မောင်တော မြောက်ပိုင်းမှ နိုင်ငံ့ဝန်ထမ်း နှစ်ဦးကို နယ်ခြားစောင့်ရဲများက မြို့ပေါ်သို့ လစာသွားထုတ်ခွင့် မပေး

MYARF
RB News
1.12.2016

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်းရှိ ကျေးရွာများတွင် နေထိုင်သော နိုင်ငံ့ဝန်ထမ်း နှစ်ဦးကို နယ်ခြားစောင့်ရဲများက မြို့ပေါ်သို့ ပေးမသွားသောကြောင့် လစာထုတ်ခွင့် မရခဲ့ကြောင်း သတင်း ရရှိပါသည်။

မောင်တောမြို့နယ် မြောက်ပိုင်း ငါးရန့်ချောင်း ကျေးရွာရှိ ကျောင်းမှ လက်ရှိ အထွေထွေလုပ်သား ဆရာ ဦးဆော်လာမတ်အုလ္လာ (အသက် ၄၅ နှစ်) သည် နိုဝင်ဘာလ (၃၀) ရက်နေ့တွင် မောင်တောမြို့ပေါ်ရှိ ပညာရေးမှူးရုံးမှ လစာထုတ်ရန် သွားနေစဉ် ကျီးကန်းပြင် ဌာနချုပ်မှ နယ်ခြားစောင့်ရဲများက မြို့ပေါ်သို့ သွားခွင့် မပေးဘဲ ရွာပြန်ခိုင်းခဲ့သည်။

အလားတူ ခမောင်းဆိပ်မြို့၊ မကျည်းချောင်းရွာမှ အုပ်ချုပ်ရေးမှူး ရုံးစာရေး ဦးအဒူဆော်လာမ် (အသက် ၄၆ နှစ်) ကိုလည်း မြို့နယ် အုပ်ချုပ်ရေးမှူး ရုံးသို့ လစာထုတ်ရန် သွားနေစဉ် နယ်ခြားစောင့်ရဲများက သွားခွင့်မပေးသဖြင့် အိမ်ပြန်ခဲ့ရကြောင်း ဒေသခံတစ်ဦးက RB News သို့ပြောသည်။

၎င်းတို့ နှစ်ဦးစလုံးသည် ရိုဟင်ဂျာလူမျိုးများ ဖြစ်ကြပြီး၊ နိုင်ငံ့ဝန်ထမ်းများ ဖြစ်ကြသော်လည်း နယ်ခြားစောင့်ရဲများက လူမျိုး၊ ဘာသာ ခွဲခြား၍ တမင်တကာ သွားခွင့် မပေးခြင်း ဖြစ်သည်ဟု ဒေသခံများက ဝေဖန် ပြောဆိုနေကြသည်။

နှစ်ဦးစလုံးသည် နိုင်ငံတော်၏ လစာဖြင့်သာ စားသောက်နေရသဖြင့် လစာ မရသောကြောင့် မိသားစုများ စားဝတ်နေရေးပင် အခက်အခဲ ကြုံရန် ရှိနေသည်ဟု အဆိုပါ ဒေသခံက ပြောပါသည်။