ဘူးသီးတောင်နှင့် မောင်တောတွင် ဆွဲ၊တင်၊စစ် ခေါင်းစဉ်ဖြင့် ငွေကြေး ကောက်ခံ လျက်ရှိ

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် မြောက်ပိုင်း သင်္ဂနား ကျေးရွာအုပ်စုတွင် မ.က.ဖ မှ ဖေဖော်ဝါရီလ (၁၄) ရက်နေ့မှ စ၍ ဆွဲ၊တင်၊စစ် စစ်ဆေးလျက် ရှိသည်။ အိမ်ထောင်စု တစ်စုလျှင် ဓါတ်ပုံ ရိုက်ခ ၅၀၀၀/- ကျပ်စီ ကောက်ခံလျက် ရှိသည်။ ယင်းကျေးရွာ အိမ်ထောင်စု (၇၇၀) ရှိပြီး၊ ၅၀၀၀/- ကျပ်နှုန်းဖြင့် ကောက်ခံလျှင် ငွေကျပ် ၃၈ သိန်းကျော် ရရှိမည် ဖြစ်သည်။ 

အိမ်ထောင်စု တစ်စုမှ အခြားတစ်စုသို့ ပြောင်းရွှေ့လျှင် မ.က.ဖ အား ငွေကျပ် ၁၅၀၀၀/- ပေးရသည့် အပြင် နှစ်နေရာလုံးမှ ကျေးရွာ အုပ်ချုပ်ရေးမှူးများ (ပြောင်းထွက် - ပြောင်းဝင်) ကို ငွေကျပ် ၅၀၀၀/- စီ -- စုစုပေါင်း ငွေကျပ် တစ်သောင်း ပေးရသည်။ ကလေး မွေးတိုးများကို ချက်ချင်း တင်မပေးဘဲ၊ မွေးစာရင် ဖိုင်တွဲကို လက်ခံယူပြီး နယ်မြေရုံးသို့ ရောက်မှသာ တင်ပေးမည်ဟု ပြောသည်။ မွေးတိုး ဖိုင်တွဲ လက်ခံယူရန် ငွေကောက်ခံခြင်း မရှိကြောင်း ဒေသခံများက RB News သို့ပြောပါသည်။ 

ဘူးသီးတောင် မြို့နယ် တောင်ပိုင်း၊ ဖုရားပြင်အောင်ပ ကျေးရွာတွင်လည်း လွန်ခဲ့သည့် အပတ်က စ၍ ဆွဲ၊တင်၊စစ် စတင် စစ်ဆေးလျက် ရှိသည်။ အိမ်ထောင်စု တစ်စုလျှင် ဓါတ်ပုံ ရိုက်ခ ငွေကျပ် ၃၀၀၀/- စီ ကောက်ခံလျက် ရှိသည်။ ယင်းရွာ အိမ်ထောင်စု တစ်ထောင်ကျော် ရှိသည်။ အိမ်ထောင်စု တစ်စုမှ အခြားတစ်စုသို့ ပြောင်းရွှေ့ခြင်း၊ ကလေး မွေးတိုး တင်ခြင်း၊ အသေအပျောက်များကို အိမ်ထောင်စု စာရင်းမှ ပယ်ဖျက်ခြင်း များကို လုံးဝ ပြုလုပ်ပေးခြင်း မရှိကြောင်း ဒေသခံများက ပြောပါသည်။ 

ဖုရားပြင်အောင်ပ ကျေးရွာမှ ဦးကော်ဘိရ်အာမတ် (ဘ) ဦးဘော်ဆိရ်အာမတ် က ယခု ဆွဲ၊တင်၊စစ် တွင် ပြောင်းရွှေ့ခွင့် မရလျှင်လည်း ညောင်ချောင်း နယ်မြေရုံးသို့ သွားရောက်၍ တင်မည်ဟု ဆိုကာ စိမ်းညှင်းပြာ ကျေးရွာသို့ သွားရောက်ပြီး၊ ၎င်း၏ ဇနီးကို ၎င်း၏ အိမ်ထောင်စု စာရင်းသို့ ပြောင်းတင်နိုင်ရန် စိမ်းညှင်းပြာ ကျေးရွာ အုပ်ချုပ်ရေးမှူး ဦးမာမတ်ဆာဒဲခ် ထံမှ ထောက်ခံချက် တောင်းရာ အုပ်ချုပ်ရေးမှူးက ငွေကျပ် တစ်သိန်းငါးသောင်း တောင်းခံခဲ့သည်။ ဦးကော်ဘိရ်အာမတ်သည် ဆင်းရဲသား တစ်ဦး ဖြစ်သောကြောင့် အုပ်ချုပ်ရေးမှူး တောင်းခံသည့် ငွေကို မပေးနိုင်သောကြောင့် ထောက်ခံစာ မရခဲ့ကြောင်း သိရသည်။ 

မောင်တော မြို့နယ်၊ မြို့ဦး ကျေးရွာ (ဧတာလျာ ကျေးရွာ) အုပ်စု၊ ဇင်တိုလ္လာရွာတွင် ဖေဖော်ဝါရီလ (၁၅) ရက်နေ့မှ စ၍ ဆွဲ၊တင်၊စစ် စတင် စစ်ဆေးလျက် ရှိသည်။ ဓါတ်ပုံရိုက်ခ ငွေကျပ် ၃၀၀၀/- စီ ကောက်ခံလျက် ရှိပြီး၊ ကလေးမွေးတိုး တင်ပေးခြင်း၊ အိမ်ထောင်စု တစ်စုမှ အခြား တစ်စုသို့ ပြောင်းရွှေ့ခြင်းများ ဆောင်ရွက် ပေးခြင်း မရှိကြောင်း ဒေသခံများက ပြောပါသည်။ 

မောင်တော မြို့နယ် တောင်ပိုင်း ဂေါ်ရာခါလီ (ချောင်းတောင်) ကျေးရွာတွင်လည်း ဖေဖော်ဝါရီလ (၁၃) ရက်နေ့မှ စ၍ ဆွဲ၊တင်၊စစ် စစ်ဆေးလျက် ရှိသည်။ ဓါတ်ပုံ ရိုက်ခ ငွေကျပ် ၃၀၀၀/- စီ ကောက်ခံလျက် ရှိပြီး၊ ကလေးမွေးတိုး များအတွက် ဖိုင်တွဲ လက်ခံရန် ငွေကျပ် ၅၀၀၀/- ကောက်ခံယူပြီး ချက်ချင်း တင်မပေးဘဲ နယ်မြေရုံးသို့ ရောက်မှသာ တင်ပေးမည်ဟု ပြောကြောင်း သိရသည်။ အပြောင်းအရွှေ့များ အတွက် ငွေကျပ် ၇၀၀၀/- မှ ၁၀၀၀၀/- အထိ ကောက်ခံလျက် ရှိသည်။ နှစ်နေရာလုံးမှ ကျေးရွာ အုပ်ချုပ်ရေးမှူး များကိုလည်း ထောက်ခံစာ အတွက် ငွေကျပ် ၃၀၀၀/- မှ ၅၀၀၀/- စီ ပေးရသည်ဟု ဒေသခံများက ပြောပါသည်။ 

မောင်တော မြို့နယ် မြောက်ပိုင်း၊ နယ်မြေ (၂)၊ အောင်ဇံ ကျေးရွာအုပ်စုတွင် ဆွဲ၊တင်၊စစ် စစ်ဆေးနေစဉ် ကလေးမွေးတိုး များကို ချက်ချင်း တင်မပေးဘဲ ငွေကျပ် တစ်သောင်းစီနှင့် ဖိုင်တွဲ လက်ခံယူပြီး ဆွဲ၊တင်၊စစ် ပြီးမှသာ တင်ပေးမည်ဟု ပြောကြားခဲ့သည်။ ယခုအခါ ဆွဲ၊တင်၊စစ် ပြီးဆုံးသွားပြီး ဖြစ်၍ ကလေး မွေးတိုး တင်ပေးရာတွင် နယ်ခြားစောင့် ရဲတပ်ဖွဲ့မှ ရဲမှူး ထောက်ခံချက်ကြေးဟု ဆိုကာ ထပ်မံ၍ ငွေကျပ် ၂၀၀၀/- စီ ကောက်ခံလျက် ရှိကြောင်း ဒေသခံများက RB News သို့ပြောပါသည်။