ပြည်ခိုင်ဖြိုး ပါတီ စည်းရုံးရေး ခရီးစဉ်တွင် ပြောကြားချက်များကို ဒေသခံများ အလွန်စိတ်ပျက်
RB News
2.2.2015
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်းရှိ ကျေးရွာများသို့ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီမှ လွှတ်တော် အမတ်များ စည်းရုံးရေး ဆင်းခဲ့ကြပြီး၊ စည်းရုံးရေး ခရီးစဉ် အတွင်း ပြောကြားချက် များကြောင့် ယင်းပါတီ အပေါ် ဒေသခံများ အလွန်စိတ်ပျက် လျက်ရှိကြောင်း သတင်း ရရှိပါသည်။
ဖေဖော်ဝါရီလ (၁) ရက်နေ့တွင် ရခိုင်ပြည်နယ် အစိုးရ စီးပွားရေးရာ ၀န်ကြီး၊ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ ကိုယ်စားပြု ပြည်နယ် လွှတ်တော် ကိုယ်စားလှယ် ဦးမြအောင်နှင့် အမျိုးသား လွှတ်တော် ကိုယ်စားလှယ် ဦးသာခင် တို့သည် မောင်တောမြို့နယ် ကျေးရွာ အချို့သို့ သွားရောက်၍ ဒေသခံ ရိုဟင်ဂျာများကို အစည်းအဝေး ခေါ်ယူ၍ ပြည်ခိုင်ဖြိုး ပါတီကို မဲထည့်ရန် စည်းရုံးခဲ့ကြောင်း ဒေသခံများက RB News သို့ပြောပါသည်။
အစည်းအဝေးတွင် ဦးမြအောင်က ၂၀၁၅ ရွေးကောက်ပွဲတွင် ပြည်ခိုင်ဖြိုး ပါတီ အနိုင်ရရှိပါက ဒေသ ဖွံ့ဖြိုးရေး လုပ်ငန်းများ၊ လမ်း၊ တံတားများ၊ ကျောင်းများနှင့် ဆေးရုံများ ပိုမို တည်ဆောက် ပေးမည် ဖြစ်ကြောင်း၊ ယာယီ သက်သေခံ လက်မှတ် ကိုင်ဆောင်သူ များအား ၁၉၈၂ ခုနှစ် နိုင်ငံသား ဥပဒေနှင့် အညီ နိုင်ငံသား ဖြစ်ခွင့်ရသူများနှင့် နိုင်ငံသား ပြုခွင့်ရသူများ ဖြစ်အောင် အစွမ်းကုန် ကြိုးပမ်း ဆောင်ရွက် နေကြောင်း၊ လွတ်လပ်မှုသည် လူမျိုးအမည် နာမ တစ်ခုထက် ပိုတန်ဖိုးရှိ အရေးကြီးကြောင်း ပြောဆိုပြီးနောက် ၎င်းက ဆက်လက်၍ “ကျီးသည် ဒေါင်းအသွင် ဆောင်လျှင်လည်း ကျီးကန်းကို ကျီးကန်းလို့သာ ခေါ်ဆိုမှာ ဖြစ်တယ်။ ယခုလည်း ဘင်္ဂလီကို ဘင်္ဂလီပဲ ပေးမယ်။ ရိုဟင်ဂျာကို တို့ရခိုင်တွေ လက်မခံဘူး။ ဒါတစ်သက်လုံး မရဘူး။ ဒါပေမယ့် ပြည်ခိုင်ဖြိုး ပါတီက ဘင်္ဂလီ အမည်ဖြင့် ရခိုင် တိုင်းရင်းသားနှင့် တန်းတူ အခွင့်အရေး ပေးတာကို မင်းတို့ အဆုံးရှုံး မခံနဲ့” ဟု ပြောဆိုသွားခဲ့ကြောင်း ဒေသခံ တစ်ဦးက RB News သို့ပြောသည်။
ဦးမြအောင်၏ ပြောကြားချက် အချို့ကို ဒေသခံများက လက်ခံသော်လည်း ကျီးကန်းနှင့် ဒေါင်း ဥပမာ ပေးပြီး ရိုဟင်ဂျာများအား ဘင်္ဂလီဟု စွပ်စွဲ သမုတ်ပြောဆိုမှုကို ပြည်ခိုင်ဖြိုးပါတီကို အမာခံ ထောက်ခံသူများပင် အလွန်တရာ စိတ်ပျက်၍ မကျေမနပ် ဖြစ်နေသည်ဟု အဆိုပါ ဒေသခံက ပြောပါသည်။
အစည်းအဝေးကို ကျောက်ပန္ဒူ ကျေးရွာ၊ မြင်းလွတ် ကျေးရွာနှင့် အလယ်သံကျော် ကျေးရွာ များတွင် ကျင်းပခဲ့ကြောင်း သိရသည်။ ယခုရက်ပိုင်းတွင် နယ်ခြားစောင့် ရဲတပ်ဖွဲ့ ကွပ်ကဲရေးမှူး ရဲမှူးချုပ် တင်ကိုကိုက ယခင် မီးသတ်တပ်ဖွဲ့တွင် တာဝန်ထမ်းဆောင် ခဲ့သော ဒေသခံ ရိုဟင်ဂျာများကို လစာကောင်းကောင်း ပေး၍ အစိုးရ ၀န်ထမ်း ခန့်မည် ဖြစ်ကြောင်း၊ သို့သော် နိုင်ငံသား လျှောက်ရန် လိုသည်ဟု စသည်ဖြင့် စည်းရုံးမှုများလည်း ရှိနေသည်ဟု ဆိုသည်။
ပြည်ခိုင်ဖြိုးပါတီနှင့် နယ်ခြားစောင့် ရဲတပ်ဖွဲ့တို့က စည်းရုံးလျှင်လည်း ဒေသခံ ရိုဟင်ဂျာများသည် မိမိတို့နှင့် ထိုက်တန်သည့် ပန်းရောင် နိုင်ငံသား စီစစ်ရေး ကဒ်ပြားကို ရိုဟင်ဂျာ အမည်ဖြင့် ရမည် ဆိုမှသာ လျှောက်ထားမည်ဟု ဒေသခံများက ပြောပါသည်။
