ပုဒ်မ ၁၄၄ သည် ရခိုင်များအတွက် မဟုတ်ဟု ဒေသခံများ ဝေဖန်
Sindi Khan
RB News
16.3.2014
မောင်တော ။ ။ ရခိုင်ပြည်နယ်၊ မောင်တောခရိုင်တွင် ပုဒ်မ ၁၄၄ အရ လူ ၅ ဦးထက် ပိုမို၍ စုဝေးခွင့် မရှိသော်လည်း ၎င်းဥပဒေ အမိန့် အာဏာသည် ရခိုင်များ အတွက် မဟုတ်ဘဲ ဒေသခံ မွတ်စလင် များအတွက်သာ ပြဌာန်း ထားခြင်း ဖြစ်သည်ဟု ဒေသခံများက ဝေဖန် ပြောဆို နေကြသည်။
ယနေ့ နေ့လည် ၁ နာရီကျော် အချိန်တွင် မောင်တောမြို့နယ်၊ မဟာဗန္ဓုလလမ်းရှိ ရွာသစ်ရွာ ဘုန်းကြီးကျောင်း (ဗဟိုကျောင်းတိုက်) တွင် ရခိုင်လူမျိုး ၁၀၀ ကျော် စုရုံး၍ မြို့မ စည်ပင်သာယာ ဈေးအထိ ချီတက်၍ ဆန္ဒပြ ခဲ့ပြကြောင်း ဒေသခံများက RB News သို့ပြောပါသည်။ ဆန္ဒပြရာတွင် ၁၉၈၂ ခုနှစ် ဥပဒေကို အကောင်အထည် ဖော်ရန်၊ သန်းခေါင် စာရင်း ကောက်ခံရာတွင် ရိုဟင်ဂျာ အမည် အလိုမရှိကြောင်းနှင့် သန်းခေါင် စာရင်း ကောက်ခံ ရာတွင် မွတ်စလင်များကို တာဝန် မပေးရန် အော်ဟစ်ခဲ့ကြောင်း သိရှိရပါသည်။
ဆန္ဒပြသူ အများစုမှာ ရဲဝန်ထမ်းများ၏ မိသားစုများနှင့် အခြား ဌာနဆိုင်ရာ ၀န်ထမ်းများ၏ မိသားစုဝင် များဖြစ်ပြီး၊ ရဲများက လုံခြုံရေး တာဝန်ယူ ပေးထားသည်ဟု ဒေသခံများက ဆိုသည်။
ဒေသခံ ရိုဟင်ဂျာများက ပုဒ်မ ၁၄၄ အရ ယခုကဲ့သို့ ၅ ဦးထက်ပို၍ စုဝေးခွင့် မရှိသော်လည်း ဥပဒေသည် ရခိုင်များ အတွက် မဟုတ်သဖြင့် စုဝေးခွင့် ရကြောင်း၊ မိမိတို့ အစ္စလာမ် ဘာသာဝင် များမှာ လူတစ်ဦး တစ်ယောက် သေဆုံးလျှင်ပင် စုပေါင်း၍ ၀တ်ပြုပြီး သဂြိုဟ်ခွင့်ကို ကန့်သတ် ထားခံရကြောင်း၊ အာဏာပိုင်များ မသိအောင် ကြိုးစား၍ မြှပ်နှံ သဂြိုလ် လျှင်လည်း အာဏာပိုင်များ လာရောက်၍ တားဆီး ပိတ်ပင်ခြင်းကို ခံရကြောင်း ၎င်းတို့ ခံစားနေရသည် များကို RB News သို့ ရင်ဖွင့်ပါသည်။
“ရပ်ကွက် (၅) က အငြိမ်းစား မြေတိုင်း စာရေး ဦးဂျမာလ် အာမီးန် လွန်ခဲ့တဲ့လက ကွယ်လွန်တုန်းက ဆိုရင် သူ့ရဲ့ ဂျနာဇာ (စုပေါင်းဝတ်ပြုခြင်း) ကို လူတွေ မရောက်နိုင်တဲ့ နေရာမှာ သွားလုပ်ရတယ်။ အဲဒါတောင် အာဏာပိုင်တွေက လာပြီး တားဆီးတာကို ကြုံတွေ့ ခဲ့ရတယ်” ဟု ဒေသခံတစ်ဦးက ဆိုသည်။
ယခုကဲ့သို့ လူမျိုးနှင့် ကိုးကွယ်သည့် ဘာသာကို ခွဲခြား၍ ဥပဒေကို အသုံးပြုနေသည့် အဓိက တရားခံမှာ ခရိုင် အုပ်ချုပ်ရေးမှူး ဦးအောင်မြင့်စိုး ဖြစ်သည်ဟု ၎င်းတို့က ပြောပါသည်။ ဆန္ဒပြမည့် အရေးကြောင့် ဒေသခံ ရိုဟင်ဂျာများသည် ၎င်းတို့၏ ဆိုင်များကို နေ့လည် ၁၂ နာရီတွင် ပိတ်လိုက် ရသဖြင့် စီးပွားရေးနှင့် စားဝတ်နေရေး နစ်နာမှုပါ ကြုံရသည်ဟု ဆိုသည်။ ထို့အပြင် မလိုလားအပ်သည့် ပြဿနာများ မဖြစ်ရေး အတွက် အသွားအလာ ဆင်ခြင်ရသောကြောင့် လှုမှုရေးပါ ထိခိုက်ရကြောင်း ဒေသခံများက RB News သို့ပြောပါသည်။
