RSO ၀င်ရောက်နေသည်ဟု လုပ်ကြံ စွပ်စွဲ၍ ဒေသခံများ၏ ပိုင်ဆိုင်မှုများကို ဖျက်ဆီး

RB News
30.7.2014

မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း ၀ါချကျေးရွာနှင့် သံဒါ ကျေးရွာများသို့ ဘူးသီးတောင်မြို့နယ် အခြေစိုက် စစ်ဗျူဟာမှူးနှင့် အဖွဲ့ ရောက်ရှိလာပြီး ရွာထဲတွင် RSO များ ရောက်ရှိနေသည်ဟု မဟုတ်မမှန် စွပ်စွဲ၍ ဒေသခံ ရိုဟင်ဂျာများ၏ ပိုင်ဆိုင်မှုများကို ဖျက်ဆီးခဲ့ကြောင်း သတင်း ရရှိပါသည်။

ယမန်နေ့ (ဇူလိုင် ၂၉) နေ့လည်ပိုင်းတွင် ဘူးသီးတောင်မြို့နယ် အခြေစိုက် စစ်ဗျူဟာမှူးနှင့် စစ်သား ၈၀ ကျော်တို့သည် မောင်တောမြို့နယ် တောင်ပိုင်း ၀ါးချကျေးရွာနှင့် သံဒါကျေးရွာများသို့ ကားများဖြင့် ရောက်ရှိလာပြီး အုပ်ချုပ်ရေးမှူး များကို ဆင့်ခေါ်ကာ ရွာနှစ်ရွာတွင် တဖက်နိုင်ငံမှ RSO အဖွဲ့ရောက်နေသည်ဟု ပြောဆို၍ ဒေသခံ ရိုဟင်ဂျာ များ၏ နေအိမ်များကို ၀င်ရောက် ရှာဖွေခဲ့သည်။ ထိုသို့ ရှာဖွေရာတွင် ၎င်းတို့ မျက်စိရှေ့တွင် တွေ့သည့် တံခါးများ၊ ဗီဒိုများ၊ သေတ္တာများ၊ မီးဖိုချောင်သုံး ပစ္စည်းများ၊ ဟင်းအိုးပါ မကျန် ဖျက်ဆီး သွားခဲ့ကြောင်း ဒေသခံ တစ်ဦးက RB News သို့ပြောပါသည်။ အချို့ အိမ်များတွင် ချက်ပြုတ်ထားသည့် ဟင်းများ၊ အီးဒ်နေ့တွင် ဧည့်ခံရန် ချက်ထားသည့် ဆမိုင်မုန့် များကိုလည်း အိမ်ရှင်များ၏ ခွင့်ပြုချက် မပါဘဲ စားသုံးသွားသည်ဟု အဆိုပါ ဒေသခံက ပြောပါသည်။

ဗျူဟာမှူးနှင့် တပ်ဖွဲ့ဝင်များက ကျေးရွာ နှစ်ရွာ အတွင်းရှိ ငွေကြေး တတ်နိုင်သူများကို ပစ်မှတ်ထား၍ လုပ်ကြံ စွပ်စွဲမှုများ ပြုလုပ်ခဲ့သည်ဟု ဆိုသည်။ အချို့ ရွာသားများမှာ အကြောင်းမဲ့ ဖမ်းဆီးခံရမည်ကို စိုးရိမ်၍ တိမ်းရှောင်သွား ခဲ့ရသည်။