လောင်းဒုံ၊ စေတီပြင်မှ နယ်ခြားစောင့်ရဲ များက ဒေသခံများကို လုပ်ကြံ စွပ်စွဲ၍ ငွေညှစ်

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ လောင်းဒုံ (စေတီပြင်) နယ်ခြားစောင့် ရဲတပ်ဖွဲ့ ကင်းစခန်းမှ တပ်ဖွဲ့ဝင်များသည် ကြိမ်ချောင်းဈေးမှ ဈေးသည် တစ်ဦးထံမှ ငွေကျပ် (၇) သောင်း ညှစ်ယူခဲ့ကြောင်း သတင်းရရှိပါသည်။ 

အမှတ် (၅) နယ်မြေ ငါးခူရ နယ်ခြားစောင့် ရဲတပ်ဖွဲ့ စခန်းအပိုင်၊ လောင်းဒုံ (စေတီပြင်) နယ်ခြားစောင့် ရဲတပ်ဖွဲ့ ကင်းစခန်းမှ ကင်းလှည့်နေသည့် နယ်ခြားစောင့်ရဲ များက ဖေဖော်ဝါရီလ (၁၅) ရက်နေ့ ည ၈ နာရီခန့် အချိန်တွင် ကြိမ်ချောင်းဈေးရှိ မိမိ၏ ဆိုင်ခန်းသို့ ညအိပ်ရန် သွားနေသည့် အာယားစ် (ဘ) ဦးဂေါ်ဖော်ရ် (အသက် ၂၃ နှစ်) ကို စစ်ဆေးခဲ့သည်။ ထိုသို့ စစ်ဆေးရာတွင် MPT ဆင်းမ်ကဒ် ပါရှိသည့် စမတ်ဖုန်း တစ်လုံး တွေ့ရှိသဖြင့် အမျိုးမျိုး လုပ်ကြံ စွပ်စွဲ ခြိမ်းခြောက်ပြီး ငွေကျပ် (၇) သောင်း ညှစ်ယူခဲ့ကြောင်း ဒေသခံ တစ်ဦးက RB News သို့ပြောသည်။ 

အလားတူ တစ်ချိန်တည်းမှာပင် စပယ်ကုံးကျေးရွာမှ အမည်မသိ လူငယ်တစ်ဦးသည် ကြိမ်ချောင်းဈေးမှ နေအိမ်သို့ ပြန်လာနေစဉ် အဆိုပါ နယ်ခြားစောင့်ရဲ များက စစ်ဆေးပြီး၊ တရားမ၀င် ပစ္စည်း တစ်စုံတစ်ရာ မရရှိသဖြင့် လူငယ်၏ အင်္ကျီအိတ်ထဲသို့ ဘင်္ဂလား ဆင်းမ်ကဒ် ထည့်သွင်းပေးပြီး လုပ်ကြံ စွပ်စွဲ၍ ငွေကျပ် (၂) သိန်း ညှစ်ယူခဲ့ကြောင်း အဆိုပါ ဒေသခံက ပြောပါသည်။ 

ဖေဖော်ဝါရီလ (၅) ရက်နေ့ ည ၈ နာရီခန့် အချိန်တွင် စေတီပြင် နယ်ခြားစောင့် ရဲတပ်ဖွဲ့ ကင်းစခန်းမှ စခန်းမှူး အပါအ၀င် တပ်ဖွဲ့ဝင် (၄) ဦးသည် ငါးစကြူး ကျေးရွာအုပ်စု၊ ပန်းမြောင်ရွာမှ ဦးဆွေတာလောမ်နှင့် ဦးဆွေယာဒ်မိုဟာမတ် တို့၏ နေအိမ်များသို့ ဘင်္ဂလားဖုန်း ရှာဖွေရန်ဟု ဆိုကာ နေအိမ်ထဲသို့ အတင်း ၀င်ရောက်ပြီး အမျိုးသမီး နှစ်ဦးကို လူမဆန်စွာ မုဒိန်းကျင့်ခဲ့သည်။ အဆိုပါ မုဒိန်းမှုနှင့် ပတ်သက်ပြီး ငါးခူရ နယ်မြေ အခြေစိုက် နယ်ခြားစောင့် ရဲတပ်ဖွဲ့ တပ်ရင်းမှူးကို ရပ်ရွာလူကြီးများက နည်းမျိုးစုံဖြင့် တိုင်တန်းခဲ့သော်လည်း တပ်ရင်းမှူးက ကမ္ဘာ့အလယ်တွင် နိုင်ငံ သိက္ခာကျဆင်းစေမည့် လုပ်ရပ်မျိုး ကျူးလွန်ခဲ့သည့် လက်အောက်ခံ တပ်ဖွဲ့ဝင်များကို မည်သို့မျှ အရေးမယူဘဲ မသိဟန်ဆောင် နေကြောင်း ဒေသခံများက ဝေဖန် ပြောဆိုနေကြသည်။