို့နယ် အလယ်သံကျော် ကညင်တန်း ကျေးရွာ အုပ်စု၊ ဒုတန်းရွာရှိ ဦးဖူရူခ် အာမတ် (ဘ) ဦးအာဘူလ် ဟူဆောင်း (အသက် ၄၉ နှစ်) ၏ ခြံဝင်းအတွင်းတွင် ဖေရုစ် (ဘ) ဦးအလီဇူဟာရ် (အသက် ၂၆ နှစ်)၊ မော်လ၀ီမိုဟာမတ် အာလာမ် (ဘ) မော်လ၀ီ မာမတ် အစ္စလာမ် (အသက် ၂၇ နှစ်)၊ နူရ်အာလာမ် (ဘ) ဦးနူရ်ဆလာမ် (အသက် ၂၈ နှစ်) နှင့် အာဇီဇူလ္လာ (ဘ) ဦးနူရ်ဇော်မာ (အသက် ၁၈ နှစ်) တို့ (၅) ၀ိုင်းဖွဲ့၍ ထိုင်စကားပြောနေစဉ် ရွာအတွင်း ကင်းလှည့်နေသည့် နယ်ခြားစောင့် ရဲများ ရောက်ရှိလာပြီး အကြောင်းမဲ့ ဖမ်းဆီး၍ အုပ်ချုပ်ရေးမှူး ရုံးသို့ ခေါ်ဆောင် သွားခဲ့သည်။
နယ်ခြားစောင့် ရဲများက ၎င်းတို့ ငါးဦးကို ဆွေးနွေးမှုများ ပြုလုပ်နေသည်ဟု ပြောဆို စွပ်စွဲ၍ ငွေကျပ် ၂၅ သိန်း ညှစ်ရာ၊ ဖမ်းဆီးခံရသည့် အပြစ်မဲ့ ၅ ဦးက နယ်ခြားစောင့် ရဲများ တောင်းခံသည့် ငွေကို မတတ်နိုင်သောကြောင့် (၃) နာရီကြာ ချုပ်နှောင်ထားပြီး နောက်ဆုံးတွင် ငွေကျပ် ၁၀ သိန်း ညှစ်ယူ၍ ပြန်လည် လွှတ်ပေးခဲ့ကြောင်း ဒေသခံ တစ်ဦးက RB News သို့ပြောသည်။
“ပုဒ်မ ၁၄၄ အချိန်မှာ လမ်းမှာ ထိုင်စကားပြောလို့ ဖမ်းတာဆိုရင် တစ်မျိုးပါ၊ အိမ်ခြံဝင်း အတွင်းမှာ ထိုင်စကားပြော နေတာကို ဖမ်းပြီး ငွေညှစ်တာကတော့ မတရားလုပ်တာပါ” ဟု အဆိုပါ ဒေသခံမှ ပြောပါသည်။
ဖေဖော်ဝါရီလ (၂၆) ရက်နေ့ ည ၁၀ နာရီ အချိန်တွင် မောင်တောမြို့နယ် တောင်ပိုင်း ပဒင်း ကျေးရွာ အုပ်စု၊ ရေပုံးပြင်ရွာ၊ မူလတန်းကျောင်းတွင် အခြေစိုက်သည့် နယ်ခြားစောင့် ရဲများသည် ကျောင်းနှင့် မနီးမဝေးတွင် ရှိသော ဆိုင်သို့ သွားရောက်၍ ဈေးဝယ်နေသည့် ဟာဖီးဇ် အီဒီရိစ် (ဘ) ဦးမာမတ်ဇော်လိလ် (အသက် ၂၀ နှစ်)၊ မော်လ၀ီ အာဇီဇူမာန် (ဘ) ဦးအာမီးရ်ဟမ်းဇာ (အသက် ၂၂ နှစ်) နှင့် ဦးဘာဆာမျာ (အသက် ၅၀ နှစ်) တို့ကို အကြောင်းမဲ့ လူမဆန်စွာ ရိုက်နှက်သည့် အပြင် ဆိုင်ရှင် ဖြစ်သူ ဦးဟူစိန်းအာမတ် (ဘ) ဦးအိုလာမျာကိုလည်း ပါးရိုက်ခဲ့သည်။ ထို့နောက် အဆိုပါ နယ်ခြားစောင့် ရဲများသည် လမ်းတွင် တွေ့သမျှ ဒေသခံများကို အော်ဟစ်ဆဲဆို ခဲ့ကြောင်း ဒေသခံ တစ်ဦးက RB News သို့ပြောသည်။ အဆိုပါ နယ်ခြားစောင့် ရဲများသည် အရက်သေစာ သောက်စား၍ မူးယစ်ပြီး ရွာသားများကို မကြာခဏ အကြောင်းမဲ့ ရိုက်နှက်လေ့ ရှိကြောင်း အဆိုပါ ဒေသခံက ပြောပါသည်။
