BGP နှင့် စစ်တပ်တို့ ပေါင်း၍ သေနတ် ၁၈ ချက် ဖောက်ပြီး ဒေသခံများကို ခြိမ်းခြောက်
RB News
12.8.2014
မောင်တော ။ ။ ရခိုင်ပြည်နယ်၊ မောင်တောမြို့နယ်၊ ခမောင်းဆိပ် ကျေးရွာ အုပ်စုသို့ နယ်ခြားစောင့် ရဲတပ်ဖွဲ့ (BGP)၊ မ.က.ဖ နှင့် စစ်တပ်များ ၀င်ရောက်ပြီး ၎င်းတို့၏ လူဦးရေ စစ်ဆေးမှုတွင် ပါဝင်ရန် သေနတ် ၁၈ ချက်ဖောက်၍ ဒေသခံများကို ခြိမ်းခြောက်ပြီး အထိတ်တလန့် ဖြစ်အောင် ပြုလုပ်ခဲ့ကြောင်း သတင်း ရရှိပါသည်။
နယ်ခြားစောင့် ရဲတပ်ဖွဲ့ဝင်များ၊ အမှတ် (၁၅) စစ်ဆင်ရေး ကွပ်ကဲမှု အဖွဲ့နှင့် မ.က.ဖ အဖွဲ့တို့သည် သြဂုတ်လ (၉) ရက်နေ့ ညနေ ၆ နာရီ အချိန်တွင် မောင်တောမြို့နယ်၊ ခမောင်းဆိပ် ကျေးရွာအုပ်စု၊ ခမောင်းဆိပ်ရွာသို့ ရောက်ရှိလာပြီး၊ ကျေးရွာ အုပ်ချုပ်ရေးမှူး ဦးထွန်းထွန်း၊ ကျေးရွာ တာဝန်ခံ ဦးစိုးနိုင်၊ ရာအိမ်မှူးများ၊ ဆယ်အိမ်မှူးများနှင့် ပူးပေါင်း၍ လူဦးရေ စစ်ဆေးခြင်း လုပ်ငန်းကို ဆောင်ရွက်ခဲ့သည်။ လူဦးရေ စစ်ဆေးခြင်းဟု ခေါင်းစဉ် တပ်ထားသော်လည်း တရားမ၀င် ခိုးဝင် လာသည့် ဘင်္ဂလီများဟု မှတ်တမ်းတင်လျက် ရှိသောကြောင့် ဒေသခံ ရိုဟင်ဂျာ အများစုက စစ်ဆေးခံရန် ငြင်းဆန်ခဲ့ရာ ည ၈ နာရီ အချိန်တွင် ကျေးရွာ အုပ်ချုပ်ရေးမှူးရုံး၏ မျက်နှာချင်းဆိုင်ရှိ လက်သမား ဦးရှောမ်ရှု၏ နေအိမ် တံခါးကို သေနတ်ဖြင့် ရိုက်ချိုး၍ အိမ်ထဲသို့ ၀င်ရောက်ပြီး ဦးရှောမ်ရှုကို ရှာဖွေခဲ့သည်။
ထို့နောက် လက်နက်ကိုင် အာဏာပိုင်များသည် အဆိုပါ နေအိမ်မှ ထွက်လာပြီး၊ သေနတ် (၁၈) ချက် ပစ်ဖောက်၍ ဒေသခံများကို ခြိမ်းခြောက် ခဲ့ကြောင်း ဒေသခံ တစ်ဦးက RB News သို့ပြောပါသည်။
ထိုကဲ့သို့ သေနတ် ပစ်ဖောက်၍ ခြိမ်းခြောက်ပြီး စစ်ဆေးခံရန် ပြုလုပ်မှုကြောင့် ဒေသခံ ရွာသား အချို့ ရွာမှ တိမ်းရှောင် သွားခဲ့ကြောင်း ရွာသားများ၏ ပြောကြားချက်များ အရ သိရှိရပါသည်။
ဘူးသီးတောင်မြို့နယ်တွင် လူဦးရေ စစ်ဆေးခြင်း ဟု၍ လူမျိုး အမည် မပါဘဲ စစ်ဆေးခဲ့သော်လည်း မောင်တောမြို့နယ်တွင် တရားမ၀င် ခိုးဝင်လာသည့် ဘင်္ဂလီများဟု စာရင်းပြုစု၍ ကောက်ခံလျက် ရှိသည့် အတွက် ဒေသခံ ရိုဟင်ဂျာများမှာ ပါဝင် စစ်ဆေးခံခြင်း မရှိသောကြောင့် လက်နက် အာဏာပိုင်များ၏ ခြိမ်းခြောက်မှု ပေါင်းစုံကို ရင်ဆိုင် နေရသည်။
