နောက်ဆုံးသတင်း/ဆောင်းပါးများ

မောင်တော ရွက်ညိုတောင်မှ နယ်ခြားစောင့်ရဲများက ဆိုင်ကယ်စီး ရိုဟင်ဂျာများထံမှ ငွေညှစ်

MYARF
RB News
13.7.2017

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ရွက်ညိုတောင်ကျေးရွာ အခြေစိုက် နယ်ခြားစောင့်ရဲတပ်ဖွဲ့မှ နယ်ခြားစောင့်ရဲများသည် လမ်းဘေးတွင် ထိုင်စောင့်ပြီး မော်တော်ဆိုင်ကယ်ဖြင့် သွားလာနေသည့် ရိုဟင်ဂျာများကို စစ်ဆေးသည့်ပုံစံဖြင့် ဖမ်းဆီး၍ ငွေညှစ်လျက် ရှိကြောင်း သတင်းရရှိပါသည်။ 

မောင်တောမြို့နယ် မြောက်ပိုင်း ငါးခူရနယ်မြေအပိုင် ရွက်ညိုတောင်ကျေးရွာ အခြေစိုက် နယ်ခြားစောင့်ရဲတပ်ဖွဲ့မှ ဒုရဲအုပ်အပါအ၀င် တပ်ဖွဲ့ဝင် (၅) ဦးသည် ၎င်းတို့၏ ကင်းစခန်း၏ အနောက်ဘက်ရှိ ကားလမ်းဘေးတွင် ထိုင်စောင့်ပြီး မော်တော်ဆိုင်ကယ် စီး၍ သွားလာနေသည့် ရိုဟင်ဂျာများကို ရွေး၍ ဖမ်းဆီးကာ လိုင်စင် (သို့မဟုတ်) ဘီးခွန်မရှိဟု လုပ်ကြံစွပ်စွဲ၍ နေ့စဉ် ငွေညှစ်လျက် ရှိကြောင်း ဒေသခံများက RB News သို့ပြောပါသည်။ 

ဇူလိုင်လ (၉) ရက်နေ့တွင် ဦးရာဟ်မတ်အုလ္လာ (ဘ) ဦးအာဘူ (အသက် ၃၅ နှစ်) ထံမှ ငွေကျပ် ၄ သောင်း၊ သရက်အုပ်ကျေးရွာသား ဦးအီလီယာစ် (အသက် ၂၅ နှစ်) ထံမှ ငွေကျပ် ၅ သောင်း ညှစ်ယူခဲ့ကြောင်း၊ ရေတွင်းကျွန်းကျေးရွာသား နှစ်ဦးတို့ အသစ်ဝယ်ထားသည့် ဆိုင်ကယ် နှစ်စီးကိုလည်း သိမ်းယူသွားခဲ့ပြီး၊ ၃ ရက်ကြာပြီးမှ ပိုင်ရှင်များကို ငွေကျပ် တစ်သိန်းစီဖြင့် ရွေးယူခိုင်းခဲ့ကြောင်း၊ တစ်ရက်လျှင် အနည်းဆုံး ဆိုင်ကယ် ၅ စီးမှ ၁၀ စီးထိ ဖမ်းဆီး၍ ငွေညှစ်လျက် ရှိကြောင်း ဒေသခံများက ပြောပါသည်။ 




Comment ရေးရန်

Rohingya Exodus