ကျောက်နီမော် ဒေသခံများ သန်းခေါင်စာရင်းနှင့် ပတ်သက်၍ ခြိမ်းခြောက်ခံရ

RB News
27.3.2014

ရမ်းဗြဲ ။ ။ ရခိုင်ပြည်နယ်၊ ရမ်းဗြဲမြို့နယ်၊ ကျောက်နီမော် ကျေးရွာမှ ဒေသခံ များကို သန်းခေါင်စာရင်းနှင့် ပတ်သက်၍ လ.၀.က တိုက်နယ်မှူးက ခြိမ်းခြောက် ခဲ့ကြောင်း သတင်း ရရှိပါသည်။

မတ်လ ၂၄ ရက်နေ့တွင် ရမ်းဗြဲမြို့နယ်၊ ကျောက်နီမော် ကျေးရွာ မူလတန်းလွန် ကျောင်းတွင် ကျောက်နီမော်မှ ဒေသခံများကို ကျောက်နီမော် လ.၀.က တိုက်နယ်မှူး ဦးကျော်ကျော်အောင်၊ ကျောက်နီမော် ကျေးရွာ အုပ်ချုပ်ရေးမှူး ဦးမြင့်လှိုင်၊ စာရေး ဦးဇော်မင်းနိုင် တို့က ခေါ်ယူ တွေ့ဆုံ ခဲ့သည်။

တွေ့ဆုံပွဲတွင် ဦးကျော်ကျော်အောင်က ခရိုင် လ.၀.က ဦးစီးမှူး၏ အမိန့်အရ သန်းခေါင်စာရင်း ကောက်ယူရာတွင် ပါဝင်မည့် မေးခွန်း အမှတ် (၇) ကိုးကွယ်သည့် ဘာသာ၊ အမှတ် (၈) လူမျိုး နေရာများတွင် မဖြည့်စွက်ရန်၊ အကယ်၍ ဖြည့်စွက်မည် ဆိုပါကလည်း ဘင်္ဂါလီဟုသာ ဖြည့်စွက်ရန် ပြောကြားခဲ့သည်။ ဦးကျော်ကျော်အောင်က အကယ်၍ ၎င်းပြောကြားသည့် အတိုင်း မလိုက်နာဘဲ အခြား လူမျိုး အမည် တစ်စုံ တစ်ရာ ဖြည့်စွက် ရေးသားပါက ကျေးရွာ၏ ပညာရေး၊ ကျန်းမာရေး၊ လူမှုရေး၊ စီးပွားရေး၊ လုံခြုံရေး အစရှိသည့် အရေးပေါင်းစုံတွင် ဆုံးရှုံးမှုများနှင့် ရင်ဆိုင်ရမည်ဟု ခြိမ်းခြောက်ခဲ့ကြောင်း ကျောက်နီမော် ဒေသခံ တစ်ဦးက RB News သို့ပြောပါသည်။

ဦးကျော်ကျော်အောင် ပြောကြားခဲ့သည် များကို ရွာသူ ရွာသား များအားလုံးကို ရှင်းပြပြီး မတ်လ ၂၈ ရက်နေ့ နေ့လည် ၂ နာရီတွင် လက်ခံ သဘောတူကြောင်း ရွာသူရွာသားများက လက်မှတ် ရေးထိုး၍ အကြောင်းပြန်ရမည်ဟု သန်းခေါင်စာရင်း ဥပဒေကို ချိုးဖောက်၍ ပြောကြား ခဲ့သည်။ သန်းခေါင်စာရင်း ဥပဒေအရ မည်သူ တစ်ဦး တစ်ယောက်ကမှ တိုက်တွန်း၊ ခြိမ်းခြောက် ပြောဆိုခွင့် မရှိသော်လည်း ရခိုင်ပြည်နယ် အနှံ့အပြားရှိ မြို့နယ် များတွင် ဒေသခံ မွတ်စလင်များကို နည်းမျိုးစုံ ခြိမ်းခြောက် လျက်ရှိသည်။