စိမ်းညှင်းပြာ အလက ကျောင်းတွင် စာမသင်ဘဲ ကျောင်းအုပ်ကြီးက ငွေညှစ်ခြင်းကိုသာ ပြုလုပ်နေ
RB News
9.7.2014
ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် စိမ်းညှင်းပြာ အလယ်တန်း ကျောင်းခွဲတွင် ကျောင်းသား/သူ များကို စာသင်ကြားခြင်း မရှိဘဲ၊ ကျောင်းအုပ်ကြီး ဖြစ်သူက ခေါင်းစဉ် အမျိုးမျိုးတပ်ကာ ငွေညှစ်လျက် ရှိကြောင်း သတင်း ရရှိပါသည်။
ဘူးသီးတောင်မြို့နယ်၊ စိမ်းညှင်းပြာ ကျေးရွာရှိ အလယ်တန်းကျောင်းခွဲတွင် ကျောင်းသား/သူ များကို ယခု အချိန်ထိ ပညာသင်ကြား ပေးခြင်း မရှိသည့် အပြင် ကျောင်းအုပ် ဆရာမကြီး ဒေါ်အေးခင်က ကျောင်းသား/သူ များထံမှ နည်းလမ်း မျိုးစုံဖြင့် ငွေညှစ်လျက် ရှိကြောင်း ဒေသခံများက RB News သို့ပြောပါသည်။ ကျောင်းအုပ် ဆရာမကြီး ဒေါ်အေးခင်များ တံဆိပ်များ ရောင်း၍ ငွေညှစ်ခြင်း၊ ငွေမပေးပါက အတန်းတင် မပေးဟုဆိုကာ ငွေညှစ်ခြင်း၊ စာမေးပွဲ ကောင်းမွန်စွာ မဖြေဟုဆိုကာ ကျောင်းသား/သူများ ရသည့် ထောက်ပံ့ကြေး ငွေကျပ် တစ်ထောင်ကို မပေးခြင်း၊ စာမေးပွဲ ကျရှုံးသူများထံမှ ကျရှုံးသည့် အတွက်ဟု ဆိုကာ ငွေညှစ်ခြင်း၊ လဘက်ရည်ဖိုးဟု ဆိုကာ ငွေညှစ်ခြင်းနှင့် ခြံစည်းရိုး မရှိသည့် ကျောင်းဝင်း အတွင်းသို့ နွား၊ ဆိတ်များ ၀င်လျှင် ငွေညှစ်ခြင်း၊ တခါတရံ သတ်ဖြတ် စားလိုက်ခြင်းများ ပြုလုပ်လျက် ရှိကြောင်း ဒေသခံများက ပြောပါသည်။
အဆိုပါ ကျောင်းတွင် မူလတန်း ကျောင်းသား ၅၀၀ ကျော်နှင့် အလယ်တန်း ကျောင်းသား ၂၀၀ ကျော်ရှိပြီး၊ အဆိုပါ ကျောင်းသားများထံမှ ညှစ်ယူ၍ ရရှိသည့် ငွေများကို ကျောင်းအုပ် ဆရာမကြီး ဒေါ်အေးခင်က တစ်ဦးတည်း ရယူလျက်ရှိပြီး အခြားသော ကျောင်းဆရာ/မ များကို ဝေစုခွဲ၍ ပေးခြင်း မရှိဟု အမည် မဖော်လိုသည့် ဆရာမ တစ်ဦး၏ ပြောပြချက် အရ သိရှိရပါသည်။
“ကျွန်တော်တို့ ရွာက ကျောင်းရဲ့ အခြေအနေကို နေပြည်တော်ကနေ အချိန်မရွေး လာပြီး စစ်နိုင်ပါတယ်။ ကျွန်တော်တို့ ရွာက ရပ်မိရပ်ဖ တွေကလည်း ပြည်ထောင်စု အစိုးရဆီကို တိုင်ကြားဖို့ အချက်အလက်တွေ အားလုံးကို သေချာ စုဆောင်း နေပါတယ်။ ကျောင်းအုပ်ကြီး ကိုယ်တိုင်က အခုလို လုပ်နေတဲ့ အတွက် ကလေးတွေရဲ့ ပညာရေး အလွန် ထိခိုက် နစ်နာ နေတယ်။ အခုထိ ကျောင်းဝင်ခွင့် မရသေးတဲ့ ကျောင်းသားတွေ ရှိနေသလို ကျောင်းဝင်ခွင့် ရတဲ့ ကျောင်းသားတွေက စာသင်ခွင့် မရဘူး ဖြစ်နေတယ်” ဟု ဒေသခံ တစ်ဦးက RB News သို့ပြောပါသည်။
