ဘင်္ဘောကွဲနှင့် အင်းဒင် နယ်ခြားစောင့် ရဲများ ပူးပေါင်းပြီး အပြစ်မဲ့များ ဖမ်းဆီးပြီး ငွေညှစ်
MYARF
RB News
3.2.2015
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်း ဘင်္ဘောကွဲ ကျေးရွာနှင့် အင်းဒင် ကျေးရွာများတွင် နယ်ခြားစောင့် ရဲများက အပြစ်မဲ့ ဒေသခံများကို မဟုတ်မမှန် စွပ်စွဲမှုများ ပြုလုပ်ပြီး ဖမ်းဆီးပြီး ငွေညှစ်ခဲ့ကြောင်း သတင်း ရရှိပါသည်။
ဇန်န၀ါရီလ (၂၉) ရက်နေ့ ည ၁၁း၃၀ နာရီ အချိန်တွင် မောင်တောမြို့နယ် တောင်ပိုင်း သင်္ဘောကွဲ ကျေးရွာ အခြေစိုက် နယ်ခြားစောင့် ရဲတပ်ဖွဲ့မှ နယ်ခြားစောင့် ရဲများသည် ဘင်္ဘောကွဲ ကျေးရွာမှ မော်လ၀ီ အဒူဆော်လာမ် (ဘ) ဦးအဒူဟာလဲခ် (အသက် ၅၂ နှစ်) ၏ ခြံဝင်း ဂိတ်တံခါးနှင့် အိမ်တံခါးများကို ဖျက်ဆီး၍ အိမ်ထဲသို့ ၀င်ရောက်ပြီး မော်လ၀ီ အဒူဆော်လာမ်ကို မိသားစုဝင်များ ရှေ့တွင် လူမဆန်စွာ ရိုက်နှက်ပြီး ဖမ်းဆီး ခေါ်ဆောင် သွားခဲ့သည်။ ထို့နောက် ညသန်းခေါင်ယံ ၁၂း၃၀ နာရီ အချိန်တွင် ဦးမော်ဂုလ်အာမတ် (ဘ) ဦးနော်ဘီဟူစိန်း၏ နေအိမ် တံခါးကို ဖျက်ဆီး၍ ၀င်ရောက်၍ ၎င်းကိုလည်း ဖမ်းဆီး သွားခဲ့သည်။
တစ်ဖန် မာမတ်နူရ် (ဘ) မော်လ၀ီ ဇော်ကော်ရီယာ (အသက် ၂၅ နှစ်) ကိုလည်း ဖမ်းဆီးခဲ့သည်။ မော်လ၀ီ အဒူဆော်လာမ်နှင့် မာမတ်နူရ်တို့ကို ဓါးပြ အဒူလာကိမ်းနှင့် အဖွဲ့ကို ထမင်းကျွေးခဲ့သည်ဟု လုပ်ကြံစွပ်စွဲပြီး၊ ဦးမော်ဂုလ်အာမတ်ကိုမူ သားတစ်ယောက် မလေးရှားနိုင်ငံမှ တရားမ၀င် ၀င်ရောက်လာသည်ကို လက်ခံထားသည်ဟု လုပ်ကြံ စွပ်စွဲ၍ ဘင်္ဘောကွဲ နယ်ခြားစောင့် ရဲကင်းစခန်းတွင် (၃) ဦးစလုံးကို လူမဆန်စွာ ရိုက်နှက်၍ ဇန်န၀ါရီလ (၃၀) ရက်နေ့တွင် အင်းဒင်ရှိ နယ်ခြားစောင့် ရဲတပ်ဖွဲ့ စခန်းသို့ လွှဲအပ်ခဲ့သည်။
အင်းဒင် စခန်းတွင်လည်း ၎င်းတို့ကို လူမဆန်စွာ ထပ်မံ၍ ရိုက်နှက် နှိပ်စက်ပြီး မော်လ၀ီ အဒူဆော်လမ် ထံမှ ငွေကျပ် နှစ်သိန်း ငါးသောင်းနှင့် ဦးမော်ဂုလ်အာမတ် ထံမှ ငွေကျပ် တစ်သိန်း ငါးသောင်း ညှစ်ယူ၍ ဖေဖော်ဝါရီလ (၁) ရက်နေ့ နေ၀င်ချိန်တွင် ပြန်လည် လွှတ်ပေးခဲ့ကြောင်း ဒေသခံ တစ်ဦးက RB News သို့ပြောသည်။
(၃) ဦးမှ (၂) ဦးကို ငွေညှစ်၍ ပြန်လည် လွှတ်ပေးခဲ့သော်လည်း မာမတ်နူရ်ကို ပြန်လည် မလွှတ်ပေးခဲ့သည့် အတွက် မိသားစုများက အင်းဒင် စခန်းတွင် စုံစမ်းရာ အင်းဒင် စခန်းတွင် မရှိတော့ကြောင်း သိရသည်။ မာမတ်နူရ်ကို ထားရှိသည့် နေရာကို မသိရှိရသည့် အတွက် မိသားစုဝင်များက ၎င်းကို သတ်ပစ်လိုက်ပြီလားဟု သံသယ ဖြစ်လျက် ရှိနေကြပြီး၊ အထူးစိုးရိမ် ပူပန်လျက် ရှိကြောင်း အဆိုပါ ဒေသခံက ပြောပါသည်။
နယ်ခြားစောင့် ရဲများသည် နေ့လည်ပိုင်း အချိန်တွင် ၎င်းတို့ စခန်းတွင် ပွဲစားများ အဖြစ် ထားရှိသည့် ဦးအဒူမူနာဖ် (ဘ) ဦးဟာလာ (အသက် ၃၅ နှစ်) နှင့် ဦးနူရ်မာမတ် (ဘ) ဦးနော်ဘီဟူစိန်း (အသက် ၄၂ နှစ်) တို့နှင့် အတူ ရွာထဲရှိ ငွေကြေး တတ်နိုင်သည့် အိမ်များကို ဆိုင်ကယ်ဖြင့် လှည့်လည်၍ ကြည့်ရှုပြီး ညပိုင်းတွင် ဖမ်းဆီးပြီး ငွေညှစ်လေ့ ရှိသည်ဟု ဆိုသည်။
