ဦးရှဥ့်ကျ အခြေစိုက် နယ်ခြားစောင့်ရဲ များက ဒေသခံ ၃ ဦးထံမှ ငွေညှစ်
Rohingya Eye
RB News
23.5.2016
မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ ဦးရှဥ့်ကျ ကျေးရွာရှိ နယ်မြေ (၅) နယ်ခြားစောင့် ရဲတပ်ဖွဲ့မှ နယ်ခြားစောင့်ရဲ များသည် မေလ (၁၈) ရက်နေ့ ည (၉) နာရီ အချိန်တွင် ကင်းလှည့်နေစဉ် ဦးရှဥ့်ကျ ကျေးရွာအုပ်စု၊ အမှတ် (၁) ရပ်ကွက်မှ ဦးမိုဟာမတ်အီလီယာစ် (ဘ) ဦးနူရ်အာလောမ် အားတွေ့ရှိပြီး ခန္ဓာကိုယ်အနှံ့ ရှာဖွေခဲ့သည်။ ထိုသို့ ရှာဖွေရာတွင် အင်္ကျီအိတ်ထဲမှ ဘင်္ဂလားငွေ တစ်ထောင် ရသည့်အတွက်ဟု ဆိုကာ ငွေကျပ် တစ်သိန်းနှစ်သောင်း ညှစ်ယူခဲ့ကြောင်း ဒေသခံ တစ်ဦးက RB News သို့ပြောသည်။
အလားတူ ယင်းနေ့ ည ၉း၁၅ မိနစ် အချိန်တွင် ယင်းရပ်ကွက်မှ ဦးဖော်ရိတ်၏ သားကိုလည်း စစ်ဆေးရာ ၎င်းထံမှလည်း ဘင်္ဂလားငွေ တစ်ထောင့်တစ်ရာ ရရှိသဖြင့် ငွေကျပ် နှစ်သိန်းငါးသောင်း ညှစ်ယူခဲ့သည်။
ထို့နောက် ဦးရှဥ့်ကျရွာသို့ အလည်အပတ် ရောက်ရှိနေသည့် ရေမျက်တောင် ရွာသား ဦးဆက်ဒမ်ဟူဆောင်း (ဘ) ဦးရှုနာအလီကို စစ်ဆေးရာ ၎င်း၏ ကိုင်ဆောင်ထားသည့် ဖုန်းတွင် ဘင်္ဂလား ဖုန်းနံပါတ် တစ်ခု တွေ့ရှိသည်ကို ဘင်္ဂလား ဆင်းမ်ကဒ် သုံးနေသည်ဟု စွပ်စွဲ၍ ငွေကျပ် သုံးသိန်းငါးသောင်း ညှစ်ယူခဲ့သည်။
အဆိုပါ နယ်ခြားစောင့်ရဲ များသည် တစ်ပတ်တွင် နှစ်ကြိမ်၊ သုံးကြိမ် ရွာထဲသို့ လာရောက်၍ ရွာသားများကို အမျိုးမျိုး စွပ်စွဲ၍ ငွေညှစ်ခြင်း၊ ငွေကြေး မတတ်နိုင်သူများကို ဖမ်းဆီးခေါ်ဆောင် သွား၍ တစ်ညလုံး ညှဉ်းပန်း နှိပ်စက်ခြင်းများ ပြုလုပ်နေသောကြောင့် အထက် အာဏာပိုင်များ အနေဖြင့် စုံစမ်း စစ်ဆေး၍ အရေးယူပေးရန် လိုအပ်ကြောင်း ဒေသခံများက ပြောပါသည်။
