ဝါးပိတ်တွင် လက်နက် (၄) လက် ရှာဖွေတွေ့သည့် ဇတ်ကား ရိုက်ကူး
Rohingya Eye
RB News
4.11.2016
မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ကျီးကန်းပြင်ကျေးရွာအုပ်စု၊ ၀ါးပိတ်ရွာတွင် လက်နက်တူးဖော် တွေ့ရှိသည့် ဇတ်လမ်းတစ်ခု ရိုက်ကူးခဲ့ကြောင်း သတင်း ရရှိပါသည်။
နိုဝင်ဘာလ (၃) ရက်နေ့ နေ့လည် ၂ နာရီအချိန်တွင် ကျီးကန်းပြင် ကျေးရွာအုပ်စု၊ အနောက်ရွာမှ ဆယ်အိမ်မှူး ဖြစ်သူ ဦးဟာမိတ်၊ ကျောင်းဆရာ ဦးအာဘူလ်ဟာရှိမ်၊ နွားရုံတောင် ကျေးရွာအုပ်စု အုပ်ချုပ်ရေးမှူးနှင့် အုပ်ချုပ်ရေးအဖွဲ့ဝင် (၆) ဦးတို့ကို စစ်တပ်နှင့် နယ်ခြားစောင့်ရဲတပ်ဖွဲ့က ဆင့်ခေါ်ခဲ့သည်။
ထို့နောက် ၎င်းတို့ (၈) ဦးကို စစ်သားများနှင့် နယ်ခြားစောင့်ရဲများက ၀ါးပိတ်ကျေးရွာသို့ ခေါ်ဆောင်သွားပြီး တစ်နေရာတွင် လက်နက်ရှိသည်ဟု ဆိုကာ ၎င်းတို့ရှေ့တွင်ပင် မြေတူး၍ လက်နက် (၄) လက်ကို ပြခဲ့သည်။ ထို့နောက် ၎င်းတို့ (၈) ဦးလုံးကို လက်နက်များ မြင်ခဲ့ကြောင်း၊ လက်နက်များကို တူးဖော်ရရှိခြင်းမှာ မှန်ကန်ကြောင်း လက်မှတ်ရေးထိုးခိုင်းခဲ့ကြောင်း ဒေသခံ တစ်ဦးက RB News သို့ပြောသည်။
“ မြေတူးတာက တစ်ထွာလောက်ပဲ ရှိမယ်။ ဘယ်နေရာမှာ မြှပ်ထားမှန်းမသိဘဲ ရှာတွေ့တာက တစ်မျိုးပေါ့နော်။ အခုက လူတွေကို မြှပ်ထားတဲ့နေရာကို တန်းခေါ်သွားတယ်။ တူးတယ်၊ အဖြစ်အပျက် အားလုံးကို ဓါတ်ပုံရိုက်၊ ဗီဒီယိုရိုက်ပြီး မှတ်တမ်းတင်တယ်။ သူတို့ဟာသူတို့ ရှာတွေ့ထားတာကို လိုက်ပြတယ်ဆိုတာက တစ်မျိုး ယုတ္တိရှိတယ်။ အခုတော့ ဇတ်လမ်းတစ်ခု ရိုက်သလိုပါပဲ။” ဟု အဆိုပါ ဒေသခံကပြောပါသည်။
အာဏာပိုင်များသည် ကျီးကန်းပြင်ကျေးရွာအုပ်စု အလယ်ရွာနှင့် ၀ါးပိတ်ရွာတို့ကို အဓိက ပစ်မှတ်ထား၍ ဒေသခံများကို ဖယ်ရှားရန် စီစဉ်ထားသဖြင့် အောက်တိုဘာလ (၁၀) ရက်နေ့မှစ၍ ၀ါးပိတ်ရွာသားများကို သေနတ်ဖြင့် ပစ်ခတ်၍ မောင်းထုတ်ခဲ့သည်။ တစ်ဖန် အလယ်ရွာမှ ရွာသားများကိုလည်း နယ်ခြားစောင့်ရဲတပ်ဖွဲ့ ကွပ်ကဲရေးမှူး ရဲမှူးချုပ်သူရစန်းလွင်က နိုင်ငံတော် အမိန့်ဟုဆိုကာ နှင်ထုတ်ခဲ့သည်။
ယမန်နေ့ နိုဝင်ဘာလ (၃) ရက်နေ့ ည ၆း၁၅ မိနစ် အချိန်တွင် ၀ါးပိတ်ရွာမှ ရိုဟင်ဂျာများ၏ နေအိမ်နှစ်လုံးကို စစ်သားများက မီးရှို့ခဲ့သေးသည်။ မီးရှို့ခံရသည့် အိမ်နှစ်လုံးအနက် တစ်လုံးမှာ ဦးဟူစိန်း၏ နေအိမ်ဖြစ်ပြီး ရွာတွင် အကြီးဆုံးအိမ်ဖြစ်သည်။
အာဏာပိုင်များက ရွာနှစ်ရွာကို အပိုင်သိမ်းလိုသောကြောင့် ယခုကဲ့သို့ ဇတ်လမ်းပေါင်းစုံ ထွင်လျက် ရှိသည်ဟု ဒေသခံများက ဝေဖန် ပြောဆိုနေကြသည်။
