NVC ကဒ် မကိုင်လျှင် အလုပ်အကိုင်၊ စီးပွားရေး၊ သွားလာရေး အကုန် ပိတ်ပင်မည်ဟု ခြိမ်းခြောက် အကျပ်ကိုင်လျက်ရှိ

Rohingya Eye

RB News

5.1.2017

မြင်းလွတ် ။ ။ ရခိုင်ပြည်နယ်၊ မောင်တောခရိုင်၊ မြင်းလွတ်မြို့ ရှိ ရပ်ကွက်များမှ အုပ်ချုပ်ရေးမှူးများကို နယ်ခြားစောင့်ရဲတပ်ဖွဲ့မှ ရဲမှူးက ဆင့်ခေါ်၍ ဒေသခံများကို NVC ကဒ် ယူရန်အတွက် စည်းရုံးပေးရန် ပြောကြားခဲ့ကြောင်း သတင်း ရရှိပါသည်။ 

ဇန်န၀ါရီလ (၄) ရက်နေ့ နံနက် (၈) နာရီ အချိန်တွင် မြင်းလွတ်မြို့ အခြေစိုက် နယ်မြေ (၈) နယ်ခြားစောင့်ရဲတပ်ဖွဲ့မှ တာဝန်ခံရဲမှူးက ရပ်ကွက် (၈) ခုမှ အုပ်ချုပ်ရေးမှူးများကို နယ်မြေရုံးသို့ ဆင့်ခေါ်ခဲ့သည်။ ထို့နောက် တာဝန်ခံရဲမှူးက ရွာသားများ NVC ကဒ် မဖြစ်မနေ ကိုင်ဆောင်ရန် အတွက် စည်းရုံးပေးကြရန်၊ အကယ်၍ NVC ကဒ် မကိုင်ဆောင်ပါက ပင်လယ်သို့ ထွက်၍ ငါးဖမ်းခွင့်၊ တောင်တန်းသို့ သွားရောက်၍ ထင်းခုတ်ခွင့်၊ တစ်ရွာမှ တစ်ရွာသို့ သွားလာခွင့်များ ပိတ်ပင်သွားမည် ဖြစ်ကြောင်း၊ အုပ်ချုပ်ရေးမှူးများ အနေဖြင့် ရွာထွက် လက်မှတ် မထုတ်ပေးကြရန် မှာကြားခဲ့သည်။ 

ထို့အပြင် ဆွဲ၊တင်၊စစ် ဓါတ်ပုံများ ထုတ်ယူရန် အတွက် နယ်မြေရုံးတွင် ငွေပေးသွင်းကြရန်လည်း မှာကြားခဲ့ကြောင်း သိရှိရသည်။ 

လွန်ခဲ့သည့် ၂၀၁၆ ခုနှစ် ဒီဇင်ဘာလ အတွင်း မြင်းလွတ်မြို့တွင် န.စ.က မြေပုံတွင် မပါရှိသည့် အိမ်များဟု ဆိုကာ နေအိမ် (၇၂) လုံးကို ဖြိုဖျက်ခဲ့သည်။ အဆိုပါ နေအိမ်များကို ကိုယ့်အိမ်ကိုယ်ဖြိုဖျက်ခဲ့သည်ဟု သက်ဆိုင်ရာ အုပ်ချုပ်ရေးမှူးများအား ခံဝန်လက်မှတ် အတင်းအဓမ္မ ထိုးခိုင်းခဲ့ကြောင်း အုပ်ချုပ်ရေးမှူးတစ်ဦးနှင့် နီးစပ်သူ တစ်ဦးက RB News သို့ပြောသည်။ 

လွန်ခဲ့သည့် အပတ်တွင် မောင်တောမြို့ပေါ် အမှတ် (၁) ရပ်ကွက်ရှိ အမှတ် (၁) နယ်စပ် ကုန်သွယ်ရေး စခန်းတွင် ကုန်တင်/ကုန်ချ ပြုလုပ်နေသည့် အလုပ်သမားများကို အာဏာပိုင်များက NVC ကဒ်မရှိလျှင် ကုန်တင်/ကုန်ချ လုပ်ခွင့်ရတော့မည် မဟုတ်ကြောင်း ပြောဆိုသဖြင့် အလုပ်သမားများ အလုပ်လက်မဲ့ ဖြစ်ခဲ့ရသည်။ ထို့အပြင် စက်လှေသမားများလည်း စက်လှေမောင်းနှင်ခွင့် မရှိတော့သဖြင့် ၎င်းတို့၏ နေရာတွင် ဟိန္ဒူအမျိုးသားများ အစားထိုး ၀င်ရောက်လုပ်ကိုင်လျက် ရှိကြောင်း ဒေသခံတစ်ဦးက ပြောပါသည်။ 

တဖက်နိုင်ငံသို့ နယ်စပ်နိုင်ငံကူးလက်မှတ်ဖြင့် သွားရောက်လိုလျှင် NVC ကဒ် ကိုင်ဆောင်သူ ဖြစ်ရမည်ဟု အမှတ် (၁) အ၀င်/အထွက် စခန်းရှိ နယ်ခြားစောင့်ရဲများနှင့် လ.၀.က များက ပြောဆိုသဖြင့် ရိုဟင်ဂျာ ကုန်သည်များ အခက်တွေ့လျက် ရှိနေကြသည်။ 

အဆိုပါ ညွန်ကြားချက်ကို ရခိုင်ပြည်နယ် နယ်စပ်ရေးရာဝန်ကြီး ဗိုလ်မှူးကြီး ထိန်လင်းက ပေးထားခြင်း ဖြစ်သည်ဟု ဌာနဆိုင်ရာများနှင့် အကျွမ်းတ၀င်ရှိသူ တစ်ဦးက ပြောသည်။ 

မောင်တော အခြေစိုက် လူ့အခွင့်အရေး စောင့်ကြည့်သူ တစ်ဦးက “ဒီကဒ်က အဆင့်အတန်း ခွဲခြားတဲ့ ကဒ်တစ်ခုလို ဖြစ်နေတယ်။ ပြီးတော့ ၈၂ ဥပဒေနဲ့လည်း ကိုက်ညီမှု မရှိဘူး။ အဲဒါကြောင့် လုံးဝ လက်ခံနိုင်စရာ အကြောင်းမရှိဘူး။ နောက်တစ်ခု ပြောချင်တာက နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်က တိုင်းပြည်ကို မေတ္တာတရားနဲ့ အုပ်ချုပ်ပါမယ်၊ လူ့အခွင့်အရေးကို လေးစား လိုက်နာတဲ့ အစိုးရ ဖြစ်ရမယ်လို့ ကတိပြုခဲ့တယ်။ အခု ရိုဟင်ဂျာတွေရဲ့ အသွားအလာ၊ အလုပ်အကိုင်တွေကို အကျပ်ကိုင်ပြီး NVC ကိုင်အောင် ဖိအားပေးနေတာက ရိုဟင်ဂျာတွေရဲ့ လူ့အခွင့်အရေးကို ပြောင်ပြောင်တင်းတင်း ချိုးဖောက်နေတာပါ။ ရိုဟင်ဂျာတွေကို ငတ်မွတ်သည် အထိ အကျပ်ကိုင်နေတာက မေတ္တာတရားနဲ့ အုပ်ချုပ်နေတာလားလို့ မေးခွန်းထုတ်ချင်ပါတယ်။ ကာယကံရှင်ရဲ့ သဘောဆန္ဒမပါဘဲ အတင်းအကျပ် လုပ်ခိုင်းနေတာက အပြည်ပြည်ဆိုင်ရာ လူ့အခွင့်အရေး ကြေညာစာတမ်းနဲ့ ကိုက်ညီမှုရှိရဲ့လား၊ အခုလို အကျပ်ကိုင်ပြီး လုပ်နေတဲ့ အစိုးရက လူ့အခွင့်အရေးကို အမှန်တကယ် နားလည်ရဲ့လားဆိုတာ မေးခွန်းထုတ်ချင်တယ်” ဟု RB News သို့ပြောပါသည်။