ရခိုင်ပြည်နယ်မှာ တိုက်ပွဲတွေကြောင့် လုံခြုံရေးတင်းကြပ်
 |
| ရခိုင်ပြည်နယ်မှာ စစ်တွေ မြို့နယ်မှာ ၂ဝ၁၅ ခုနှစ် နိုဝင်ဘာလ ၁၉ ရက်နေ့က လူဝင်လူထွက် ဂိတ်တွေကို လုံခြုံရေးတွေ တိုးမြှင့်ထားပြီး စစ်ဆေးမှုတွေ ပြုလုပ်စဉ် |
RFA မြန်မာပိုင်း
28.4.2016
ရခိုင်ပြည်နယ်မှာ အစိုးရ တပ်မတော်နဲ့ ရက္ခိုင့် တပ်မတော် AA တို့ တိုက်ပွဲတွေ ဖြစ်ပွား ခဲ့တာကြောင့် ပြီးခဲ့တဲ့ ရက်ပိုင်း ကနေ စတင်ပြီး မြို့တွေနဲ့ လမ်းတွေမှာ လုံခြုံရေးကို တင်းတင်း ကျပ်ကျပ် စစ်ဆေး နေပါတယ်။
ရခိုင်ပြည်နယ်ရဲ့ ကုန်းလမ်းတွေနဲ့ ရေလမ်းကြောင်းတွေမှာ အဓိကထားစစ်ဆေးနေတာလို့ စစ်တွေခရိုင်ရဲတပ်ဖွဲ့မှူး ဒုတိယရဲမှူးကြီးဝင်းနောင်က ပြောပါတယ်။
"ကျနော်တို့က ရခိုင်ပြည်နယ် အတွင်းကို ဝင်လာတဲ့ ကားတွေကစပြီးတော့ ရခိုင်ပြည်နယ်ရဲ့ ဝင်ပေါက် ကနေပြီးတော့ စပြီးတော့စစ်တာပါ၊ လက်နက်ခဲယမ်းတို့ မူးယစ်ဆေးဝါးတို့ အဓိကက ဒါတွေဝင်ရောက် မလာရေးပါပဲ"
ရခိုင်ပြည်နယ်ထဲကို လက်နက်ခဲယမ်းတွေ ဝင်ရောက်မလာဖို့ကို အဓိက တားဆီးစစ်ဆေးတာဖြစ်ပြီး မူးယစ်ဆေးဝါးသယ်ဆောင်မှုကို တားဆီးနိုင်အောင်အတွက်လည်း ပူးတွဲဆောင်ရွက်နေတယ်လို့ ဆိုပါတယ်။
အခုလို လူဝင်လူထွက်ဂိတ်တွေမှာ လုံခြုံရေးဆောင်ရွက်မှုကို ရဲတပ်ဖွဲ့၊ လဝကအဖွဲ့တွေနဲ့ တပ်မတော်တို့ ပူးပေါင်းဆောင်ရွက်နေတာဖြစ်ပါတယ်။
ရခိုင်ပြည်နယ်မှာ ပြီးခဲ့တဲ့ ဧပြီလ ၁၆ ရက်နေ့လောက်ကနေစတင်ကာ ဘူးသီးတောင်၊ ရသေ့တောင်၊ ပုဏ္ဏားကျွန်း ၊ ကျောက်တော် စတဲ့မြို့နယ်တွေနဲ့ ထိစပ်နေတဲ့ လောရမတောင်တန်းတွေမှာ တိုက်ပွဲတွေ ဖြစ်ပွားခဲ့တာဖြစ်ပြီး အဲ့ဒီမြို့နယ်တွေမှာ ဒေသခံ ၁၀၀၀ လောက် နေရပ်စွန့်ခွာ ထွက်ပြေးတိမ်းရှောင်နေရပါတယ်။
