လုပ်ငန်းခွင်တွင် သေဆုံး သွားသူ၏ အလောင်း အတွက် ဆေးရုံနှင့် ရဲများက ငွေညှစ်
MYARF
RB News
4.3.2015
မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ၀က်ကျိန်း ကျေးရွာတွင် တံတားဆောက်လုပ် နေသည့် လုပ်ငန်းခွင်တွင် သေဆုံး သွားသူ တစ်ဦး၏ အလောင်းကို အကြောင်းပြု၍ ဆေးရုံ ၀န်ထမ်းနှင့် ရဲများက ငွေညှစ်ခဲ့ကြောင်း သတင်း ရရှိပါသည်။
မောင်တော မြို့နယ် မြောက်ပိုင်း ရေတွင်းကျွန်း ကျေးရွာမှ ဦးအာဘူလ်ဟာရှိမ်း၏ သားများ ဖြစ်သော ဦးအာရ်ဖာတ်အုလ္လာနှင့် ၎င်း၏ အစ်ကို ဖြစ်သူတို့သည် မောင်တောမြို့နယ် မြောက်ပိုင်း၊ အမှတ် (၄) နယ်မြေ၊ ၀က်ကျိန်း ကျေးရွာ၌ စည်ပင်သာယာရေး အဖွဲ့မှ တံတား ဆောက်လုပ်နေသည့် လုပ်ငန်းခွင်တွင် ၎င်းတို့၏ ညီအစ်ကို တ၀မ်းကွဲ တော်စပ်သူနှင့် သွားရောက် အလုပ်လုပ်ခဲ့ရာ ဖေဖော်ဝါရီလ (၂၆) ရက်နေ့တွင် ၁၂ နာရီ အချိန်၌ လုပ်ငန်းခွင်တွင် မြေပြိုကျပြီး ဦးအာရ်ဖတ်အုလ္လာ သေဆုံးခဲ့သည်။ ၎င်းသေဆုံးပြီးနောက် အခြား အလုပ်သမားများက သက်ဆိုင်ရာသို့ အကြောင်းကြားရာ ၎င်း၏ ရုပ်အလောင်းကို ကြိမ်ချောင်း ရဲစခန်းသို့ သယ်ယူသွားပြီး ထိုမှတဆင့် မောင်တော ရဲစခန်းသို့ ပို့ဆောင်ခဲ့သည်။
မောင်တော ရဲစခန်းမှ တဆင့် မောင်တော ပြည်သူ့ ဆေးရုံသို့ ပို့ဆောင် ခဲ့သည်။ ဆေးရုံတွင် ၎င်း၏ အလောင်းကို ခွဲစိတ်ရန် ပြုလုပ်နေသဖြင့် ဖခင် ဖြစ်သူ ဦးအာဘူလ်ဟာရှိမ်းက မခွဲစိတ်ရန် ပန်ကြားရာ ဆေးရုံမှ တာဝန်ရှိသူက မခွဲစိတ်လိုလျှင် ငွေကျပ် ၅ သိန်း ပေးရမည်ဟု ပြောဆိုသဖြင့် ငွေကျပ် ၅ သိန်း ပေးခဲ့သည်။ သို့သော်လည်း ဆေးရုံမှ တာဝန်ရှိသူက ငွေကျပ် ၅ သိန်း ရယူပြီး အလောင်းကို ခွဲစိတ်၍ ရဲများထံသို့ အပ်နှံခဲ့သည်။ တစ်ဖန် ရဲများက အလောင်းပြန် ထုတ်ပေးရန်ဟု ဆိုကာ ငွေကျပ် တစ်သိန်း ငါးသောင်း ညှစ်ယူခဲ့ကြောင်း ဒေသခံများက RB News သို့ပြောသည်။
ရဲများကို ငွေတစ်သိန်း ငါးသောင်း ပေးပြီးနောက် ဖခင် ဖြစ်သူ ဦးအာဘူလ်ဟာရှိမ်းက သားဖြစ်သူ၏ အလောင်းကို နေအိမ်သို့ သယ်ဆောင် သွားပြီးနောက် ညနေ နေ၀င်ချိန်တွင် မြေမြှပ် သဂြိုဟ်ခဲ့သည်။
