မစ္စရန်ဟီးလီ မပြန်မချင်း ညှဉ်းပန်းနှိပ်စက်မည်ဟု တောင်ပြိုမှ နယ်ခြားစောင့်ရဲတပ်ဖွဲ့ အရာရှိကြီးတစ်ဦးပြော
RB News
13.7.2017
တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင် တောင်ပြိုလက်ဝဲမြို့ ကျွန်းပေါက်ပြုစု အပါဝင် ရွာအချို့တွင် နယ်ခြားစောင့်ရဲတပ်ဖွဲ့မှ အရာရှိကြီးတစ်ဦးက ကုလသမဂ္ဂ လူ့အခွင့်အရေး အထူးကိုယ်စားလှယ် မပြန်မချင်း ညှဉ်းပန်းနှိပ်စက်မည်ဟု ပြောကြားခဲ့ကြောင်း သတင်းရရှိပါသည်။
ဇူလိုင်လ (၁၂) ရက်နေ့ နံနက် ၉ နာရီအချိန်တွင် တောင်ပြိုလက်ဝဲမြို့၊ ကျွန်းပေါက်ပြုစု၊ ဖက်လိပြင်နှင့် ကျောက်ချောင်း အလယ်ရွာသို့ စစ်သားများနှင့် နယ်ခြားစောင့်ရဲ အင်အား ၄၀ ကျော် ၀င်ရောက် စီးနင်းပြီး အမျိုးသမီးများကို နေအိမ်များ၏ အပြင်သို့ ထုတ်၍ အစည်းအဝေး ပြုလုပ်ခဲ့သည်။ အစည်းအဝေးတွင် နယ်ခြားစောင့်ရဲတပ်ဖွဲ့မှ အရာရှိကြီးက Ms Yanghee Lee မပြန်မချင်း ဆက်လက် ညှဉ်းပန်းနှိပ်စက်မည် ဖြစ်ကြောင်း၊ နှိပ်စက်မှု မခံချင်လျှင် ဘင်္ဂလားဒေ့ရ်ှသို့ ထွက်ပြေးချင် ထွက်ပြေး၍ ရကြောင်း၊ ၎င်းကိုယ်တိုင် ချောင်းဝ နယ်ခြားစောင့်ရဲတပ်ဖွဲ့ ကင်းစခန်းမှူးကို ထွက်ပြေးနေသူများအား မတားမြစ်ရန် ညွန်ကြားချက် ပေးထားကြောင်း ပြောဆိုခဲ့သည်ဟု ဒေသခံများက RB News သို့ပြောပါသည်။
နယ်ခြားစောင့်ရဲများက ရိုဟင်ဂျာများ၏ နေအိမ်များမှ အထူးသဖြင့် ဆန်၊ ဆီ၊ ငြုတ်သီး၊ ထမင်း၊ ဟင်း ချက်သည့် အိုးခွက်များကို အဓိက ပစ်မှတ်ထား၍ ဖျက်ဆီးနေသည်ကို ကြည့်ခြင်းအား ဒေသခံများ၏ လူနေမှု ဘ၀ရပ်တည်နိုင်စွမ်းမရှိအောင် ပြုလုပ်ပြီး ဒုက္ခသည် ဘ၀ရောက်အောင် တွန်းပို့နေခြင်း ဖြစ်သည်ဟု ဒေသခံများက သုံးသပ် ပြောပါသည်။
ဇူလိုင်လ (၁၁) ရက်နေ့ နံနက် ၁၀ နာရီအချိန်တွင်လည်း ကျွန်းပေါက်ဆင်အိုးနှင့် ရေတွင်းပြင် ကျေးရွာများတွင်လည်း နယ်ခြားစောင့်ရဲများနှင့် စစ်သားများက အလားတူ ပြောဆိုခဲ့ကြောင်း သိရှိရသည်။
