ဇင်ပိုင်ညာမှ နယ်ခြားစောင့် ရဲများက ဘင်္ဂလား ဆင်းမ်ကဒ် များဖြင့် ဒေသခံ များကို လုပ်ကြံ၍ ငွေညှစ်

Rohingya Eye

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ ကျောက်လှေကား ကျေးရွာ အခြေစိုက်၊ နယ်မြေ (၆) နယ်ခြားစောင့် ရဲတပ်ဖွဲ့၏ လက်အောက်ခံ ဇင်ပိုင်ညာ ကျေးရွာ၊ ဖူးတ်ခါလီရွာ အခြေစိုက် ကင်းစခန်းမှ နယ်ခြားစောင့် ရဲများသည် စက်တင်ဘာလ (၃) ရက်နေ့တွင် မောင်နှမ ကျေးရွာမှ မင်္ဂလာကြီး ကျေးရွာသို့ ဆိုင်ကယ်စီး၍ သွားနေသည့် မောင်နှမ ကျေးရွာမှ ဒေသခံ လူငယ် အဒူလ်ဟာကိမ်း (ဘ) မော်လ၀ီရှော်ဘိရ် (အသက် ၂၁ နှစ်) ကို ကင်းစခန်း ရှေ့တွင် စစ်ဆေးခဲ့ရာ တရားမ၀င် ပစ္စည်း တစ်စုံတစ်ရာ မတွေ့ရှိခဲ့သော်လည်း နယ်ခြားစောင့် ရဲများက ၎င်း၏ အင်္ကျီအိတ်ကပ် ထဲသို့ ဘင်္ဂလား ဆင်းမ်ကဒ် တစ်ခု ထည့်ပေးကာ ဘင်္ဂလား ဆင်းမ်မိသည်ဟု လုပ်ကြံ၍ ငွေကျပ် လေးသိန်း ငါးသောင်း ညှစ်ယူပြီး ပြန်လည် လွှတ်ပေးခဲ့ကြောင်း ဒေသခံ တစ်ဦးက RB News သို့ပြောပါသည်။ 

အဆိုပါ ကင်းစခန်းမှ နယ်ခြားစောင့် ရဲများသည် သြဂုတ်လ (၂၈) ရက်နေ့ကလည်း ၎င်းတို့ အခြေစိုက်သည့် ရွာမှ စားကုန်ဆိုင် ပိုင်ရှင် မော်လ၀ီ ဆော်လိမ် (ဘ) ဦးအာမောတ်ဟူစိန်း (အသက် ၂၃ နှစ်) ၏ ဆိုင်ထဲသို့ ၀င်ရောက် ရှာဖွေ စစ်ဆေးပြီးနောက် တရားမ၀င် ပစ္စည်း မရရှိခဲ့သော်လည်း ဆိုင်ထဲတွင် ဘင်္ဂလားဆင်းမ်ကဒ် တစ်ခုကို ရဲများကိုယ်တိုင် ထားကာ ဘင်္ဂလားဆင်းမ် မိသည်ဟု လုပ်ကြံ စွပ်စွဲ၍ ငွေကျပ် နှစ်သိန်း ညှစ်ယူခဲ့သည်။ 

ယင်းနေ့တွင်ပင် အဆိုပါ နယ်ခြားစောင့် ရဲများသည် ဇင်ပိုင်ညာ ကျေးရွာမှ ဖြတ်သန်း သွားနေသည့် ကျောက်လှေကား ကျေးရွာမှ ဦးဟာရှိမ်း (ဘ) ဦးနူရ်အာမတ် (အသက် ၃၅ နှစ်) ကို စစ်ေးဆပြီး၊ ရဲများ၏ ထုံးစံအတိုင်း ဘင်္ဂလား ဆင်းမ်ကဒ် တစ်ခုကို အိတ်ထဲ ထည့်ပေးကာ ဘင်္ဂလား ဆင်းမ်ကဒ် မိသည်ဟု လုပ်ကြံ၍ ငွေကျပ် သုံးသိန်း ညှစ်ယူခဲ့ကြောင်း အဆိုပါ ဒေသခံက ပြောပါသည်။