ထောင်တွင်း ညှဉ်းပန်း နှိပ်စက်မှုကြောင့် မော်လ၀ီ တစ်ပါး သေလုမျောပါး ဖြစ်နေ

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ်၊ ဖုံညိုလိပ် ကျေးရွာအုပ်စု၊ အမှတ် (၉) ရပ်ကွက်မှ မော်လ၀ီ ဦးအာရ်ဖာတ်အာမတ်ကို လက်ထပ်ခွင့် မယူဘဲ အိမ်ထောင်ပြု ခဲ့သည်ဟု ဆိုကာ ၂၀၁၄ ခုနှစ်တွင် ဖုံညိုလိပ်ရှိ နယ်ခြားစောင့်ရဲ များက ဖမ်းဆီးပြီး ထောင်ချခဲ့သည်။ အဆိုပါ မော်လ၀ီသည် ယခုအချိန်ထိ ဘူးသီးတောင် အကျဉ်းထောင်တွင် အကျဉ်းကျ ခံနေရသည်။

ဒီဇင်ဘာလ (၁၄) ရက်နေ့တွင် ဗိုလ်ကြီး အောင်မျိုးဟိန်းက လည်းကောင်း၊ (၁၅) ရက်နေ့တွင် ဆရာဇော်ဝင်းနှင့် ဆရာသက်နိုင် တို့က လည်းကောင်း မော်လ၀ီအာရ်ဖာတ်အာမတ်ကို လူမဆန်စွာ ရက်စက် ညှဉ်းပန်း နှိပ်စက်သောကြောင့် ၎င်း၏ ကျန်းမာရေး အခြေအနေမှာ အလွန် စိုးရိမ်ဖွယ်ရာ အခြေအနေသို့ ရောက်ရှိ နေကြောင်း ဒေသခံများက RB News သို့ပြောပါသည်။ အိပ်ရာမှ ထ၍လည်း မရ၊ အစာရေစာလည်း မစားနိုင်သည့် အပြင် စကားပင် ပြော၍မရ ဖြစ်နေသည်ဟု ဆိုသည်။ 

ယခုအခါ မော်လ၀ီ အာရ်ဖာတ်အာမတ်ကို ထောင်အာဏာပိုင်များက ထောင်တွင်း ဆေးရုံ၌ ပါးစပ်မှ တဆင့် လည်ချောင်းသို့ ပိုက်သွင်း၍ အရည်သာ တိုက်နေရသည်ဟု မျက်မြင် သက်သေ တစ်ဦး၏ ပြောပြချက်အရ သိရသည်။ ၎င်းအား ပါးစပ်မှ ပိုက်သွင်း၍ အရည်များ တိုက်နေသော်လည်း ၎င်း၏ ကျန်းမာရေးမှာ အသက် ဆုံးရှုံးဖွယ် အခြေအနေသို့ ရောက်နေသည်ဟု အဆိုပါ မျက်မြင် သက်သေက ထည့်သွင်း ပြောကြားခဲ့သည်။

လက်ထပ်ခွင့် မရယူဘဲ အိမ်ထောင်ပြုခြင်းသည် နိုင်ငံတော်အား ပုန်ကန်ခြင်း မဟုတ်၊ နိုင်ငံတော်ကို ဖျက်ဆီးခြင်း မဟုတ်၊ ဥပဒေ ချိုးဖောက်ခြင်းလည်း မဟုတ်သည့် အသေးအမွှား ကိစ္စတစ်ခုနှင့် မတရား ဖမ်းဆီးပြီး အသက်ဆုံးရှုံးရသည့် အထိ ရက်စက်ခြင်းသည် လုံးဝ လူသားမဆန်ခြင်း ဖြစ်ပြီး၊ ထိုသို့ လူမျိုးဘာသာ ခွဲခြား၍ ရက်စက်ခြင်းသည် ရိုဟင်ဂျာများကို မျိုးတုန်းအောင် ပြုလုပ်ခြင်းသာ ဖြစ်သည်ဟု ဒေသခံများက ပြောပါသည်။