ရွာအုပ်ချုပ်ရေးမှူးက ဘာသာရေး ဆရာများကို ပစ်မှတ်ထား၍ လုပ်ကြံ ငွေညှစ်
Rohingya Eye
RB News
29.7.2014
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း အလယ်သံကျော် ကျေးရွာ အုပ်ချုပ်ရေးမှူး ဦးမောင်သက်နိုင်သည် ကျေးရွာတွင်းရှိ ဘာသာရေး ဆရာများကို ပစ်မှတ်ထား၍ လုပ်ကြံ စွပ်စွဲ၍ ငွေညှစ်မှုများ ပြုလုပ်ခဲ့ကြောင်း သတင်း ရရှိပါသည်။
ဇူလိုင်လ (၂၄) ရက်နေ့ နံနက် ၂း၃၀ နာရီ (ဇူလိုင် ၂၃ ရက်နေ့ ညသန်းခေါင်ယံ) အချိန်တွင် မောင်တောမြို့နယ် တောင်ပိုင်း အလယ်သံကျော် ကျေးရွာ အုပ်စု၊ မော်တုလ္လာ ကျေးရွာသို့ နယ်ခြားစောင့် ရဲတပ်ဖွဲ့ (BGP) မှ တပ်ဖွဲ့ဝင် ၂၅ ဦးနှင့် ဦးအာရှော်ဒုလ္လာ (ဘ) ဦးကာဒိရ်ဟူဆောင်း တို့ဝင်ရောက်လာပြီး သပြေတော (ဘားစော်ရာ) ရွာသားများ ပုန်းအောင်းနေသည်ဟု မဟုတ်မမှန် စွပ်စွဲ၍ နေအိမ်များ အတွင်း ရှာဖွေခဲ့ရာ၊ ၎င်းတို့ စွပ်စွဲသည့် အတိုင်း ရှာဖွေ မတွေ့ရှိခဲ့သော်လည်း နံနက် ၉ နာရီ အချိန်တွင် ကျေးရွာ အုပ်ချုပ်ရေးမှူး ဦးမောင်သက်နိုင်က ဘာသာရေး ဆရာ (၃) ဦးကို ဆင့်ခေါ်၍ ငွေညှစ်ခဲ့ကြောင်း ဒေသခံ တစ်ဦးက RB News သို့ပြောပါသည်။
ငွေညှစ်ခံရသူများမှာ --
(၁) မော်လ၀ီ ဦးမာမတ်အာမီးန် (ဘ) ဦးဟာဘီဘူရာမန် (အသက် ၆၅ နှစ်)
(၂) မော်လ၀ီ ဦးမာမတ်အူလ္လာ (ဘ) ဦးအာမိရ်ဟူဆောင်း (အသက် ၆၁ နှစ်) – (ညှစ်ခံရသည့် ငွေကျပ် ၂ သိန်း ၅ သောင်း)
(၃) ဦးအဘူလ်ဟာရှီးမ် (ဘ) ဦးဇော်လာလ် (အသက် ၃၇ နှစ်) – (ညှစ်ခံရသည့် ငွေကျပ် ၂ သိန်း) --- တို့ ဖြစ်သည်။
သပြေတော ကျေးရွာတွင် ကျေးရွာ အုပ်ချုပ်ရေးမှူး ဦးဇေယာဘူရာမန်ကို အမည်မသိသူများက သတ်ဖြတ်မှုနှင့် ပတ်သက်၍ သပြေတောရွာမှ အမျိုးသားများကို နယ်ခြားစောင့် ရဲတပ်ဖွဲ့များနှင့် ရဲများက လိုက်လံ ဖမ်းဆီးနေသဖြင့် ရွာသား အများစုမှာ ယခုအချိန်ထိ တိမ်းရှောင် နေရကြောင်း အဆိုပါ ဒေသခံက ပြောပါသည်။
