ကျောက်ချောင်း ကျေးရွာ အုပ်ချုပ်ရေးမှူးက ဒေသခံများက ခြိမ်းခြောက်၍ ငွေကြေးများ ကောက်ခံ၊ လူမှောင်ခို လုပ်ငန်းစတင်
RB News
22.11.2016
တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင်၊ တောင်ပြိုလက်ဝဲမြို့ ကျောက်ချောင်း ကျေးရွာ အုပ်ချုပ်ရေးမှူး ဦးမောင်မောင်စိုးက ဒေသခံ ပြည်သူများကို အမျိုးမျိုး ခြိမ်းခြောက်၍ ငွေညှစ်လျက် ရှိကြောင်း သတင်း ရရှိပါသည်။
မောင်တောမြို့နယ် မြောက်ပိုင်း ကျီးကန်းပြင်ရှိ နယ်ခြားစောင့်ရဲတပ်ဖွဲ့ ဌာနချုပ်နှင့် ကင်းစခန်း နှစ်ခု တိုက်ခိုက်ခံရပြီးနောက် စစ်တပ်က နယ်မြေရှင်းလင်းရေး အကြောင်းပြချက်ဖြင့် လူများ ဖမ်းနိုင်ဖွယ် ရှိသောကြောင့် စစ်ကြောင်းမှူး၊ တပ်ရင်းမှူးတို့ အတွက်ဟု ဆိုကာ ရွာသားများထံမှ ငွေကျပ် သိန်း ၃၀ ကောက်ခံခဲ့သည်။ ယင်းငွေမှ စစ်ကြောင်းမှူးနှင့် တပ်ရင်းမှူး တို့ကို ငွေကျပ် သိန်း ၁၀ ပေးခဲ့ကြောင်း သိရှိရသည်။ လိပ်ရမှ နယ်ခြားစောင့်ရဲတပ်ဖွဲ့ နယ်မြေမှူးကို ငွေကျပ် ၅ သိန်း ပေးပြီး၊ ကျန်သည့် ၁၅ သိန်းမှာ ၎င်း၏ လက်ထဲတွင် ရှိသည်ဟု ရွာသားများကို အစည်းအဝေးတွင် ပြောကြားခဲ့သည်။ ကျန်သည့် ငွေများကို ရွာသားများက ပြန်ပေးရန် တောင်းခံသည့် အခါ အမျိုးမျိုး ခြိမ်းခြောက်ကြောင်း၊ ရွာသား အချို့က မတတ်နိုင်သည့်ကြားက ပေးခဲ့ရသောကြောင့် ၎င်းတို့ စားဝတ်နေရေး အတွက် ပြန်လည် ရယူလိုကြောင်း၊ လုပ်ကိုင်စားသောက်ရန် ခက်နေသည့် အချိန်တွင် မိမိတို့၏ ငွေများ ပြန်မရသည့် အတွက် အခက်အခဲ ကြုံရကြောင်း ဒေသခံတစ်ဦးက RB News သို့ပြောသည်။
လွန်ခဲ့သည့် နိုဝင်ဘာလ (၁၅) ရက်နေ့ကလည်း လိပ်ရအခြေစိုက် နယ်ခြားစောင့်ရဲတပ်ဖွဲ့ နယ်မြေမှူး ရဲမှူးပြည်ဖြိုးအောင်က ကျောက်ချောင်း ကျေးရွာအုပ်စုရှိ ရပ်မိရပ်ဖိ လူကြီး ၂၀ ဦးကို အုပ်ချုပ်ရေးမှူး ဦးမောင်မောင်စိုးမှ တဆင့် အစည်းအဝေး တက်ရန် ဆင့်ခေါ်ခဲ့သည်။ ရပ်မိရပ်ဖများက အကြောင်းမဲ့ ဖမ်းဆီးခံရမည်ကို စိုးရိမ်၍ အစည်းအဝေးသို့ မသွားဘဲ အုပ်ချုပ်ရေးမှူးမှ တဆင့် ငွေကျပ် နှစ်သိန်းစီ - စုစုပေါင်း ငွေကျပ် သိန်း ၄၀ ပေးရန် အုပ်ချုပ်ရေးမှူးက တဆင့် ပေးခဲ့သည်။ သို့သော်လည်း နယ်မြေမှူးက ငွေကို လက်မခဲ့ဘဲ အုပ်ချုပ်ရေးမှူးကို ငွေပေးထားသူများကို ပြန်ပေးရန် မှာကြားခဲ့သည်။
ငွေပြန်လိုက်သည့် သတင်းကို သက်ဆိုင်သူများက သိရှိသောအခါ အုပ်ချုပ်ရေးမှူး ထံမှ ပြန်တောင်းသော်လည်း ပေးပါမည်၊ နယ်မြေမှူးက လက်ခံလာအောင်သာ ပြောကြားခဲ့သည်။ ငွေပေးထားသူများကလည်း နယ်မြေမှူးကို ကြောက်လန့်ပြီး အုပ်ချုပ်ရေးမှူး ပြောသမျှကို ခေါင်းညိတ်ခဲ့ရသည်။ နယ်မြေမှူးက ငွေပြန်မပေးသေးသည့် သတင်းကို ရရှိသွားပြီး အုပ်ချုပ်ရေးမှူးထံ လူလွှတ်၍ ပြောဆိုသောအခါ အုပ်ချုပ်ရေးမှူးက နယ်မြေမှူးကို သတင်းပို့သူအား စုံစမ်းပြီးနောက် နယ်မြေမှူးထံသို့ နိုဝင်ဘာလ (၂၀) ရက်နေ့က မဟုတ်မမှန်သည့် အစီရင်ခံစာများ ပေးပို့ခဲ့သည်။
“၁၂ ရက်နေ့ နောက်ပိုင်းမှာ နေအိမ်စွန့်ခွာ ထွက်ပြေးနေရသူတွေကို ပွဲစားတွေက ဘင်္ဂလားဒေ့ရှ် နိုင်ငံကို ငွေယူပြီး ပို့ပေးနေတာတွေ ရှိတယ်။ အဲဒါကို အုပ်ချုပ်ရေးမှူးက သူတစ်ဦးတည်း လုပ်ချင်တော့ ရွာသား ပွဲစားတွေကို လူပို့ချင်ရင် သူ့ကို တစ်ယောက်အတွက် ငွေ ၁၀ သိန်းစီ ပေးရမယ်ဆိုပြီး တောင်းတယ်။ ပွဲစားတွေကို ဆယ်သိန်းစီ မပေးနိုင်ရင် မလုပ်နဲ့ဆိုပြီး တားပေမယ့်လည်း ပွဲစားတွေက သူ့စကားနားမထောင်ကြဘူး။ အဲဒီတော့ ၂၀ ရက်နေ့မှာ နယ်မြေမှူးဆီကို ရွာသားတွေက တဖက်နိုင်ငံကို လူမှောင်ခို လုပ်နေတယ် ဆိုပြီး အစီရင်ခံစာ တင်တယ်” ဟု ဒေသခံတစ်ဦးက RB News သို့ပြောသည်။
အစီရင်ခံစာ တင်ပြီးနောက် နယ်မြေမှူးက ရေတပ်မှ အရာရှိထံ ဖုန်းဆက်၍ နတ်မြစ်တစ်လျှောက် လှည့်ကင်းချထားရန် မှာကြားထားသောကြောင့် ယင်းနေ့ညတွင် လူပေါင်း ၅၀၀ နီးပါး တဖက်နိုင်ငံသို့ မကူးနိုင်ဘဲ စားဝတ်နေရေး အခက်အခဲနှင့် ရင်ဆိုင်ခဲ့ရသည်။ အစီရင်ခံစာ တင်ရခြင်းမှာလည်း ပွဲစားအလုပ်ကို ၎င်းကိုယ်တိုင် လုပ်ချင်သည့် အတွက် ခြိမ်းခြောက်ခဲ့ခြင်း ဖြစ်သည်ဟု အဆိုပါ ဒေသခံက ပြောပါသည်။
အုပ်ချုပ်ရေးမှူး ဦးမောင်မောင်စိုးက နိုဝင်ဘာလ (၂၁) ရက်နေ့တွင် ရာအိမ်မှူး၊ ဆယ်အိမ်မှူး များကို တဖက်နိုင်ငံသို့ သွားချင်သူများကို ငွေကျပ် ၂၅၀၀၀ ဖြင့် ပို့ပေးမည်ဟု ဆိုကာ ဒေသခံများကို လိုက်လံ စည်းရုံးခိုင်းခဲ့သည်။ ငွေကျပ် ၂၅၀၀၀ တွင် ရဲမှူးအတွက် ငွေကျပ် ၁၀၀၀၀၊ လှေပွဲစား အတွက် ငွေကျပ် ၁၀၀၀၀ နှင့် အုပ်ချုပ်ရေးမှူး အတွက် ၅၀၀၀ ဖြစ်ကြောင်း စည်းရုံးသူများက ပြောဆိုကြောင်း သိရှိရသည်။
အုပ်ချုပ်ရေးမှူး ဦးမောင်မောင်စိုးသည် အခြေအနေကို အခွင့်ကောင်းယူ၍ ရွာသားများထံမှ ငွေညှစ်လျက် ရှိသည့် အပြင် ဒုက္ခရောက်နေသူ များနှင့် စီးပွားရှာရန်ပင် ပြုလုပ်နေသဖြင့် သက်ဆိုင်ရာမှ အရေးယူပေးရန် ဒေသခံများက တောင်းဆိုသည်ဟု ပြောပါသည်။
