ရပ်မိရပ်ဖ တစ်ဦး၊ စ.ရ.ဖ နှင့် SB တို့က ရွာသား နှစ်ဦးကို လုပ်ကြံစွပ်စွဲ၍ ငွေညှစ်

မောင်တော ။ ။ ရခိုင်ပြည်နယ်၊ မောင်တော မြို့ပေါ် ရပ်ကွက်မှ ရိုဟင်ဂျာ အမျိုးသမီး တစ်ဦးသည် ဒီဇင်ဘာလ (၁၅) ရက်နေ့တွင် ၎င်း၏ ဆွေမျိုး တော်စပ်သူ ရှိရာ မောင်တော မြို့နယ် မြောက်ပိုင်း၊ လောင်းဒုံ ကျေးရွာအုပ်စု၊ ဖောကီတောင်ရွာမှ ဦးရာမတ်အလီ (ဘ) ဦးအာမီးရ်ဟူစိန်း၏ အိမ်သို့ အလည်အပတ် ရောက်ရှိခဲ့သည်။ ၎င်းသည် ယင်းရွာရှိ ဦးမူန္နား (ဘ) ဦးမျာဟူစိန်း၏ မိသားစုနှင့် ခင်မင်ရင်းနှီး သဖြင့် (၁၆) ရက်နေ့တွင် ဦးမူန္နား အိမ်သို့ သွားရောက် လည်ပတ်ခဲ့ပြီး ညနေပိုင်းတွင် မောင်တောမြို့သို့ ပြန်သွားခဲ့သည်။ 

ဒီဇင်ဘာလ (၁၇) ရက်နေ့တွင် ဖောကီတောင်ရွာမှ ရပ်မိရပ်ဖ တစ်ဦး ဖြစ်သည့် မာရ်မာကြီး လူမျိုး ရွှေမောင် (ခ) ရှုးနားယားက ဦးရာမတ်အလီနှင့် ဦးမူန္နား တို့ကို ခေါ်ယူ၍ ၎င်းတို့ အိမ်သို့ လာရောက် လည်ပတ်ခဲ့သည့် အမျိုးသမီးမှာ အကျင့်ပျက် အမျိုးသမီးသာ ဖြစ်ကြောင်း၊ ၎င်းတို့ နှစ်ဦးက အကျင့်ပျက် အမျိုးသမီးနှင့် ဆက်ဆံခဲ့ကြောင်း၊ ရပ်မိရပ်ဖ တစ်ဦး အနေနှင့် နယ်ခြားစောင့် ရဲတပ်ဖွဲ့သို့ တိုင်တန်း ရမည် ဖြစ်ကြောင်း အမျိုးမျိုး ခြိမ်းခြောက်၍ နောက်ဆုံးတွင် ဦးရာမတ်အလီနှင့် ဦးမူန္နား တို့နှစ်ဦးထံမှ ငွေကျပ် သုံးသိန်း ညှစ်ယူခဲ့ကြောင်း ဒေသခံများက RB News သို့ပြောပါသည်။ 

၎င်းတို့ နှစ်ဦးက မဟုတ်မမှန် တိုင်တန်း၍ နယ်ခြားစောင့်ရဲများ ခေါ်လာလျှင် နယ်ခြားစောင့်ရဲ များက မှန်/မမှန် စီစစ်ခြင်း မပြုလုပ်ဘဲ နယ်ခြားစောင့်ရဲ များ၏ ထုံးစံအတိုင်း ဦးစွာ ဖမ်းဆီး ရိုက်နှက်မည်ဟူသော စိုးရိမ်စိတ်ဖြင့် ရွှေမောင်အား ငွေကျပ် သုံးသိန်း ပေးခဲ့ခြင်း ဖြစ်သည်။ 

ရွှေမောင်က နံနက်ပိုင်းတွင် ငွေညှစ်ယူပြီး နေ့လည်ပိုင်းတွင် ကြိမ်ချောင်းသို့ သွားရောက်ပြီး စ.ရ.ဖ နှင့် သတင်းတပ်ဖွဲ့ (SB) အား အကြောင်းကြားခဲ့သည်။ ထို့နောက် ညနေပိုင်းတွင် စ.ရ.ဖ က အဆိုပါ ရွာသား နှစ်ဦးကို ဆင့်ခေါ်ပြီး အကျင့်ပျက် အမျိုးသမီးကို အိမ်တွင်ထား၍ ဖျော်ဖြေခံခဲ့သည်ဟု အမျိုးမျိုး ခြိမ်းခြောက်၍ တစ်ဦးထံမှ ငွေကျပ် တစ်သိန်းစီ ညှစ်ယူခဲ့သည်။ စ.ရ.ဖ က လွှတ်ပေးလိုက်သည်နှင့် သတင်းတပ်ဖွဲ့ (SB) က ခေါ်သွားခဲ့သည်။ သတင်းတပ်ဖွဲ့ ကလည်း စ.ရ.ဖ အတိုင်း ငွေကျပ် နှစ်သိန်း ညှစ်ယူခဲ့သည်။ 

ဒီဇင်ဘာလ (၁၉) ရက်နေ့တွင် အကျင့်ပျက် အမျိုးသမီးဟု စွပ်စွဲခံရခြင်းကို အဆိုပါ အမျိုးသမီးက ကြားသိပြီး အလွန်ပင် ဒေါသ ထွက်ခဲ့သည်။ အဆိုပါ အမျိုးသမီးသည် မြို့ပေါ်နေ ပညာတတ် အမျိုးသမီး တစ်ဦး ဖြစ်ပြီး၊ ထိုကဲ့သို့ စွပ်စွဲမှုကြောင့် ရွှေမောင် (ခ) ရှုးနားယားအား တရားစွဲဆိုသွားရန် ပြင်ဆင် နေကြောင်း သိရသည်။