ပုဇွန်သားပေါက် တစ်ဦးတည်း ကိုယ်စားလှယ်ကြောင့် ဒေသခံများ ၀င်ငွေနည်းပါးမှုနှင့် ကြုံတွေ့ရ
Rohingya Eye
RB News
4.3.2015
မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း သရက်အုပ် (မင်္ဂလာ) ကျေးရွာတွင် ပုဇွန်သားပေါက် လုပ်ငန်းကို တစ်ဦးတည်း ကိုယ်စားလှယ် ပေးထားခြင်းကြောင့် ပုဇွန်သားပေါက် ရှာဖွေ၍ အသက်မွေးဝမ်းကျောင်း ပြုနေသူများ ၀င်ငွေနည်းပါးမှုနှင့် ကြုံတွေ့နေရကြောင်း သတင်း ရရှိပါသည်။
မောင်တောမြို့နယ် မြောက်ပိုင်း သရက်အုပ် (မင်္ဂလာ) ကျေးရွာတွင် ဒေသခံ ရွာသား အများစုမှာ ကမ်းခြေနှင့် ချောင်းများကို မှီခို၍ ပုဇွန်သားပေါက်များ ရှာဖွေပြီး ၎င်းတို့၏ မိသားစုများ စားဝတ်နေရေး အတွက် ၀င်ငွေရှာနေခြင်း ဖြစ်သည်။ ဖေဖော်ဝါရီလ (၂၀) ရက်နေ့မှ စ၍ နယ်ခြားစောင့် ရဲတပ်ဖွဲ့ ကွပ်ကဲရေးမှူး ရဲမှူးချုပ် တင်ကိုကို၏ အမိန့်စာဖြင့် တစ်ဦးတည်း ကိုယ်စားလှယ် အဖြစ် ရွက်ညိုတောင် ကျေးရွာသား ဦးဟာဘီအုလ္လာ (အသက် ၄၅ နှစ်) ကို ပေးအပ်ခဲ့ပြီး၊ ၎င်းက သရက်အုပ် ကျေးရွာသား ဦးဟိုက်ရှုလာမီးန် (ဘ) ဦးနေဆာရ်အာမတ် (အသက် ၄၀ နှစ်) နှင့် ဦးအာဘူလ်ကာလာမ် (ဘ) ဦးအဘူမူဆာ (အသက် ၂၀ နှစ်) တို့ကို တစ်ဆင့် ကိုယ်စားလှယ် လုပ်ကိုင်ခွင့် ပေးခဲ့သည်။
အဆိုပါ ကျေးရွာမှ ဒေသခံများက ရှာဖွေ ရရှိသည့် ပုဇွန်သားပေါက် များကို တစ်ဆင့် ကိုယ်စားလှယ် နှစ်ဦးထံ ရောင်းချရပြီး၊ အပြင်သို့ ရောင်းချလျှင် ဒဏ်ငွေ ပေးဆောင် ရကြောင်း ဒေသခံ တစ်ဦးက RB News သို့ပြောသည်။ ၎င်းတို့ နှစ်ဦးက ပုဇွန်သားပေါက်ငယ် များကို (၅) ကျပ် (သို့) (၆) ကျပ်နှုန်းဖြင့် ၀ယ်ယူပြီး ဈေးကွက်တွင် (၁၄) ကျပ်နှုန်းဖြင့် ရောင်းချလျက် ရှိသည်။
ယခုကဲ့သို့ တစ်ဦးတည်း လုပ်ကိုင်ခွင့် ပေးအပ်လိုက်ခြင်းကြောင့် ဒေသခံများမှ ၀င်ငွေတစ်ဝက်ကျော် နစ်နာနေကြသည်။ ပုဇွန်သားပေါက် ရှာသူ တစ်ဦးက “ ကျွန်တော်တို့ ပုဇွန်သားပေါက် တွေရှာပြီး မိသားစု အတွက် ၀င်ငွေရှာနေတာပါ။ အခု တစ်ဦးတည်း ကိုယ်စားလှယ် ပေးလိုက်တာကြောင့် ကျွန်တော်တို့ရဲ့ စီးပွားပျက်တာတင်မက ၀င်ငွေလျော့နည်း သွားတာကြောင့် ကလေးတွေရဲ့ ပညာရေး အတွက် ထောက်ပံ့တာမှာတောင် ထိခိုက်နေပါပြီ။” ဟု ပြောသည်။
