မောင်တောမြို့ရှိ ဆက်သွယ်ရေး အင်ဂျင်နီယာ၏ မတရား ငွေရှာမှုကြောင့် ဖုန်းသုံးသူများ အခက်တွေ့
Rohingya Eye
RB News
16.8.2014
မောင်တော ။ ။ ရခိုင်ပြည်နယ် မောင်တောမြို့နယ်ရှိ ကြိုးဖုန်း သုံးစွဲနေသူများ၊ မိုဘိုင်းဖုန်း ဆင်းမ်ကဒ်လို နေသူများမှာ ဆယ်သွယ်ရေး တာဝန်ခံ ဦးအောင်ဇော်၏ မတရားသည့် နည်းလမ်းဖြင့် ငွေရှာနေခြင်းကြောင့် အခက်ကြုံတွေ့ နေရကြောင်း သတင်း ရရှိပါသည်။
မောင်တောမြို့နယ်တွင် ကြိုးဖုန်း သုံးစွဲနေသူ (၄၀၀) ဦးကျော်ရှိပြီး၊ ပြည်နယ် ဆက်သွယ်ရေး ဌာနမှ ပေးပို့သည့် တယ်လီဖုန်း ဘီလ်များကို မောင်တောမြို့နယ် ဒီဂျစ်တယ် အော်တို တယ်လီဖုန်း ဆက်သွယ်ရေး တာဝန်ခံ အင်ဂျင်နီယာ ဦးအောင်ဇော်က သုံးစွဲသူများထံ မပေးပို့ဘဲ တယ်လီဖုန်း လိုင်းများကို ဖြတ်တောက် ထားသည်ဟု သုံးစွဲသူများ၏ ပြောကြားချက်များ အရ သိရှိရပါသည်။ တယ်လီဖုန်း ဘီလ်များကို ပေးသွင်းပါကလည်း ချက်ချင်း ပြန်လည် ချိတ်ဆက် ပေးခြင်းမရှိဘဲ တစ်ပတ်ခန့် ကြာမှသာ ပြန်လည် ချိတ်ဆက် ပေးသဖြင့် သုံးစွဲနေသူများ အခက်ကြုံနေ ရသည်ဟု ဒေသခံ တစ်ဦးက RB News သို့ပြောပါသည်။
ထို့အပြင် တယ်လီဖုန်း ဘီလ် ပေးသွင်းလျှင်လည်း တယ်လီဖုန်း ဘီလ် အပြင် ငွေကျပ် ၃၀၀/- ကို မဖြစ်မနေ ပေးဆောင် နေရပြီး၊ တယ်လီဖုန်း လိုင်းပြတ်တောက် သွားပါက ပြန်လည် ချိတ်ဆက်ဟု ဆိုကာ ငွေကျပ် ၃၀၀၀/- မဖြစ်မနေ ပေးနေရသည်ဟု အဆိုပါ ဒေသခံက ပြောပါသည်။ တယ်လီဖုန်း လိုင်းကို တစ်နေရာမှ တစ်နေရာသို့ ပြောင်းရွှေ့ ပါကလည်း အင်ဂျင်နီယာ ဦးအောင်ဇော်ကို ငွေကျပ် ငါးသောင်း ပေးရသည်ဟု ဆိုသည်။
နိုင်ငံတော်မှ ငွေကျပ် ၁၅၀၀/- ဖြင့် ချပေးသည့် ဂျီအက်စ်အမ် ဆင်းမ်ကဒ်များကိုလည်း ဒေသခံ ရိုဟင်ဂျာများကို နိုင်ငံသား စီစစ်ရေး ကဒ်ပြားမရှိဟု ဆိုကာ တိုက်ရိုက် မရောင်းချဘဲ၊ ဗုဒ္ဓဘာသာဝင် တစ်ဦးကို ကြားခံ ထားကာ ငွေကျပ် (၈) သောင်းဖြင့် အဆိုပါ အင်ဂျင်နီယာ ဦးအောင်ဇော်က ရောင်းချ နေကြောင်း သိရှိရပါသည်။
မောင်တောမြို့နယ်တွင် ဆက်သွယ်ရေးမှ ကြိုးဖုန်းများကို တရားဝင် သုံးစွဲခွင့် ရရှိနေသော်လည်း အင်ဂျင်နီယာ ဦးအောင်ဇော်၏ မတရားသဖြင့် ငွေညှစ်နေမှုများကြောင့် သုံးစွဲနေသူများ အခက်ကြုံနေရသလို၊ ငွေကျပ် ၁၅၀၀/ ဖြင့် အစိုးရမှ ချပေးသည့် ဆင်းမ်ကဒ်များကိုလည်း ဈေးကြီးပေး၍ သုံးစွဲနေရသည်ဟု အဆိုပါ ဒေသခံမှ ပြောပါသည်။
