နောက်ဆုံးသတင်း/ဆောင်းပါးများ

ရခိုင်ပြည်နယ် အရေး စိုးရိမ်ကြောင်း ကုလ ကိုယ်စားလှယ် ပြောကြား



27.7.2014

မြန်မာနိုင်ငံ ဆိုင်ရာ ကုလသမဂ္ဂ လူ့အခွင့် အရေး အထူး ကိုယ်စားလှယ် Ms Yanghee Lee က ရခိုင်ပြည်နယ်မှာ လက်ရှိ ဖြစ်ပေါ်နေတဲ့ အခြေအနေ တွေကြောင့် ဗုဒ္ဒဘာသာဝင်နဲ့ မွတ်စလင်တွေ အကြား ရာသက်ပန် ခွဲခြားမှု ဖြစ်ပေါ် လာမှာကို စိုးရိမ် ပူပန် မိကြောင်း မနေ့က ပြောကြား လိုက်ပါတယ်။

ဒါ့အပြင် သူက ဗုဒ္ဒဘာသာနဲ့ မွတ်စလင် လူမှု အသိုင်း အဝန်း ၂ ခုအကြား ပြန်လည် သင့်မြတ်ရေးကို အမြန်ဆုံး ဆောင်ရွက်ဖို့လည်း မြန်မာ အစိုးရကို တိုက်တွန်း လိုက်ပါတယ်။ မြန်မာနိုင်ငံကို ၁ဝ ရက်ကြာ သွားရောက် ခဲ့တဲ့ ကုလ အထူး ကိုယ်စားလှယ်က ရန်ကုန် လေဆိပ်မှာ မနေ့ညနေက သတင်းစာ ရှင်းပွဲ ပြုလုပ်ခဲ့ရာမှာ ခုလို ပြောဆို ခဲ့တာ ဖြစ်ပါတယ်။

Ms Yanghee Lee က မြန်မာပြည်မှာ အမှန် ပကတိ ဖြစ်ပျက်နေတဲ့ လူ့အခွင့်အရေး အခြေအနေ တွေကို ပိုမို သိရှိလိုတဲ့ အတွက် လာရောက်ခဲ့တာ ဖြစ်ကြောင်း၊ မိမိရဲ့ ပထမဆုံး ခရီးစဉ် အဆင်ပြေ ချောမွေ့အောင် အစစ အရာရာ ပံ့ပိုး ကူညီခဲ့တဲ့ မြန်မာ အစိုးရကို လှိုက်လှဲစွာ ကျေးဇူးတင် ရှိပါကြောင်း၊ ဒီခရီးစဉ် အတွင်း ကချင်ပြည်နယ်၊ ရခိုင်ပြည်နယ်နဲ့ မန္တလေးတိုင်း တွေကို သွားရောက် ကြည့်ရှု့ ခဲ့သလို အစိုးရ ခေါင်းဆောင်တွေ ၊ ဒေါ်အောင်ဆန်း စုကြည် အပါအဝင် နိုင်ငံရေး၊ ဘာသာရေးနဲ့ လူမှုရေး အဖွဲ့ အစည်း ခေါင်းဆောင် တွေနဲ့လည်း တွေ့ဆုံ နိုင်ခဲ့ကြောင်း ပြောပါတယ်။

အဲ့ဒီ နောက်သူက မြန်မာနိုင်ငံမှာ ပြီးခဲ့တဲ့ ၃ နှစ် အတွင်း နိုင်ငံရေး၊ စီးပွားရေးနဲ့ လူမှုရေး ကဏ္ဏတွေ အံ့သြဖွယ်ရာ တိုးတက် ပြောင်းလဲခဲ့တာကို မိမိတို့ သိရှိပါကြောင်း၊ အခုလို ပြုပြင် ပြောင်းလဲမှု ဆောင်ရွက် နေချိန်မှာ ကြုံတွေ့ရတဲ့ စိန်ခေါ်မှုတွေ ကို ကျော်လွှား အောင်မြင်ရေး အတွက် နိုင်ငံ တကာရဲ့အားပေး ကူညီမှုတွေ ပိုမိုလိုအပ်တယ်လို့ ဒီခရီးစဉ် အတွင်း မိမိကို လူအများအပြားက ပြောကြား ခဲ့တာကိုလည်း ပြန်လည် တင်ပြမှာ ဖြစ်ကြောင်း ပြောကြားရင်း တပြိုင်နက်မှာ မြန်မာပြည်ရဲ့ပြောင်းလဲမှု တွေကို ထိခိုက် ပျက်ပြားနိုင်တဲ့ လက္ခဏာ တွေကို အခု စိုးရိမ် ပူပန်စွာ မြင်တွေ့ နေရကြောင်း ၊ မြန်မာပြည် ဒီမိုကရေစီ ပြောင်းလဲရေးမှာ လွတ်လပ်စွာ ဆန္ဒ သဘောထား ဖော်ထုတ် ခွင့်တွေ၊ လွတ်လပ်စွာ စုဝေးခွင့်တွေ ရရှိခဲ့တာကို ထူးခြားတဲ့ တိုးတက်မှု အဖြစ် အားလုံးက ရှုမြင်ခဲ့ ကြပါကြောင်း၊ ဒါပေမယ့် လတ်တလောမှာ စာနယ်ဇင်း သမားတွေ ထောင်ချ ဖိနှိပ် တရားစွဲ ခံရမှု အပါအဝင် အဲဒီ လွတ်လပ်ခွင့်တွေ ပြန်လည် လျှော့နည်း သွားခဲ့တာကို သတိပြုမိကြောင်း၊ တိုင်းရင်းသူ တွေကို စစ်တပ်က မုဒိမ်းကျင့်မှု၊ အမျိုး ဘာသာ ကူးပြောင်းရေးနဲ့ လွတ်လပ်စွာ လက်ထပ် ထိမ်းမြားခွင့် ရရှိရေး လှုပ်ရှားသူ တွေကို ခြိမ်းခြောက် မှုတွေ ရှိနေတယ်လို့ ကြားသိ ရကြောင်း၊ လယ်ယာမြေ သိမ်းပိုက် ခံရလို့ ဆန္ဒပြသူ တွေကို အပြစ် ပေးတာတွေ ထောင်ထဲမှာ နိုင်ငံရေး သမားတွေ ကျန်ရှိနေတာ တွေလည်း သိရှိရကြောင်း စသဖြင့် ပြောကြား ခဲ့ပါတယ်။

အဲ့ဒီနောက် ရခိုင်ပြည်နယ် ခရီးစဉ်နဲ့ ပတ်သက်ပြီး ရခိုင်နဲ့ မွတ်စလင် အသိုင်းအဝန်း ၂ ခုလုံး ရဲ့ပြောကြားချက် တွေကို သူမ အလေးအနက် ဂရုစိုက်ပြီး နားထောင် ခဲ့ပါကြောင်း၊ နှစ်ဦး နှစ်ဖက် အမြင်တွေကို အသေအချာ သဘောပေါက် နားလည်ချင်လို့ ဖြစ်ကြောင်း၊ ရခိုင်ပြည်နယ်ဟာ မြန်မာပြည်မှာ အဆင်းရဲဆုံး ပြည်နယ် တခု ဖြစ်နေတာကို သိရှိခဲ့ ရသလို ရခိုင် တိုင်းရင်းသား တွေဟာ နှစ်ပေါင်း များစွာ ရေ၊ မီး၊ အိမ်သာစတဲ့ အခြေခံ လိုအပ်မှုတွေ မရရှိခဲ့ ကြကြောင်း၊ ရခိုင်ပြည်နယ်က ဒုက္ခသည် စခန်း တွေမှာ အခြေအနေ အလွန် ဆိုးဝါး နေကြောင်း ကုလသမဂ္ဂ လူ့အခွင့် အရေး အထူး ကိုယ်စားလှယ် Ms Yanghee Lee ကပြောပါတယ်။

တဆက်တည်းမှာ သူက ရခိုင်ပြည်နယ်မှာ မွတ်စလင်တွေ အပေါ် ခွဲခြား ဖိနှိပ် ဆက်ဆံမှုတွေ ရှိနေကြောင်း၊ မွတ်ဆလင်တွေ အနေနဲ့ လွတ်လပ်စွာ သွားလာခွင့်၊ လက်ထပ်ခွင့်၊ လယ်ယာ ပိုင်ဆိုင်ခွင့်၊ ကျန်းမာရေးနဲ့ ပညာရေး ဆိုင်ရာ အခွင့်အရေးတွေ ဆုံးရှုံး နေကြကြောင်း၊ ဖမ်းဆီးခံ နေရတဲ့ မွတ်ဆလင်တွေ နှိပ်စက် ခံရပြီး တရား ဥပဒေ ဆိုင်ရာ အခွင့်အရေးတွေ ဆုံးရှုံးနေတယ် လို့လည်း ကြားခဲ့ ရကြောင်း၊ ဒါ့အပြင် သူမကို အာဏာပိုင် တွေက ရိုဟင်ဂျာ လူမျိုးတွေကို အစိုးရ အနေနဲ့ အသိအမှတ် ပြုခြင်း မရှိတဲ့ အတွက် အဲ့ဒီ ရိုဟင်ဂျာ ဆိုတဲ့ စကားလုံးကို သုံးစွဲခြင်း မပြုဖို့ ထပ်တလဲလဲ ပြောဆို ခဲ့ကြောင်း၊ တကယ်တော့ သူမသိရှိထားတဲ့ နိုင်ငံတကာ လူ့အခွင့်အရေး ဥပဒေသတွေ အရဆိုရင် လူနည်းစု တွေမှာလည်း လူမျိုး ဘာသာ ကွဲပြားမှုကို အခြေပြုပြီး သူတို့ လူမျိုး အမည်ကို သူတို့ဖာသာ လွတ်လပ်စွာ ခေါ်ဝေါ် သတ်မှတ်ခွင့် ရှိပါကြောင်း ပြောကြား သွားခဲ့ပါတယ်။

အခုခရီးစဉ်က တွေ့ရှိချက်တွေနဲ့ ထပ်မံ ရရှိတဲ့ အချက်တွေကို ဖြည့်စွက်ပြီး ဒီနှစ်ကုန်ပိုင်း ကျင်းပမယ့် ၆၉ ကြိမ်မြောက် ကုလသမဂ္ဂ အထွေထွေ ညီလာခံမှာ အစီရင်ခံ တင်ပြမှာ ဖြစ်ကြောင်းလည်း Ms Yanghee Lee ကပြောကြား ခဲ့ပါတယ်။

Comment ရေးရန်

Rohingya Exodus