ဘူးသီးတောင်မှ နယ်ခြားစောင့်ရဲများနှင့် ရဲများက ဒေသခံရိုဟင်ဂျာများကို ရိုက်နှက် ငွေညှစ်

2.8.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ်ရှိ ရပ်ကွက်၊ ကျေးရွာများတွင် နယ်ခြားစောင့်ရဲများနှင့် ရဲတပ်ဖွဲ့ဝင်များက ရရှိထားသည့် အခွင့်အာဏာကို အသုံးချ၍ ငွေညှစ်ခြင်း၊ ရိုက်နှက်ခြင်း၊ ခြိမ်းခြောက်ခြင်းများ ပြုလုပ်လျက်ရှိသည်။ 

ဇူလိုင်လ (၃၁) ရက်နေ့ ညနေ (၄) နာရီအချိန်တွင် ဖောင်တော်ပြင်ကျေးရွာ အခြေစိုက် နယ်ခြားစောင့်ရဲတပ်ဖွဲ့ ကင်းစခန်းမှ စခန်းမှူး ဒုရဲအုပ် အောင်မြင့်မြတ်သည် စခန်းရှေ့မှ ဖြတ်သွားသည့် မောင်နုရွာမှ အသက် (၂၂) နှစ် အရွယ် အာရ်ရာဖ်အာမတ် ကို စခန်းထဲသို့ ခေါ်သွင်း၍ လူမဆန်စွာ ရိုက်နှက်ခဲ့သည်။ 

“စခန်းမှူး ဒုရဲအုပ်အောင်မြင့်မြတ် ကိုယ်တိုင် စခန်းထဲကို ခေါ်သွင်းပြီး လူမဆန်စွာ ရိုက်တယ်။ ထိုးကြိတ်တယ်၊ ကန်ကျောက်တယ်။ အခု အဲဒီကောင်လေးကို ဆေးကုနေရတယ်၊ စခန်းမှူးက ဇွန်လ ၂၁ ရက်နေ့မှာ ပြောင်းလာတာ။ ဗမာလူမျိုး၊ ရွာသားတွေကို ဆဲဆိုတာတွေ၊ ခြိမ်းခြောက်တာတွေ၊ ရိုက်နှက်တာတွေ မကြာခဏလုပ်နေတယ်၊ လိုင်စင်ရသောင်းကျန်းသူလို သောင်းကျန်းနေတော့ ရွာသူရွာသားတွေ အရမ်းကို စိုးရိမ်နေကြတယ်” ဟု ရပ်မိရပ်ဖ တစ်ဦးက RB News သို့ပြောပါသည်။ 

စခန်းမှူး ဒုရဲအုပ်အောင်မြင့်မြတ်နှင့် ပတ်သက်၍ ရွာသူရွာသားများက တပ်ရင်း (၅၆၄) မှ အရာရှိများကို တင်ပြခဲ့ရာ အရာရှိများက ရှေ့ဆက်၍ သောင်းကျန်းပါက လုပ်ထုံးလုပ်နည်းနှင့်အညီ ဆောင်ရွက်ပါမည်ဟု ပြောဆို၍ နှစ်သိမ့်ခဲ့သည်။ 

ဘူးသီးတောင်မြို့နယ်တွင် ကင်းစခန်းများ ယခင်ကထက်များပြားလာပြီး ဇွန်လ (၂၀) ရက်နေ့က ဖုံညိုလိပ်ကျေးရွာရှိ တံတားသစ်တွင် ကင်းစခန်းတစ်ခု အခြေစိုက်ပြီးနောက် နယ်ခြားစောင့်ရဲများက ကင်းစခန်းရှေ့မှ ဖြတ်သန်းသွားလာသည့် ဆိုင်ကယ်တက္ကစီများ၊ သုံးဘီးတက္ကစီများမှ ငွေကျပ် တစ်ထောင်စီ ကောက်ခံလျက်ရှိသည်။ 

“ဗုဒ္ဓဘာသာဆိုရင် မကောက်ပါဘူး။ ရိုဟင်ဂျာမွတ်စလင်တွေကိုချည်း ရွေးကောက်တာပါ၊ တစ်ခေါက်ကို တစ်ထောင်စီကောက်တယ်” ဟု ဒေသခံတစ်ဦးက ပြောပါသည်။ 

ဘူးသီးတောင်မြို့မဈေးတွင်လည်း ရဲစခန်းမှ စခန်းမှူးကိုယ်တိုင်သွား၍ ရိုဟင်ဂျာဆိုင်များမှ ဆိုင်ရှင်များကို နည်းမျိုးစုံဖြင့် ခြိမ်းခြောက်၍ ငွေညှစ်လျက်ရှိသည်။ 

“ဆိုင်ကြီးတွေကို ရွေးပြီး ငွေညှစ်တယ်၊ တစ်ဆိုင်ကို အနည်းဆုံး တစ်သိန်းကနေ ငါးသိန်းထိ ညှစ်တယ်။ ငွေမပေးရင် လက်ထိပ်ခတ်ခေါ်သွားပြီး စခန်းရောက်မှ ရိုက်နှက်ညှဉ်းပန်းနှိပ်စက်ပြီး ငွေညှစ်တယ်” ဟု မြို့မဈေးမှ လူတစ်ဦးက ပြောပါသည်။ 

မြစ်ကမ်းတစ်လျှောက်ရှိ ကင်းစခန်းများမှ နယ်ခြားစောင့်ရဲများကလည်း စက်လှေများမှ ငွေညှစ်နေခြင်းကြောင့် စက်လှေခ ကြီးမားလာပြီး ခရီးသွားလာရန် ခက်ခဲနေသည်။ 

“အထူးသဖြင့် အမှတ် (၂) ရပ်ကွက် အခြေစိုက် ကင်းစခန်းက နယ်ခြားစောင့်ရဲတွေက စက်လှေတစ်စီးကနေ အနည်းဆုံး ငါးထောင်ကနေ တစ်သောင်းထိယူတယ်။ ပြီးတော့ မောင်နုရွာမှာရှိတဲ့ နယ်ခြားစောင့်ရဲတွေက နှစ်ထောင်၊ ခြင်းသမားရွာမှာရှိတဲ့ စစ်တပ်က တစ်ထောင်၊ မေယုတံတားကြီးက ရဲတပ်ဖွဲ့ဝင်တွေက နှစ်ထောင်၊ မြို့မဈေးမှာ တာဝန်ကျနေတဲ့ ရဲတွေက ငါးထောင် ယူတယ်။ တောင်ဘဇာကနေ ရိုဟင်ဂျာစက်လှေဆိုရင် ထွက်လို့မရဘူး။ ကီနီစီရွာ (ကျီးနုတ်သီး) ကနေ ဘူးသီးတောင် ရောက်တဲ့အထိ လမ်းမှာ ပေးရသမျှ အရမ်းများတော့ ခရီးသည်တွေ အတွက် ၀န်ထုပ်ဝန်ပိုး အရမ်းကြီးလာတယ်။ ဒါတွေကလည်း လူတွေကို ကျပ်တည်းအောင် တမင်လုပ်နေတာ” ဟု ဒေသခံတစ်ဦးက ပြောပါသည်။

“တောင်ဘဇာမှာ ကျွန်တော်တို့ ရိုဟင်ဂျာတွေ အများကြီး မရှိတော့ဘူး။ အဲဒီက ရိုဟင်ဂျာတွေ စက်လှေနဲ့ သွားလာလို့ မရဘူး။ တောင်ဘဇာ အုပ်ချုပ်ရေးမှူးရဲ့ ညီက သူ့စက်လှေ လုပ်ငန်းရှိတော့ မွတ်စလင်တွေရဲ့ စက်လှေ ကပ်ဖို့ မပေးဘူး။ အဲဒီတော့ မွတ်စလင်တွေက ကျီးနုတ်သီးကို ၃ မိုင်လောက် လမ်းလျှောက်သွားပြီးမှ စက်လှေ စီးလို့ရတယ်” ဟု ၎င်းက ဖြည့်စွက် ပြောသည်။ 

ဘူးသီးတောင်မြို့ပေါ်နှင့် ကျေးလက်ဒေသများတွင် ရဲများနှင့် နယ်ခြားစောင့်ရဲများက နည်းမျိုးစုံဖြင့် ငွေညှစ်လျက်ရှိပြီး ငွေကျပ် သိန်းဆယ်ဂဏန်းထိ ညှစ်ယူလျက်ရှိသည်ဟု ဒေသခံများက ဆိုသည်။

“အာဆာနဲ့ အဆက်အသွယ်ရှိတယ်၊ တဖက်နိုင်ငံမှာ ခိုလှုံနေတဲ့လူတွေနဲ့ ဆက်သွယ်နေတယ်၊ အကြမ်းဖက်သမားတွေကို ထမင်းကျွေးတယ် ဆိုပြီး စွပ်စွဲချက်တွေနဲ့ လုပ်ကြံ ခြိမ်းခြောက်တယ်၊ လူတွေကို ဆင့်ခေါ်ပြီး ငွေညှစ်တာ၊ လွန်ခဲ့တဲ့ ဇွန်လ တတိယပတ်တုန်းက ပဒကာအုပ်စုက ဦးအာဘူလ်ဟာရှိမ်း အပါအ၀င် ရွာသား (၇) ယောက်ကို ကျောင်းတောင်က နယ်ခြားစောင့်ရဲတွေက အာဆာကလူတွေကို ထမင်းကျွေးတယ်လို့ လုပ်ကြံစွပ်စွဲပြီး ငွေကျပ် ၁၁ သိန်းစီ ညှစ်ယူခဲ့တယ်၊ သူတို့တွေကို တော်တော်လေး နှိပ်စက်တယ်၊ အပ်စိုက်တယ်၊ ပြီးတော့ ဓါးနဲ့ထိုးတယ်” ဟု ဒေသခံတစ်ဦးက RB News သို့ပြောပါသည်။ 

မြို့ပေါ်တွင်လည်း နယ်ထိန်းရဲများက နေ့စဉ်နေ့တိုင်း လူငယ်များကို ပစ်မှတ်ထား၍ မူးယစ်ဆေးဝါး သုံးစွဲနေသည်ဟု လုပ်ကြံစွပ်စွဲပြီး ငွေကျပ် ၃ သိန်းမှ ၅ သိန်းထိ ညှစ်ယူလျက်ရှိသည်။ 

“လူငယ်တွေကို WY သုံးနေတယ်၊ ဆေးခြောက်ရှုနေတယ်၊ ရောင်းနေတယ်လို့ စွပ်စွဲပြီး ဖမ်းတယ်၊ ပြီးတော့ ငွေ ၃ သိန်းကနေ ၅ သိန်းထိ ညှစ်တယ်။ လွန်ခဲ့တဲ့ အပတ်ကလည်း (၄) ရပ်ကွက် အာယာတူလ္လာ ဆီက ငွေ ၇ သိန်း ညှစ်တယ်၊ အမှတ် (၅) ရပ်ကွက်က ဖော်ယာစ်အပါအ၀င် (၅) ယောက်ဆီက (၁၅) သိန်းညှစ်တယ်၊ နေ့တိုင်း ငွေညှစ်ခံနေရတယ်၊ ပြီးတော့ မီဒီယာတွေကို ပြောရင် ဒီထက်နှစ်ဆ ပေးရမယ်ဆိုပြီး ခြိမ်းခြောက်” ဟု မြို့ခံတစ်ဦးက ပြောပါသည်။