ရဲမှူးချုပ်တင်ကိုကို အမိန့်ဖြင့် နေ့စဉ် လက်သမား (၃) ဦး လုပ်အားပေးနေရ
Rohingya Eye
RB News
4.3.2015
မောင်တော ။ ။ ရခိုင်ပြည်နယ်၊ မောင်တောမြို့နယ် ကျီးကန်းပြင် ကျေးရွာ အခြေစိုက် အမှတ် (၁) နယ်ခြားစောင့် ရဲတပ်ဖွဲ့ ကွပ်ကဲရေးမှူး ရဲမှူးချုပ် တင်ကိုကို၏ အမိန့်ဖြင့် လက်သမား (၃) ဦး နေ့စဉ် လုပ်အားပေး နေရကြောင်း သတင်း ရရှိပါသည်။
မောင်တောမြို့နယ် ကျီးကန်းပြင် ကျေးရွာ အခြေစိုက် နယ်ခြားစောင့် ရဲတပ်ဖွဲ့ ဌာနချုပ်တွင် အရာရှိ ရိပ်သာ ဆောက်လုပ်လျက် ရှိရာ၊ ဖေဖော်ဝါရီလ (၂၁) ရက်နေ့မှ စ၍ ကွပ်ကဲရေးမှူး ရဲမှူးချုပ် တင်ကိုကို၏ အမိန့်ဖြင့် ကျီးကန်းပြင် ကျေးရွာမှ လက်သမား (၃) ဦးစီကို နေ့စဉ် အတင်းအဓမ္မ လုပ်အားပေးခိုင်း လျက်ရှိကြောင်း ဒေသခံများက RB News သို့ပြောသည်။ အဆိုပါ အရာရှိ ရိပ်သာကို ၀ါးနံရံ၊ သွပ်မိုးဖြင့် ဆောက်လုပ်လျက် ရှိသည်ဟု ဆိုသည်။
လက်သမား တစ်ဦးက “မနက် ၉ နာရီကနေ ညနေ ၆ နာရီထိ မလုပ်မနေရ အမိန့်နဲ့ လုပ်နေရတာပါ။ ပုံမှန်အားဖြင့် တစ်နေ့ အလုပ်လုပ်ရင်တောင် တစ်နပ် စားဖို့ အနိုင်နိုင် ဖြစ်နေတဲ့ကြားက အခု တစ်နေကုန် အလုပ်လုပ်ပြီးတော့ ဘာဝင်ငွေမှ မရတော့ စားဖို့သောက်ဖို့တောင် တော်တော်လေး အခက်အခဲ ဖြစ်နေတယ်။ ၀င်ငွေမရတော့ အိမ်မှာ ဘာမှ ၀ယ်မပေးနိုင်ဘူး၊ အဲဒီတော့ ကလေးတွေ စားဖို့တောင် တောင်းစားနေရတယ်။ ကျွန်တော်တို့ရဲ့ စားဝတ်နေရေးကို ရင်းနှီးပြီး နယ်ခြားစောင့် ရဲတပ်ဖွဲ့က အရာရှိ ရိပ်သာကို ဆောက်လုပ်ပေးနေရတယ်” ဟု ဆိုသည်။
ဖေဖော်ဝါရီလ (၂၁) ရက်နေ့မှ စ၍ ရဲမှူးချုပ် တင်ကိုကို၏ အမိန့်ဖြင့် စတင်သည့် အတင်းအဓမ္မ ခိုင်းစေမှုသည် ယနေ့ အချိန်ထိ ရှိနေကြောင်း ဒေသခံများက ပြောပါသည်။
